លោកដូណាល់ ត្រាំថា គណបក្សប្រជាធិបតេយ្យមានចំណែកទទួលខុសត្រូវនៃបរាជ័យជំនួបត្រាំ គីមនៅវៀតណាម
ប្រធានាធិបតីអាមេរិកលោកដូណាល់ ត្រាំបានថ្លែងនៅថ្ងៃចន្ទ ទី៤ មីនាថា ការដែលជំនួបកំពូលរវាងលោក និងលោកគីម ជុងអ៊ុនក្នុងប្រទេសវៀតណាមបានបិទបញ្ចប់ដោយគ្មានកិច្ចព្រមព្រៀង និងគ្មានសេចក្តីថ្លែងការណ៍ ក៏ដោយសារតែគណបក្សប្រជាធិបតេយ្យបានរៀបចំសវនាការសួរដេញដោលអតីតមេធាវីរបស់លោក។ លោកត្រាំយល់ថា បើគ្មានការសួរនាំអតីតមេធាវីរបស់លោកក្នុងថ្ងៃដែលលោកកំពុងជួបលោកគីម ជុងអ៊ុនទេ ម្ល៉េះជំនួបក៏មិនទទួលបរាជ័យដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
ក៏ដូចជាទម្លាប់សព្វមួយដង លោកដូណាល់ ត្រាំបានប្រើបណ្តាញសង្គម Twitter របស់លោកដើម្បីបញ្ចេញប្រតិកម្ម។ ដោយមិននិយាយចំឈ្មោះលោក Michael Cohen ដែលជាអតីតមេធាវីរបស់លោក លោកត្រាំបានសរេសរយ៉ាងដូច្នោះថា « ការដែលពួកអ្នកប្រជាធិបតេយ្យបានបើកសវនាការជាសាធារណៈសួរដេញដោលមនុស្សនិយាយកុហក និងលួចបន្លំម្នាក់ក្នុងពេលដែលមានជំនួបសំខាន់រឿងនុយក្លេអ៊ែរជាមួយកូរ៉េខាងជើងអាចរួមចំណែកពីការគ្មានកិច្ចព្រមព្រៀងក្នុងទីក្រុងហាណូយ »។ បន្ទាប់មក លោកត្រាំបានសរសេរបន្តដោយចាត់ទុកទង្វើរបស់គណបក្សប្រជាធិបតេយ្យថាជារឿងគួរឲ្យអាម៉ាស់ និងមិនដែលឃើញក្នុងពេលដែលប្រធានាធិបតីម្នាក់កំពុងស្ថិតនៅបរទេស។
គួររម្លឹកថា ក្នុងពេលដែលលោកត្រាំ និងមេដឹកនាំកូរ៉េខាងជើងលោកគីម ជុងអ៊ុនកំពុងមានជំនួបលើកទី២ នាថ្ងៃទី២៧ និងទី២៨ កុម្ភៈក្នុងទីក្រុងហាណូយ ប្រទេសវៀតណាម លោក Michael Cohen ដែលជាអតីតមេធាវីរបស់លោកត្រាំបានឆ្លើយនៅចំពោះមុខគណៈកម្មការសភាក្នុងទីក្រុងវ៉ាស៊ីនតោនដោយបានចោទលោកត្រាំជាមនុស្សប្រកាន់ពូជសាសន៍ បោកប្រាស់ និងឆរបោក។ លោក Michael Cohen បានធានានៅនិងចំពោះមុខគណៈកម្មការសភាថា លោកត្រាំជាអ្នកបញ្ជាឲ្យមានកិច្ចចរចារឿងអចលនទ្រព្យជាមួយរុស្ស៊ីក្នុងពេលដែលលោកកំពុងធ្វើយុទ្ធនាការឃោសនាបោះឆ្នោតប្រធានាធិបតីអាមេរិក។
គួរបញ្ជាក់ថា បន្ទាប់ពីបានបិទបញ្ចប់ជំនួបកំពូលជាមួយលោកគីម ជុងអ៊ុននៅមុនពេលកំណត់ លោកត្រាំក៏បានធ្វើសន្និសីទកាសែតមួយដោយបានរិះគន់ទិតៀនលើសវនាការរៀបចំដោយគណបក្សប្រជាធិបតេយ្យ និងចាត់ទុកការចោទប្រកាន់របស់លោក Cohen លើលោកថាជារឿងមិនពិត។ សម្រាប់លោកត្រាំ គណបក្សប្រជាធិបតេយ្យមានចំណែកទទួលខុសត្រូវនៅក្នុងបរាជ័យនៃជំនួបកំពូលលើកទី២ ត្រាំ គីមក្នុងប្រទេសវៀតណាមដែលគ្មានកិច្ចព្រមព្រៀង និងគ្មានសេចក្តីថ្លែងការណ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ