ប្រេស៊ីល ស្លាប់យ៉ាងហោច៩នាក់ និងបាត់ខ្លួនជាច្រើនរយនាក់ ក្នុងគ្រោះបាក់ទំនប់
មានស្លាប់យ៉ាងណាស់៩ នាក់ និងប្រមាណ២០០នាក់បាត់ខ្លួន ក្នុងគ្រោះបាក់ទំនប់ នៅតំបន់អណ្តូងរ៉ែដ៏ធំមួយ ក្នុងរដ្ឋ Minas Gerais ប្រទេសប្រេស៊ីល នាថ្ងៃទីសុក្រទី ២៥មករា ២០១៩។ ជាទំនប់ទប់កាកសំណល់នៃឧស្សាហកម្មរ៉ែ។ គ្រោះថ្នាក់បែបនេះ និងរបស់ក្រុមហ៊ុនរ៉ែតែមួយ ធ្លាប់កើតមានម្តងកាលពីបីឆ្នាំមុន ដែលកាលណោះបានបង្កឱ្យស្លាប់១៩នាក់ និងមហន្តរាយបរិស្ថានយ៉ាងធ្ងន់ធ្ងរសម្រាប់ប្រេស៊ីល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
ជាទំនប់ទប់ កាកសំណាល់នៃផលិតកម្មចម្រាញ់រ៉ែ ដែលមានផ្ទុកសំរាមក្នុងបរិមាណប្រហែលជាង១៣លានម៉ែត្រគូប។ ការដាច់ទំនប់នេះ បានធាក់ដីភក់ជាសំរាមឧស្សាហកម្មរ៉ែ ទៅកប់គ្របតំបន់និងរុក្ខជាតិជុំវិញទាំងមូល ឱ្យឡើងពណ៌ត្នោត។
អាជ្ញាធរតំបន់ បានពង្រាយកម្លាំង ជាក្រុមពន្លត់អគ្គីភ័យ ប៉ូលិស យោធា ជាច្រើនរយនាក់ ព្រមទាំងឧទ្ធម្ភាចក្រជាច្រើនសិបគ្រឿង ដើម្បីធ្វើប្រតិបត្តិការសង្គ្រោះ ប៉ុន្តែគេមានសង្ឃឹមតិចតួចបំផុតក្នុងការរកឃើញអ្នករួចពីស្លាប់។
ទំនប់ធ្លាយ ការហូរបាក់ដី កម្លាំងភក់ហូរបុក និងបំផ្លាញខ្ទេចគ្មានសល់អ្វីទេ ! នេះបើតាមការរៀបរាប់របស់សាក្សីម្នាក់ និងបើតាមរូបភាពវីដេអូបង្ហោះក្នុងប្រព័ន្ធសង្គម។
គ្រោះថ្នាក់បានកើតឡើងនៅវេលាដែលបុគ្គលិកកម្មករជាងបីរយនាក់ កំពុងសម្រាកទទួលទានបាយថ្ងៃត្រង់ ក្នុងសាលអាហារ ក្នុងនោះមានតែប្រមាណ១០០នាក់បានរត់គេចរួច ព្រោះកម្លាំងទឹកហូរបាក់ទំនប់មានសន្ធឹកខ្លាំងពេក។ នេះបើតាមសេចក្តីបញ្ជាក់របស់អគ្គនាយកក្រុមហ៊ុនទៅកាន់អ្នកកាសែត ដោយទទួលស្គាល់ថាចំនួនជនរងគ្រោះពិតជាមានច្រើនខ្លាំង និងច្រើនជាងគ្រោះបាក់ទំនប់កាលពីបីឆ្នាំមុនទៅទៀត តែពុំសូវមានផលប៉ះពាល់ចំពោះបរិស្ថានទេ។
សូមបញ្ជាក់ថា កាលពីឆ្នាំ២០១៥ ទំនប់ទប់កាកសំណល់ឧស្សាហកម្មរ៉ែមួយផ្សេងទៀត របស់ក្រុមហ៊ុនValeដដែលនេះ តែស្ថិតនៅតំបន់ផ្សេងចម្ងាយប្រមាណ១៥០គីឡូម៉ែត្រពីគ្នា បានដាច់ និងសម្លាប់ជីវិតមនុស្ស១៩នាក់ ព្រមទាំងបំផ្លាញបរិស្ថានយ៉ាងធ្ងន់ធ្ងរបំផុតមិនធ្លាប់មានក្នុងប្រវត្តិរបស់ប្រេស៊ីល។
គេនៅមិនទាន់ដឹងអំពីមូលហេតុដែលនាំឱ្យដាច់ទំនប់នេះទេ ប៉ុន្តែបើតាមព័ត៌មានដែលសារព័ត៌មានយើងទទួលបាន ទំនប់នេះកំពុងស្ថិតក្នុងការជួសជុល ដោយហេតុតែមានការលេចជ្រាប តាំងពីជាច្រើនខែមកហើយ។ រដ្ឋាភិបាលប្រេស៊ីលបានដឹងអំពីស្ថានភាពដ៏គ្រោះថ្នាក់នៃទំនប់នេះតាំងពីខែធ្នូ២០១៨មក។ តាមការពិត ភ្នាក់ងារសង្គមស៊ីវិល បានចាត់ទុកគម្រោងពង្រីកឧស្សាហកម្មរ៉ែរបស់ក្រុមហ៊ុនVale ជាតំណាងមហន្តរាយដ៏ធ្ងន់ធ្ងរ ព្រោះមានបញ្ហាបច្ចេកទេស តែគម្រោងនៅតែត្រូវអនុម័តដដែល។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ