ប្រមុខបក្សប្រឆាំងវ៉េណេស៊ុយអេឡា ចង់អនុញ្ញតឱ្យមានអន្តរាគមន៍យោធាអាមេរិក
វិបត្តិវ៉េណេស៊ុយអេឡា កំពុងបោះជំហានទៅមុខមួយដំណាក់ទៀតហើយ។ ប្រមុខបក្សប្រឆាំង ហ័ន ហ្កាយដូ ដែលបានធ្វើការស្វ័យប្រកាសតាំងខ្លួនជាប្រធានាធិបតីស្តីទី បានប្រកាសត្រៀមខ្លួនធ្វើគ្រប់យ៉ាង រាប់ទាំងការសុំអន្តរាគមន៍យោធាអាមេរិកផង បើចាំបាច់ ដើម្បីទម្លាក់ប្រធានាធិបតីម៉ាឌូរ៉ូ និងដើម្បីសង្គ្រោះជីវិតប្រជាពលរដ្ឋនិងកុមារពីភាពអត់ឃ្លាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
លោក ហ័ន ហ្កាយដូ ប្រធានាធិបតីស្តីទីស្វ័យប្រកាស បានព្រលយឱ្យដឹងថា ក្នុងនាមជាប្រធានសភាជាតិ លោក ត្រៀមជាស្រេចនឹងបើកផ្លូវឱ្យមានអន្តរាគមន៍យោធាអាមេរិក ដើម្បីបង្ខំលោកប្រធានាធិបតីម៉ាឌុយរ៉ូ ចាកចេញពីតំណែង និងដើម្បីបិទបញ្ចប់វិបត្តិមនុស្សធម៌របស់វ៉េណេស៊ុយអេឡា។
“យើងត្រៀមធ្វើគ្រប់យ៉ាងទាំងអស់ ដែលចាំបាច់ ដើម្បីសង្គ្រោះជីវិតមនុស្ស និងដើម្បីកុំឱ្យមានកុមារស្លាប់ព្រោះភាពអត់ឃ្លាន” ! អន្តរាគមន៍យោធាបរទេស អាចជាចំណោទដ៏អាស្រូវមែនហើយ ប៉ុន្តែយើងនឹងធ្វើគ្រប់យ៉ាងដែលចាំបាច់ ដោយរក្សាអធិបេតយ្យភាពជាតិ ដោយស្វ័យភាព និងដោយស្របតាមច្បាប់”។ នេះជាអះអាងបន្ថែមរបស់លោក ហ្កាយដូ ប្រធានាធិបតីវ៉េណេស៊ុយអេឡា ស្តីទី ដែលទទួលស្គាល់ដោយប្រទេសធំៗជាងសែសិប និងដោយសហរដ្ឋអាមេរិក។
សេចក្តីប្រកាសនេះធ្វើឡើងក្រោយពី លោកប្រធានាធិបតី ម៉ាឌូរ៉ូ បានបញ្ជាក់យ៉ាងម៉ឺងម៉ាត់ ថានឹងបិទខ្ទប់មិនឱ្យក្បួនដឹកជំនួយមនុស្សធម៌របស់អាមេរិកចូលឡើយ ព្រោះដូចជាបើកផ្លូវឱ្យអាមេរិកចូលលុកលុយឈ្លានពានប្រទេស។ លោកប្រធានាធិបតីបានឆ្លៀតធ្វើការចោទប្រកាន់សហរដ្ឋអាមេរិកជាថ្មីថា ជំនួយអាមេរិកនេះ គឺគ្រាន់តែជាលេសសម្រាប់ចូលធ្វើអន្តាគមន៍យោធាក្នុងប្រទេសប្រេងកាតប៉ុណ្ណោះ។ រដ្ឋាភិបាលលោកម៉ាឌូរ៉ូ បានដាក់កម្លាំងបិទច្រកដូច ត្រៀមប្រឈមនឹងការវាយលុកចូលឈ្លានពានពីបរទេសយ៉ាងដូច្នោះ។
ក្បួនដឹកជំនួយមនុស្សធម៌របស់អាមេរិក ស្នើសុំដោយមេបក្សប្រឆាំង មួយវគ្គដំបូងបានមកដល់ព្រំដែនវ៉េណេស៊ុយអេឡាហើយ ហើយក្បួនបន្តបន្ទាប់ក៏នឹងជិតមកដល់ដែរ។
សូមបញ្ជាក់ថា វ៉េណេស៊ុយអេឡា បានធ្លាក់ផុងក្នុងវិបត្តិសេដ្ឋកិច្ចយ៉ាងធ្ងន់ធ្ងរ ប្រែក្លាយប្រទេសអ្នកមានប្រេងកាតលំដាប់ទីបីពិភពលោក ទៅជាប្រទេសរងគ្រោះ ខ្វះស្បៀងអាហារ ថ្នាំសង្កូវ និងផលិតផលចាំបាច់សម្រាប់ជីវភាពប្រចាំថ្ងៃជាច្រើនផ្សេងទៀត។ គិតចាប់តាំងពីឆ្នាំ២០១៥មក មានប្រជាពលរដ្ឋវ៉េណេស៊ុយអេឡា ជាង២លាននាក់ បានរត់គេចខ្លួនពីប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ