ស្ថានតំណាងអាមេរិកប្រចាំប៉ាឡេស្ទីន ក្លាយជាផ្នែកមួយក្រោមស្ថានទូតអាមេរិកនៅអ៊ីស្រាអែល
ស្ថានតំណាងការទូតអាមេរិកប្រចាំប៉ាឡេស្ទីន នៅក្រុងហ្សេរុយសាឡិម លែងមានរូបរាង ហើយ ចាប់ពីថ្ងៃចន្ទទី ៤មីនានេះតទៅ ! សម្រាប់ប៉ាឡេស្ទីន រដ្ឋបាលអាមេរិករបស់លោក ត្រាំ ដែលត្រូវដើរតួជាអ្នកសម្របសម្រួល និងដែលត្រូវបង្ហាញផែនការស្វែងរកសន្តិភាពឱ្យអ៊ីស្រាអែលនិងប៉ាឡេស្ទីន នៅថ្ងៃទី ៩មេសាខាងមុខ បានបង្ហាញទំនោរងាកទៅកាន់ជើងអ៊ីស្រាអែលកាន់តែខ្លាំង និងកំពុងជាន់ពន្លិចក្តីសង្ឃឹមរបស់ប៉ាឡេស្ទីន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
ស្ថានកុងស៊ុលអាមេរិកប្រចាំទីក្រុងហ្សេរ៉ុយសាឡិម ដែលជាស្ថានតំណាង ប្រៀបដូចជាស្ថានទូតអាមេរិកប្រចាំប៉ាឡេស្ទីន គិតចាប់ពីមានកិច្ចព្រមព្រៀងក្រុងអូស្លូ នៅទសវត្សរ៍ឆ្នាំ៩០មក ត្រូវបញ្ឈប់សកម្មភាពនិងលែងមានរូបរាងទៀតហើយ។ ចាប់ពីថ្ងៃទី ៤ មីនា ២០១៩នេះតទៅ ស្ថានកុងស៊ុលនឹងត្រូវច្របាច់បញ្ជូលទៅជាផ្នែកមួយនៃស្ថានទូតអាមេរិកនៅអ៊ីស្រាអែលតែមួយរួមគ្នាវិញ ! នេះបើតាមសេចក្តីថ្លែងការណ៍របស់ក្រសួងការបរទេសអាមេរិក ដោយគូសបញ្ជាក់បន្ថែមទៀតថា ការច្របាច់បញ្ចូលគ្នានេះ គឺដើម្បីឱ្យស្ថានទូតអាមេរិកនៅអ៊ីស្រាអែល ដែលទើបរើទីតាំងមកនៅក្រុងហ្សេរ៉ុយសាឡិម កាលពីឆ្នាំ២០១៨ អាចផ្តុំបេសកកម្មការទូតតែមួយ ប្រកបដោយប្រសិទ្ធភាព។
សម្រាប់ភាគីអាមេរិក ការបញ្ចូលស្ថានកុងស៊ុលប៉ាឡេស្ទីនទៅក្នុងស្ថានទូតអាមេរិកប្រចាំអ៊ីស្រាអែលនៅក្រុងហ្សេរ៉ុយសាឡិម ដែលបានប្រកាសជូនដំណឹងតាំងពីខែតុលា២០១៨ និងចូលជាធរមាននៅថ្ងៃនេះ មិនមែនជាការប្តូរទិសដៅនយោបាយការទូតអាមេរិកចំពោះលក្ខន្តិកៈក្រុងហ្សេរ៉ុយសាឡិម និងចំពោះដែនដីប៉ាឡេស្ទីនទេ។
ក៏ប៉ុន្តែចំពោះប៉ាឡេស្ទីនវិញ សេចក្តីសម្រេចរបស់រដ្ឋបាលលោកត្រាំនេះ គឺជាវិធានការថ្មីបន្ថែមមួយទៀត ដែលប៉ះពាល់យ៉ាងខ្លាំងដល់បុព្វហេតុប៉ាឡេស្ទីន និងប្រៀបដូចជាការដំដែកគោលផ្ជិតបញ្ចប់តួនាទីប្រវត្តិសាស្ត្ររបស់អាមេរិក ក្នុងកិច្ចរ៉ាប់រងសន្តិភាពឱ្យតំបន់ដើមបូព៌ាយ៉ាងដូច្នោះ។ អ្នកទទួលខុសត្រូវប៉ាឡេស្ទីន បានសម្តែងក្តីរន្ធត់ និងចុកចាប់ជាពិសេស នៅពេលឃើញទំនាក់ទំនងការទូតអាមេរិក និងប៉ាឡេស្ទីន ត្រូវកាត់បន្ថយមកស្ថិតក្រោមស្លាបនៃអំណាចរបស់ឯកអគ្គរដ្ឋទូតអាមេរិកប្រចាំអ៊ីស្រាអែល។ រដ្ឋបាលអាមេរិក ដាក់ប៉ាឡេស្ទីនឱ្យស្ថិតក្រោមអ៊ីស្រាអែល។
សូមបញ្ជាក់ថា ស្ថានតំណាងការទូតអាមេរិកប្រចាំប៉ាឡេស្ទីន មានវត្តមាននៅក្រុងហ្សេរ៉ុយសាឡិមតាំងពីឆ្នាំ ១៨៥៧មក ពោលគឺមុនការបង្កើតរដ្ឋអ៊ីស្រាអែលទៅទៀត។ តែជាមួយការបិទស្ថានកុងស៊ុលថ្ងៃនេះ សហរដ្ឋអាមេរិកបានក្លាយជាមហាអំណាចពិភពលោកដ៏ធំជាងគេបំផុតមួយដែលគ្មានស្ថានតំណាងការទូតប្រចាំប៉ាឡេស្ទីន។ តាំងពីឆ្នាំ២០១៧មក អាជ្ញាធរប៉ាឡេស្ទីនបានកាត់ផ្តាច់ទំនាក់ទំនងការទូតជាមួយរដ្ឋាភិបាលលោកត្រាំ។ ជាចម្លើយតប អាមេរិកបានបិទស្ថានទូតប៉ាឡេស្ទីននៅវ៉ាស៊ីនតោន និងឈប់ផ្តល់វិភាគទានដល់ភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ