ប៊ូអ៊ីងហៅអន្តរជាតិមកពិនិត្យយន្តហោះ៧៣៧Max ដើម្បីសុំសិទ្ធិធ្វើចរាចរណ៍ឡើងវិញ
ភ្នាក់ងារអាកាសចរណ៍ស៊ីវិលអាមេរិក (FAA) បានប្រកាសនៅថ្ងៃសៅរ៍នេះ បើកការត្រួតពិនិត្យ យន្តហោះប៊ូអ៊ីង ៧៣៧Max ពីសំណាក់អាជ្ញាធរអាកាសចរណ៍អន្តរជាតិមកពី៩ប្រទេស។ ជាការសិក្សាត្រួតពិនិត្យរួមគ្នា ដើម្បីកែសម្រួលនិងចេញបទបញ្ជាថ្មី សម្រាប់អនុវត្តនាថ្ងៃអនាគត នៅពេលយន្តហោះ៧៣៧ម៉ាក ចាប់ហោះហើរឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ការត្រួតពិនិត្យបច្ចេកទេស នឹងចាប់ធ្វើនៅថ្ងៃ ២៩មេសា សម្រាប់រយៈពេល៩០ថ្ងៃ ដោយក្រុមអ្នកជំនាញ ក្រោមការដឹកនាំរបស់អតីតប្រធានភ្នាក់ងារសន្តិសុខដឹកជញ្ជូន និងអ្នកជំនាញនៃភ្នាក់ងារអាកាសចរណ៍ស៊ីវិលអាមេរិក ព្រមទាំងភ្នាក់ងារណាសា។ អាជ្ញាធរអាកាសចរណ៍អន្តរជាតិចំនួន៩ ប្រទេស មានជាអាទិ៍ អូស្ត្រាលី ប្រេស៊ីល កាណាដា ចិន សហភាពអឺរ៉ុប (ភ្នាក់ងារសុវត្ថិភាពអាកាសចរណ៍អឺរ៉ុប) ជប៉ុន ឥណ្ឌូណេស៊ី សិង្ហបុរី និងអេមីរ៉ាត់អារ៉ាបរួម ក៏នឹងមកចូលរួមជាមួយដែរ។
ក្រុមអ្នកជំនាញអន្តរជាតិទាំងនេះ នឹងវាយតម្លៃប្រព័ន្ធបញ្ជាការហោះហើរស្វ័យប្រវត្តិជាទូទៅរបស់យន្តហោះប៊ូអ៊ីង ៧៣៧Max ផង រចនាសម្ព័ន្ធនៃប្រព័ន្ធបញ្ជា និង អន្តរកម្មរបស់អ្នកបើកបរ នៅពេលប្រើប្រព័ន្ធទប់ស្កាត់ការហោះសំយ៉ុងចុះរបស់យន្តហោះផង។ កម្មវត្ថុ គឺ ដើម្បីកំណត់បញ្ហាដែលត្រូវធ្វើប្រសើរឡើងផង និងដើម្បីបញ្ជាក់ថាយន្តហោះបានបំពេញតាមលក្ខន្តិកៈសុវត្ថិភាពដូចមានចែងក្នុងច្បាប់សុវត្ថិភាពអាកាសចរណ៍ផង។
ការត្រួតពិនិត្យបច្ចេកទេសប្រព័ន្ធគ្រប់គ្រងការហោះហើរស្វ័យប្រវត្តិរបស់យន្តហោះបែបនេះ ជាដំណាក់កាលវាយតម្លៃដ៏សំខាន់។ ប្រសិនបើយន្តហោះអាចឆ្លងកាត់វិញ្ញាសានេះរួច នោះមានន័យថា យន្តហោះអាចមានសិទ្ធិធ្វើការហោះហើរបានជាថ្មីឡើងវិញហើយ។
សូមបញ្ជាក់ថា ប្រព័ន្ធគ្រប់គ្រងការហោះហើរស្វ័យប្រវត្តិរបស់ប៊ូអ៊ីង ៧៣៧Max ត្រូវជាប់សង្ស័យថាដើមហេតុនាំមានមហន្តរាយធ្លាក់យន្តហោះពីរគ្រឿង ស្លាប់មនុស្សអស់សរុប ៣៤៦នាក់។ ទីមួយគឺយន្តហោះប៊ូអ៊ីង៧៣៧របស់ក្រុមហ៊ុនឥណ្ឌូណេស៊ី Lion Air បានធ្លាក់កាលពីខែតុលាឆ្នាំ២០១៨ ស្លាប់មនុស្សអស់១៨៩នាក់។ ៥ខែក្រោយ នៅថ្ងៃទី ១០មីនា ២០១៩ យន្តហោះមួយគ្រឿងទៀតម៉ាកដដែលប្រភេទដដែល តែជារបស់ប្រទេសអេត្យូពី បានធ្លាក់ស្លាប់មនុស្សអស់១៥៧នាក់ បន្ទាប់ពីហោះឡើងបានតែប្រមាណ៥-៦នាទី។ តាំងពីពេលនោះមក យន្តហោះប៊ូអ៊ីង៧៣៧Max ត្រូវជាប់បម្រាមមិនឱ្យហោះហើរដឹកអ្នកដំណើរទៀតឡើយ។
កាលពីថ្ងៃអង្គារ ប៊ូអ៊ីងបានធ្វើការហោះសាកល្បងជាថ្មី ជាលើកចុងក្រោយ បន្ទាប់ពីបានជួលជុលកែប្រព័ន្ធប្រឆាំងនឹងការធ្លាក់យន្តហោះថ្មីឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ