អាមេរិក៖ការហោះហើរសាកល្បងលើកទី១ ដោយជោគជ័យរបស់យន្តហោះដ៏ធំជាងគេក្នុងលោក
នៅសហរដ្ឋអាមេរិក ក្រុមហ៊ុន Stratolaunch បានប្រកាសឲ្យដឹងនាថ្ងៃសៅរ៍ ទី១៣ មេសាពីការហោះហើរសាកល្បងប្រកបដោយជោគជ័យនូវយន្តហោះដ៏ធំជាងគេក្នុងលោក។ ការហោះសាកល្បងនេះត្រូវបានធ្វើឡើងនៅពីលើវាលរហោឋាននៃរដ្ឋ California។ យន្តហោះ Stratolaunch នេះមានសន្ធឹងស្លាបវែងជាងជិតពាក់កណ្តាលនៃសន្ធឹងស្លាបរបស់យន្តហោះ Airbus A៣៨០ មានតួខ្លួនចំនួនពីរ និងមានបំពាក់ដោយម៉ាស៊ីនរបស់យន្តហោះប៊ូអ៊ីង ៧៤៧ ចំនួន ៦គ្រឿង។
ចុះផ្សាយនៅថ្ងៃ៖
ស្តាប់ - ០២:១២
ចាប់ពីពេលនេះតទៅ យន្តហោះ Stratolaunch ជាយន្តហោះដ៏ធំជាងគេក្នុងលោក ពោលធំជាងយន្តហោះ A៣៨០។ ស្លាបរបស់វាមានប្រវែង ១១៧ម៉ែត្រ ពោលវែងជាងស្លាប A៣៨០ ដែលមានប្រវែងតែ ៧៩,៧៥ម៉ែត្រ។ តែអ្វីជាការកត់សម្គាល់ និងខុសពី A៣៨០ ដែលជាយន្តហោះដឹកអ្នកដំណើរ យន្តហោះ Stratolaunch ជាប្រភេទយន្តហោះដែលគេយកទៅប្រើនៅក្នុងវិស័យអវកាស។ តាមក្រុមហ៊ុន Stratolaunch គេប្រើយន្តហោះនោះសម្រាប់នាំកាំជ្រួចខា្នតតូចដែលមានបំពាក់ដោយម៉ាស៊ីន និងផ្កាយរណបទៅទម្លាក់នៅក្នុងលំហអាកាស។ ក្រោយពីយន្តហោះបានទម្លាក់កាំជ្រួចខ្នាតតូចនៅក្នុងលំហអាកាស កាំជ្រួចខ្នាតតូចនោះនឹងប្រើម៉ាស៊ីនក្នុងការបន្តដំណើរទៅមុខដើម្បីនាំផ្កាយរណបទៅដាក់ក្នុងគន្លងតារាវិថី។
គួររម្លឹកថាមកទល់ពេលនេះ ការនាំផ្កាយរណបទៅដាក់ក្នុងគន្លងតារាវិថីត្រូវបានធ្វើឡើងដោយការបាញ់បញ្ជូនកាំជ្រួចចេញពីស្ថានីយ៍ផ្ទាល់ដីមួយត្រង់ទៅលើ។ តែជាមួយនឹងយន្តហោះ Stratolaunch ការនាំផ្កាយរណបទៅដាក់ក្នុងគន្លងតារាវិថីមានលក្ខណៈងាយស្រួល មិនសុំាញុំា ព្រោះគេត្រូវការតែផ្លូវមានទទឹងធំសម្រាប់ឲ្យយន្តហោះនោះហោះឡើង។ នៅក្នុងសេចក្តីប្រកាសព័ត៌មានមួយចេញផ្សាយក្នុងថ្ងៃអាទិត្យ ទី១៤ មេសា ក្រុមហ៊ុន Stratolaunch បានប្រាប់ឲ្យដឹងពីលទ្ធផលនៃការហោះសាកល្បងថា យន្តហោះបានហោះក្នុងល្បឿនអតិបរមា ៣០៤គីឡូម៉ែត្រក្នុងមួយម៉ោង អាចហោះក្នុងកម្ពស់ដល់ទៅ ៥ ១៨២ម៉ែត្រ និងបានស្ថិតក្នុងអាកាសរយៈពេល ២ម៉ោង និង៣០នាទី។
គួរបញ្ជាក់ថា លោក Paul Allen សហស្ថាបនិកក្រុមហ៊ុន Microsoft ជាអ្នកចំណាយលុយដើម្បីផលិតយន្តហោះ Stratolaunch។ គោលដៅរបស់លោក Allen គឺបង្កើតទីផ្សារអវកាសថ្មីស្តីពីការនាំផ្កាយរណបខ្នាតតូចទៅដាក់ក្នុងគន្លងតារាវិថី។ តែមរណភាពរបស់លោក Allen ក្នុងខែតុលា ឆ្នាំ ២០១៨ កំពុងធ្វើឲ្យអនាគតនៃទីផ្សារអាវកាសមួយនេះស្ថិតក្នុងភាពមិនច្បាស់លាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ