អ៊ីរ៉ង់ថាការដែលអាមេរិកបន្ថែមទ័ពទៅតំបន់មជ្ឈិមបូព៌ាជាការគំរាមកំហែងសន្តិសុខ និងសន្តិភាពអន្តរជាតិ
នៅថ្ងៃសុក្រ ទី២៤ ឧសភា រដ្ឋបាលអាមេរិកបានប្រកាសពីការបញ្ជូនកម្លាំងទ័ពបន្ថែមចំនួន ១ ៥០០នាក់ទៅកាន់តំបន់មជ្ឈិមបូព៌ា។ ការសម្រេចយ៉ាងដូចនេះត្រូវបានអាមេរិកលើកយកហេតុផលទៅពន្យល់ថា ដើម្បីប្រឈមទប់នឹងកំណែនគំរាមកំហែងប្រឆាំងនឹងទ័ពអាមេរិកក្នុងតំបន់ពីសំណាក់ប្រទេសអ៊ីរ៉ង់។ តែទីក្រុងតេហេរ៉ង់បានបញ្ចេញប្រតិកម្មតបវិញក្នុងថ្ងៃសៅរ៍ ទី២៥ ឧសភាថា កំណើនទ័ពអាមេរិកនៅក្នុងតំបន់ជារឿងគ្រោះថ្នាក់ខ្លាំង និងកំពុងបង្កការគំរាមកំហែងសម្រាប់សន្តិសុខ និងសន្តិភាពអន្តរជាតិ។
ចុះផ្សាយនៅថ្ងៃ៖
ស្តាប់ - ០២:៣៤
ការបញ្ជូនទ័ពអាមេរិកបន្ថែមចំនួន ១ ៥០០នាក់ទៅកាន់តំបន់មជ្ឈិមបូព៌ាត្រូវបានបញ្ជាក់ជាផ្លូវការដោយលោកដូណាល់ ត្រាំពីសេតវិមាន មុននឹងលោកចេញដំណើរទៅបំពេញទស្សនកិច្ចផ្លូវរដ្ឋរយៈពេល ៤ថ្ងៃក្នុងប្រទេសជប៉ុន។ បន្ទាប់មក រដ្ឋមន្រ្តីការពារជាតិអាមេរិកលោក Patrick Shanahan បានបញ្ជាក់នៅក្នុងសេចក្តីប្រកាសព័ត៌មានមួយថា គោលដៅនៃការបន្ថែមទ័ពអាមេរិកទៅក្នុងតំបន់គឺដើម្បីបង្កើនការការពារ និងសុវត្ថិភាពកម្លាំងទ័ពអាមេរិកប្រឈមទប់នឹងការគំរាមកំហែងជាវិជ្ជមានរបស់ប្រទេសអ៊ីរ៉ង់។ ចំណែកអ្នកទទួលខុសត្រូវម្នាក់នៅសេនាធិការដ្ឋានអាមេរិកបានលំអិតបន្ថែមថា ក្នុងចំនួនទ័ពបន្ថែមទាំង ១ ៥០០នាក់មាន ៦០០នាក់បញ្ជូនទៅកាន់ទីតាំងខែលមីស៊ីលប្រឆាំងមីស៊ីល Patriot ចំនួន ៤ នៅក្នុងតំបន់ ហើយ ៩០០នាក់បញ្ជូនទៅកាន់មូលដ្ឋានទ័ពអាមេរិកផ្សេងដោយមិនបានប្រាប់ឈ្មោះមូលដ្ឋានទ័ពនោះទេ។
ទន្ទឹមនឹងបន្ថែមចំនួនទ័ពក៏មានការបញ្ជូនបន្ថែមនូវឧបករណ៍ឈ្លបយកការណ៍ និងឃ្លាំមើល រួមទាំងយន្តហោះចម្បាំងចំនួន ១២គ្រឿង។ សូមរម្លឹកថាសព្វថ្ងៃ អគ្គបញ្ជាការដ្នានរបស់អាមេរិកឈ្មោះ Centcom ដែលទទួលបន្ទុកនៅមជ្ឈិមបូព៌ា និងអាស៊ីកណ្តាលមួយភាគមានចំនួនទ័ព ៧០ ០០០នាក់ ក្នុងនោះមាន ១៤ ០០០នាក់កំពុងឈរជើងលើទឹកដីអាហ្វហ្កានីស្ថាន ៥ ២០០នាក់នៅអ៊ីរ៉ាក់ និងតិចជាង ២ ០០០នាក់ក្នុងប្រទេសស៊ីរី។ តែការបញ្ជូនទ័ពបន្ថែមចំនួន ១ ៥០០នាក់ពេលនេះមិនទាក់ទងនឹងស៊ីរី ឬអ៊ីរ៉ាក់ទេ នេះជាការបញ្ជាក់របស់រដ្ឋអនុរដ្ឋមន្រ្តីការពារជាតិអាមេរិកទទួលបន្ទុកសន្តិសុខអន្តរជាតិ។
ក្រៅពីការបញ្ជូនកម្លាំងទ័ពបន្ថែម រដ្ឋបាលអាមេរិកក៏បានប្រកាសឲ្យដឹងពីគម្រោងលក់អាវុធជាថ្មីទៅឲ្យប្រទេសអារ៉ាប៊ីសាអូឌីតដែលជាសត្រូវស៊ីសាច់ហុចឈាមរបស់អ៊ីរ៉ង់ និងប្រទេសអេមីរ៉ាតអារ៉ាប់រួម។ ដើម្បីកុំឲ្យសភាដែលគណបក្សប្រឆាំងមានសម្លេងភាគច្រើនរារាំងលើគម្រោងនេះបាន រដ្ឋបាលលោកត្រាំបានលើកយកហេតុផលពីការគំរាមកំហែងរបស់ប្រទេសអ៊ីរ៉ង់។ យ៉ាងណាក៏ដោយនៅថ្ងៃសៅរ៍ ទី២៥ ឧសភា អ៊ីរ៉ង់បានបញ្ចេញប្រតិកម្មបរិហារលើទង្វើរបស់រដ្ឋបាលអាមេរិក។ « កំណើនវត្តមានទ័ពអាមេរិកនៅក្នុងតំបន់របស់យើងជារឿងគ្រោះថ្នាក់ខ្លាំង និងបង្កការគំរាមកំហែងលើសន្តិសភាព និងសន្តិសុខអន្តរជាតិដែលគេត្រូវចាត់វិធានការទប់ទល់ » នេះជាសម្តីបង្កប់ដោយការព្រមានពីប្រមុខការទូតអ៊ីរ៉ង់លោកយ៉ាវ៉ា ហ្សារីស្វនាឱកាសនៃការបំពេញទស្សនកិច្ចក្នុងប្រទេសប៉ាគីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ