អាមេរិកបញ្ជាឱ្យមន្ត្រីនិងបុគ្គលិកស្ថានទូត ចាកចេញពីអ៊ីរ៉ាក់
តើមានន័យយ៉ាងដូចម្តេច ? នៅក្នុងខណៈដែលស្ថានភាពកំពុងឡើងតានតឹងខ្លាំងជាមួយអ៊ីរ៉ង់ ក្រសួងការបរទេសអាមេរិកបានចេញបទបញ្ជានៅថ្ងៃពុធទី ១៥ ឧសភា នេះ ឱ្យមន្ត្រីនិងបុគ្គលិកដែលមានតួនាទីមិនចាំបាច់ នៅស្ថានទូតអាមេរិកប្រចាំក្រុងបាកដាដ និងក្នុងស្ថានកុងស៊ុលប្រចាំក្រុងអែរប៊ីល ចាកចេញពីអ៊ីរ៉ាក់។
ចុះផ្សាយនៅថ្ងៃ៖ កែប្រែថ្ងៃទី៖
ជាសេចក្តីសម្រេចចិត្តដែលធ្វើឡើងនៅពេលលោកប្រមុខការទូតអាមេរិក មាយ ប៉ុមប៉េអូ (Mike Pompeo) អញ្ជើញទៅបំពេញទស្សនកិច្ច នៅទីក្រុងបាកដាដ ដោយឥតព្រៀងទុក កាលពីសប្តាហ៍មុន និងដោយសំអាងលើព័ត៌មានរបស់ភ្នាក់ងារចារកិច្ចអាមេរិកដែលថាពួកយុទ្ធជនឈីអ៊ីត ស្និទ្ធិនឹងអ៊ីរ៉ង់ បានដាក់ពង្រាយជើងបាញ់រ៉ុកកែត នៅតាមបណ្តោយមូលដ្ឋានទ័ពអាមេរិកនៅ អ៊ីរ៉ាក់។
បើតាមអ្នកទទួលជាន់ខ្ពស់ក្នុងជួរយោធាអ៊ីរ៉ាក់ វត្តមានដ៏ភ្ញាក់ផ្អើលរបស់លោកប៉ុមប៉េអូ ជាសារដ៏ច្បាស់លាស់របស់អាមេរិក ដែលចង់ប្រាប់អ៊ីរ៉ាក់ឱ្យការពារផលប្រយោជន៍អាមេរិកពីការគំរាមកំហែងរបស់ពួកយុទ្ធជនឈីអ៊ីត។ បើពុំនោះទេអាមេរិក នឹងការពារដោយខ្លួនឯង ដោយពុំចាំបាច់សហការជាមួយអ៊ីរ៉ាក់ឡើយ។
បន្ថែមពីលើនេះទៀត អាមេរិកនិងសម្ព័ន្ធមិត្តសង្ស័យថា អ៊ីរ៉ង់ទំនងជានៅពីក្រោយទង្វើវិច្ឆេទកម្ម កាលពីយប់ថ្ងៃអាទិត្យ បំផ្លាញនាវាដឹកប្រេងបួនគ្រឿង ក្នុងនោះពីរគ្រឿងជារបស់អារ៉ាប៊ីសាអូត ព្រមទាំងការវាយប្រហារដោយប្រើយន្តហោះដ្រូនរបស់ពួកឈីអ៊ីតយេម៉ែន កាលពីថ្ងៃអង្គារលើស្ថានីយ៍ប្រេងរបស់អារ៉ាប៊ីសាអូឌីត។
ហេតុការណ៍ទាំងពីរ បានជំរុញឱ្យមេបញ្ជាកងទ័ពអាមេរិកប្រកាសដាក់ទាហាន៥២០០នាក់ នៅអ៊ីរ៉ាក់ ឱ្យស្ថិតក្នុងស្ថានភាពត្រៀមអាសន្ន តាំងពីល្ងាចថ្ងៃអង្គារមក។ ចំណែកមន្ត្រីនិងបុគ្គលិកការទូត នៅស្ថានទូតក្នុងក្រុងបាកដាដ និងស្ថានកុងស៊ុលនៅអែរប៊ីល ក៏បានទទួលបញ្ជា នៅថ្ងៃនេះឱ្យចាកចេញពីអីរ៉ាក់ ជាកិច្ចបង្ការ។ សេវាមិនបន្ទាន់ ផ្នែកទិដ្ឋាការធម្មតា ត្រូវផ្អាកការងារមួយរយៈ។ រដ្ឋាបាលអាមេរិកបានកំរិតការផ្គត់ផ្គង់សេវាបន្ទាន់ដល់ពលរដ្ឋអាមេរិកនៅលើទឹកដីអ៊ីរ៉ាក់។ នេះបើបានសេចក្តីថ្លែងការណ៍លម្អិតរបស់ក្រសួងការបរទេសអាមេរិក។ ជាមួយគ្នានេះដែរ វគ្គបំពាក់បំប៉នយោធាអ៊ីរ៉ាក់ផ្តល់ដោយក្រសួងការពារជាតិអាល្លឺម៉ង់ក៏ត្រូវបានផ្អាក ក្រោមហេតុផលតែមួយ។
ប៉ុន្តែដូចការអះអាងរបស់មេបញ្ជាការកងទ័ពអង់គ្លេស លោកនាយករដ្ឋមន្ត្រីអ៊ីរ៉ាក់បានបញ្ជាក់ថាគ្មានឃើញសកម្មភាពកំរាមកំហែងមកពីអ៊ីរង់សោះ។ កងទ័ពឈីអ៊ីតផ្ទាល់ បានបដិសេធថាគ្មានបានត្រៀមលក្ខណៈវាយប្រហារលើផលប្រយោជន៍អាមេរិកទេ និងបានចោទវ៉ាស៊ីនតោនថាកំពុងធ្វើសង្គ្រាមចិត្តសាស្ត្រ ដូចអ្វី ដែលអាមេរិកធ្លាប់បានធ្វើដើម្បីចូលឈ្លានអ៊ីរ៉ាក់កម្ចាត់សាដាមអូសេនកាលពីឆ្នាំ២០០៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ