លោកអាន់តូនីញ៉ូ ហ្គូទែរស៍ទៅនិយាយជាមួយអាមេរិកពីវិបត្តិថវិការបស់អង្គការសហប្រជាជាតិ
លោកអគ្គលេខាធិការអង្គការសហប្រជាជាតិអាន់តូនីញ៉ូ ហ្គូទែរស៍ (Antonio Guterres) ធ្វើដំណើរទៅកាន់ទីក្រុងវ៉ាស៊ីនតោនរយៈពេល ២ថ្ងៃ គឺថ្ងៃពុធ និងថ្ងៃព្រហស្បតិ៍ ទី១៤ មីនានេះ។ គោលដៅ គឺជជែកជាមួយរដ្ឋបាលអាមេរិកាំងពីវិបត្តិថវិកាដែលអ.ស.ប.កំពុងជួបប្រទះបច្ចុប្បន្ន។ តាមលោកហ្គូទែរស៍ បញ្ហាកង្វះថវិកាក៏ដោយសារតែអាមេរិកបានកាត់បន្ថយវិភាគទានរបស់ខ្លួន និងមានប្រទេសសមាជិកជាច្រើនទៀតបានបង់វិភាគទានយឺតពេលខ្លាំង។ ប្រមុខអង្គការពិភពលោកបានព្រមានទុកជាមុនថា កង្វះថវិកានឹងធ្វើឲ្យប៉ះពាល់ដល់បេសកម្មរក្សាសន្តិភាពរបស់កម្លាំងមួកខៀវនៅក្នុងលោក។
ចុះផ្សាយនៅថ្ងៃ៖
ស្តាប់ - ០២:២២
ដើម្បីស្រោចស្រង់វិបត្តិថវិកាធ្ងន់ធ្ងរដែលអង្គការសហប្រជាជាតិកំពុងជួបប្រទះសព្វថ្ងៃ លោកអាន់តូនីញ៉ូ ហ្គូទែរស៍គ្មានជម្រើសអ្វីក្រៅពីដាស់តឿន ក្រើនរម្លឹកដល់ប្រទេសសមាជិកកុំឲ្យកាត់បន្ថយការបង់វិភាគទាន ឬឲ្យបង់វិភាគទានទៀងទាត់ពេលនោះទេ។ បេសកកម្មមួយនេះត្រូវបានលោកហ្គូទែរស៍ផ្តើមធ្វើតាំងពីខែមករា ឆ្នាំ ២០១៩ និងបានចំណាយពេលប្រជុំមួយខែម្តងជាមួយប្រទេសសមាជិកក្នុងក្រុមប្រឹក្សាសន្តិសុខដើម្បីឲ្យជួយរកដំណោះស្រាយ។ ចំណែកវត្តមានរបស់លោកហ្គូទែរស៍ក្នុងទីក្រុងវ៉ាស៊ីនតោនដើម្បីនិយាយជាមួយរដ្ឋបាលអាមេរិកពេលនេះបានធ្វើឡើង បន្ទាប់ពីលោកដូណាល់ ត្រាំបានសម្រេចកាត់បន្ថយការបង់វិភាគទានទៅឲ្យអ.ស.ប.ពី ២៨% ទៅ ២៥% តាំងពីឆ្នាំ ២០១៧។
សម្រាប់លោកហ្គូទែរស៍ កាត់បន្ថយចំនួន ២៥% ជាការបាត់បង់ទឹកប្រាក់ប្រមាណជា ២២០លានដុល្លារក្នុងមួយឆ្នាំៗសម្រាប់ថវិការបស់អង្គការ រួមទាំងការបង់វិភាគទានយឺតពេលរបស់ប្រទេសសមាជិកផ្សេងដែលមានទឹកប្រាក់រាប់រយលានដុល្លារ។ គួររម្លឹកថា ការដែលលោកត្រាំសម្រេចកាត់បន្ថយវិភាគទានរបស់អាមេរិកមកពីលោកច្រណែននឹងប្រទេសសមាជិកខ្លះដែលមានលទ្ធភាព តែបែរជាបានបង់តិចតួចទៅវិញ ដូចយ៉ាងអារ៉ាប៊ីសាអូឌីត កាតា អេមីរ៉ាតអារ៉ាប់រួម តួកគី សិង្ហបុរី ព្រុយណេ ប្រេស៊ីល ម៉ិកស៊ិច ឬមួយប្រទេសឥណ្ឌា។ គួរបញ្ជាក់ថា អ.ស.ប.មិនបានចែងពីទណ្ឌកម្មដែលត្រូវដាក់លើក្រុមប្រទេសដែលមិនបានបង់វិភាគទានគ្រប់គ្រាន់ ឬក្រុមប្រទេសដែលបង់យឺតពេលទេ។
គេមិនដឹងថា តើលោកហ្គូទែរស៍អាចជំនះអាមេរិកឲ្យឈប់កាត់បន្ថយការបង់វិភាគទានរបស់ខ្លួនឬអត់ទេ?។ អ្វីដែលគេដឹង វិបត្តិថវិកាអាចនឹងប៉ះពាល់ដល់ដំណើរការរបស់អង្គការសហប្រជាជាតិ ពិសេសបេសកកម្មរក្សាសន្តិភាពរបស់កម្លាំងមួកខៀវនៅក្នុងលោក។ សព្វថ្ងៃនេះ អង្គការសហប្រជាជាតិកំពុងមានបេសកកម្មរក្សាសន្តិភាពចំនួន ១៥ នៅទូទាំងពិភពលោកដោយប្រើទាហានមួកខៀវជាង ១០០ ០០០នាក់ និងថវិកាជិត ៦ ៧០០លានដុល្លារ។ អេត្យូពី ឥណ្ឌា និងប៉ាគីស្ថានជាប្រទេសដែលបានបញ្ជូនទ័ពមួកខៀវទៅឲ្យអ.ស.ប.ច្រើនជាងគេ និងដែលអ.ស.ប.ត្រូវបង់លុយឲ្យច្រើនជាងគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ