ជំនួបចចារពាណិជ្ជកម្មអាមេរិក-ចិន៖ ដំណើរការទៅមុខ ប៉ុន្តែនៅតែរកទីបញ្ចប់មិនឃើញ
ចុះផ្សាយនៅថ្ងៃ៖
ស្តាប់ - ០៣:៣៣
ទាញចេញពីជំនួបចចារពាណិជ្ជកម្មអាមេរិក-ចិន ធ្វើឡើងកាលពីថ្ងៃពុធ ទី០៣ ខែមីនានេះ ទាំងប្រធានាធិបតីអាមេរិក លោកដូណាល់ ត្រាំ និងទីប្រឹក្សាសេដ្ឋកិច្ចជាន់ខ្ពស់របស់គាត់ លោក Larry Kudlow បានលើកសរសើរថា កិច្ចព្រមព្រៀងពាណិជ្ជកម្មកាន់តែមានភាពរីកចម្រើនទៅមុខ ក៏ប៉ុន្តែកិច្ចព្រមព្រៀងបិទបញ្ចប់សង្គ្រាមពាណិជ្ជកម្មនៅតែមិនទាន់រកឃើញនៅឡើយ។
ទីប្រឹក្សាសេដ្ឋកិច្ចជាន់ខ្ពស់របស់ ប្រធានាធិបតីអាមេរិក លោកដូណាល់ ត្រាំ គឺលោក Larry Kudlow បានលើកសរសើរអំពី ដំណើរការរីកចម្រើន និងការខិតកាន់តែជិតនៃកិច្ចព្រមព្រៀងពាណិជ្ជកម្ម ក្នុងជំនួបចរចាពាណិជ្ជកម្មអាមេរិក-ចិន ប៉ុន្តែក៏បានលើកឡើងផងដែរថា កិច្ចព្រមព្រៀងចុងក្រោយមួយដើម្បីបញ្ចប់សង្គ្រាមពាណិជ្ជកម្ម នៅតែមិនទាន់បញ្ចប់នៅឡើយ ខណៈការចរចាកំពុងបន្តនៅទីក្រុងវ៉ាស៊ីនតោន ក្រោយការមកដល់របស់ ឧបនាយករដ្ឋមន្ត្រីចិនលោក Liu He កាលពីថ្ងៃពុធ ទី០៣ ខែមីនា នេះ។ នេះបើយោងតាមការចេញផ្សាយរបស់ការសែតអាមេរិក The Bloomberg។
ទស្សនាវដ្តីអាមេរិក The Financial Times បានរាយការណ៍ថា ប្រទេសទាំងពីរមិនទាន់ឯកភាពគ្នានៅឡើយនោះទេ លើអ្វីដែលបាននិងកំពុងកើតមានឡើងលើទំនិញចិន និងល័ក្ខខ័ណ្ឌនៃយន្តការអនុវត្តច្បាប់ ដើម្បីធានាថា ប្រទេសចិនអាចរក្សាកិច្ចព្រមព្រៀងពាណិជ្ជកម្មបាន។ ទោះជាយ៉ាងណា ជំនួបចរចាពាណិជ្ជកម្ម ក្នុងពេលថ្មីៗនេះ បានផ្តោតលើបញ្ហាចម្បងៗ រួមមាន៖
កាត់បន្ថយឱនភាព
ការចរចាមកទល់នឹងពេលនេះ ផ្តោតសំខាន់លើអ្វីដែលប្រទេសចិននឹងត្រូវធ្វើ ដើម្បីកាត់បន្ថយឱនភាពជញ្ជីងពាណិជ្ជកម្មរបស់អាមេរិកជាមួយចិន ដែលមានទំហំទឹកប្រាក់ប្រមាណ ៤១៩,២ ពាន់លានដុល្លារអាមេរិក នៅឆ្នាំ២០១៨។ ទីក្រុងប៉េកាំង បានធ្វើសម្បទានយ៉ាងធំនៅក្នុងបញ្ហានេះ ដោយបេ្ដជ្ញាថានឹងកាត់បន្ថយរហូតដល់សូន្យនៅឆ្នាំ២០២៤។ វាជាពេលនៃចុងបញ្ចប់អាណត្តិទី២ របស់លោកត្រាំ។
យ៉ាងណាមិញ ល័ក្ខខ័ណ្ឌនេះត្រូវបានមតិសាធារណៈវាយតម្លៃថា មិនអាចទៅរួច និងពិបាកសម្រេចបានណាស់។
ការដាក់ឱ្យប្រតិបត្តិ
ចំណុចទាមទារដ៏សំខាន់មួយទៀត ដែលអាមេរិកចង់បានគឺ ការរក្សាអំណាចរបស់ខ្លួន ដើម្បីត្រួតពិនិត្យលើការអនុវត្តកិច្ចព្រមព្រៀង។ សហរដ្ឋអាមេរិកចង់ឱ្យមានកិច្ចប្រជុំជាទៀងទាត់ ដើម្បីវាយតម្លៃថាតើប្រទេសចិនកំពុងអនុវត្ត តាមការសន្យាឬយ៉ាងណា ហើយចង់ឱ្យមានការដាក់ពន្ធលើប្រទេសចិនដោយគ្មានការគំរាមសងសឹកមកវិញទេ។ ចិនឯណោះវិញ ចង់ឱ្យអាមេរិកដក់ពន្ធគយទាំងអស់ដែលបានដាក់ កំឡុងពេល១២ខែកន្លងមកសិន ប៉ុន្តែអាមេរិកនៅតែចង់ទុកផ្នែកខ្លះ ដើម្បីធានាអាចអនុវត្តយន្តការរបស់ខ្លួនបាន។
កម្មសិទ្ធិបញ្ញា
ការទាមទាររបស់សហរដ្ឋអាមេរិក ពាក់ព័ន្ធទៅនឹង បញ្ហាកម្មសិទ្ធិបញ្ញារបស់ខ្លួន ក៏ជាចំណុចសំខាន់មួយនៃការចរចាផងដែរ ស្របពេលដែលមានការអះអាងថា ក្រុមហ៊ុនចិនជាទូទៅ ចម្លងឬលួច បច្ចេកវិទ្យាពីគូប្រជែងបរទេស។ រដ្ឋាភិបាលចិន នៅខែមីនានេះ បានអនុម័តច្បាប់វិនិយោគទុនបរទេសថ្មីមួយ ដែលមានការអះអាងថា ក្រុមហ៊ុនដែលបានចុះបញ្ជីនៅក្នុងប្រទេសចិនត្រូវបានច្បាប់អនុវត្តដោយស្មើៗគ្នា។ ជំនួបលើកនេះនៅវ៉ាស៊ីនតោន ក៏បានលើកឡើងផងដែរពី ការព្រួយបារម្ភអំពី ការឧបត្ថម្ភ ប្រាក់ជំនួយ របស់ក្រុងប៉េកាំងឱ្យទៅក្រុមហ៊ុនរដ្ឋចិន ដែលគេអះអាងថា វារារាំងដល់ការប្រកួតប្រជែង និងអនុញ្ញាតឱ្យក្រុមហ៊ុនចិនបង្កើតឧស្សាហកម្មយុទ្ធសាស្ត្រ។
កំណើនសេដ្ឋកិច្ចសាកល
មនុស្សគ្រប់គ្នាបាននិងកំពុងផ្តោតអារម្មណ៍លើជំនួបនេះ។ លោកស្រី Christine Lagarde នាយកគ្រប់គ្រងមូលនិធិរូបិយវត្ថុអន្ដរជាតិ កាលពីថ្ងៃអង្គារនេះបានព្រមានថា សេដ្ឋកិច្ចពិភពលោកស្ថិតនៅក្នុងស្ថានភាពមិនច្បាស់លាស់ ដោយកំណើនសេដ្ឋកិច្ចសាកលបានបាត់បង់ថាមពលរបស់ខ្លួន ចាប់តាំងពីដើមឆ្នាំនេះ។ ការព្រមានរបស់លោកស្រី បានធ្វើឡើងស្របជាមួយនឹងការប្រកាសរបស់ អង្គការពាណិជ្ជកម្មពិភពលោក (WTO) ដែលបានទម្លាក់ការព្យាករណ៍ពីកំណើនពាណិជ្ជកម្មសាកលរបស់ខ្លួននៅឆ្នាំ២០១៩ ដល់កម្រិតទាបបំផុត ក្នុងរយៈពេលបីឆ្នាំ ដោយបានសង្កត់ធ្ងន់ពីផលប៉ះពាល់នៃភាពតានតឹងនៃសង្គ្រាមពាណិជ្ជកម្ម និងការដំឡើងពន្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ