ហេតុអ្វីបានជាអ៊ីរ៉ាក់ទើសទាល់ចិត្តខ្លាំងម្ល៉េះនៅចំពោះមុខកំណើនតានតឹងខ្លាំងរវាងអ៊ីរ៉ង់ និងអាមេរិក?
ចុះផ្សាយនៅថ្ងៃ៖
ស្តាប់ - ០៤:៤០
រហូតដល់ពេលនេះ កំណើនតានតឹងខ្លាំងរវាងអាមេរិក និងប្រទេសអ៊ីរ៉ង់ហាក់មានត្រឹមកម្រិតសង្រ្គាមពាក្យសម្តី និងការបង្ហាញសាច់ដុំដាក់គ្នា។ ក្រុងវ៉ាស៊ីនតោន និងក្រុងតេហេរ៉ង់សុទ្ធតែបានអះអាងម្តងជាពីរដងថា ខ្លួនមិនចង់ធ្វើសង្រ្គាមជាមួយគ្នាឡើយ។ គេមិនដឹងថា តើអំណះអំណាងមួយនេះជាឆន្ទៈពិតរបស់ភាគីជម្លោះទាំងពីរ ឬអត់ទេ។ អ្វីដែលគេដឹង មានប្រទេសផ្សេងកំពុងចាក់គូទអាមេរិកឲ្យធ្វើសង្រ្គាមជាមួយអ៊ីរ៉ង់ដើម្បីប្រយោជន៍ផ្ទាល់ខ្លួន។ សម្រាប់ក្រុមអ្នកវិភាគ ទោះបីជាមាន ឬគ្មានសង្រ្គាមជាចំហរវាងអាមេរិក និងអ៊ីរ៉ង់ក៏ដោយ ក៏ប្រទេសអ៊ីរ៉ាក់ក្បែរខាងកំពុងរងគ្រោះនៅក្នុងជម្លោះរវាងគូសត្រូវទាំងពីរ។ តើនេះមកពីមូលហេតុអ្វីទៅ?
បន្ទាប់ពីបានរងគ្រោះដោយគ្រាប់បែក គ្រាប់មីស៊ីលអាមេរិក និងក្រោយពីបានភ្លក់រសជាតិជម្លោះផ្ទៃក្នុង រួមទាំងការប្រឈមមុខទល់នឹងពួកជីហាតអង្គការរដ្ឋអ៊ីស្លាមអស់ជាច្រើនឆ្នាំមក អ៊ីរ៉ាក់ហាក់កំពុងក្លាយជាសមរភូមិសង្រ្គាមនៃការប្រឈមមុខដាក់គ្នារវាងអ៊ីរ៉ង់ និងអាមេរិក។ តែគេមិនត្រូវភ្លេចនិយាយទេថាសព្វថ្ងៃនេះ រវាងអ៊ីរ៉ង់ និងអ៊ីរ៉ាក់គឺជាមិត្តនឹងគ្នា ហើយរវាងអ៊ីរ៉ាក់ និងអាមេរិកក៏ជាមិត្តនឹងគ្នាដែរ។ ចុះបើសុទ្ធតែជាមិត្តទាំងអស់គ្នា តើគួរត្រូវធ្វើដូចម្តេច?។ នេះហើយជាសំណួរដែលរដ្ឋាភិបាលទីក្រុងបាកដាដត្រូវរកចម្លើយមួយឲ្យមានសមភាពដោយមិនត្រូវធ្វើឲ្យភាគីណាមួយអាក់អន់ ស្រពន់ចិត្តចំពោះខ្លួនទេ។ ក្រោមភ្នែកច្រមុះរបស់អ៊ីរ៉ាក់ អ៊ីរ៉ង់បានដើរតួនាទីសំខាន់ណាស់នៅក្នុងយុទ្ធនាការប្រឆាំងនឹងពួកជីហាតអង្គការរដ្ឋអ៊ីស្លាមដោយបានជួយគាំទ្រដល់ក្រុមប្រដាប់អាវុធអ៊ីរ៉ាក់ឈ្មោះ Hachd al-Chaabi។
នៅក្នុងទំនាក់ទំនងសេដ្ឋកិច្ច និងពាណិជ្ជកម្ម អ៊ីរ៉ង់ជាដៃគូមួយយ៉ាងសំខាន់ដែលទំហំទឹកប្រាក់នៃការដោះដូរជាមួយអ៊ីរ៉ាក់ក្នុង១ឆ្នាំៗមានដល់ទៅ ១ ២០០លានដុល្លារ។ តម្រូវការឧស្ម័ន និងភ្លើងអគ្គិសនីមួយភាគរបស់អ៊ីរ៉ាក់ត្រូវបានអ៊ីរ៉ង់ជាអ្នកផ្គត់ផ្គង់ឲ្យ។ ជាមួយអាមេរិកវិញ ក្រៅពីត្រូវការជំនួយកម្លាំងទ័ព និងការគាំទ្រនៅក្នុងយុទ្ធនាការកំចាត់ពួកជីហាតអង្គការរដ្ឋអ៊ីស្លាម អ៊ីរ៉ាក់ក៏ត្រូវការអាមេរិកនៅក្នុងវិស័យប្រេងឥន្ធនៈ ពិសេសការធ្វើអាជីវកម្មលើអណ្តូងប្រេងឆៅ និងការបង្កើនផលិតកម្មប្រេង។ តែរដ្ឋាភិបាលទីក្រុងបាកដាដពិតជាយល់មិនច្រឡំទេថាបន្តិចម្តងៗ រដ្ឋបាលក្រុងវ៉ាស៊ីនតោនបានព្យាយាមបង្វែរពីកម្មវត្ថុប្រឆាំងនឹងពួកជីហាតអង្គការរដ្ឋអ៊ីស្លាមទៅជាកម្មវត្ថុប្រឆាំងនឹងឥទ្ធិពលរបស់អ៊ីរ៉ង់នៅក្នុងតំបន់វិញម្តង។
ចំណែកអ៊ីរ៉ង់វិញក៏យល់មិនច្រឡំដែរចំពោះបញ្ហានេះ និងកំពុងរងចាំមើលជំហររបស់អ៊ីរ៉ាក់។ តែដោយចង់ចូលរួមកាត់បន្ថយភាពតានតឹង និងមិនចង់ឃើញទឹកដីអ៊ីរ៉ាក់ក្លាយជាសមរភូមិប្រយុទ្ធរវាងអ៊ីរ៉ង់ និងអាមេរិក រដ្ឋាភិបាលក្រុងបាកដាដហាក់គ្មានជម្រើសអ្វីផ្សេងក្រៅពីធ្វើជាអាជ្ញាកណ្តាលដើម្បីព្យាយាមសម្របសម្រួល និងបញ្ចៀសការផ្ទុះសង្រ្គាម។ នៅក្នុងន័យនេះ នាយករដ្ឋមន្រ្តីអ៊ីរ៉ាក់លោកអាឌែល អាប់ឌែល ម៉ាឌីបានប្រកាសពីការបញ្ជូនគណៈប្រតិភូអ៊ីរ៉ាក់ទៅកាន់អ៊ីរ៉ង់ និងអាមេរិក។ គួររម្លឹកថា តាំងពីលោកត្រាំបានដកអាមេរិកចេញពីកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ តាំងពីលោកត្រាំដាក់ទណ្ឌកម្មសេដ្ឋកិច្ចជាថ្មីលើអ៊ីរ៉ង់ និងតាំងពីលោកត្រាំបានពង្រឹងកម្លាំងទ័ព រួមទាំងគ្រឿងសព្វាវុធនៅក្នុងតំបន់ឈូងសមុទ្រពែក្សមក ហានិភ័យនៃការផ្ទុះសង្រ្គាមរវាងសត្រូវទាំងពីរកំពុងកើនខ្លាំងជាងពេលណាៗទាំងអស់។
តែអាមេរិក និងអ៊ីរ៉ង់ដែលនៅបន្តអះអាងពីការមិនចង់មានសង្រ្គាមជាមួយគ្នាបានយល់ឃើញដូចគ្នាថា បើសង្រ្គាមផ្ទុះមែន នោះវានឹងធ្វើឲ្យប្រទេសទាំងពីរខាតបង់ និងអន្តរាយដូចគ្នា។ អ៊ីចឹងសួរថា តើការបាញ់គ្រាប់រ៉ូកែតកាលពីថ្ងៃអាទិត្យ ទី១៩ ឧសភាចូលតំបន់បៃតងក្នុងទីក្រុងបាកដាដដែលមានវត្តមានស្ថានទូតអាមេរិកនៅទីនោះជាស្នាដៃរបស់អ្នកណា?។ អាមេរិកបានចោទលើក្រុមប្រដាប់អាវុធអ៊ីរ៉ាក់ដែលគាំទ្រដោយអ៊ីរ៉ង់ តែទង្វើដែលនៅមិនទាន់មានអ្នកណាចេញមុខសារភាពមួយនេះត្រូវបានគ្រប់ក្រុមប្រដាប់អាវុធអ៊ីរ៉ាក់ទាំងអស់ដែលគាំទ្រដោយអ៊ីរ៉ង់ច្រានចោលយ៉ាងដាច់អហង្ការ។ បើតាមក្រុមអ្នកវិភាគ អ្នកដែលបានប្រព្រឹត្តទង្វើមួយនេះមិនមែនអ៊ីរ៉ង់ ហើយក៏មិនមែនអាមេរិកដែរ តែជាអ្នកផ្សេងដែលចង់រុញអ៊ីរ៉ង់ និងអាមេរិកឲ្យផ្ទុះសង្រ្គាមដាក់គ្នាដើម្បីប្រយោជន៍ និងបុព្វហេតុផ្ទាល់ខ្លួនទៅវិញទេ។
អ្នកផ្សេងដែលគេបានសម្លឹងឃើញនោះមានពីរ ទី១ គឺអ៊ីស្រាអែលដែលជាសម្ព័ន្ធមិត្តរបស់អាមេរិក និងជាសត្រូវស៊ូពូជរបស់អ៊ីរ៉ង់ ហើយទី២ គឺអារ៉ាប៊ីសាអូឌីតដែលជាសម្ព័ន្ធមិត្តរបស់អាមេរិក និងជាគូប្រជែងស្លាប់រស់នៅក្នុងតំបន់របស់អ៊ីរ៉ង់។ តាមពិតទៅ ជំហរប្រឆាំងអ៊ីរ៉ង់គ្មានថ្ងៃអវសានរបស់អ៊ីស្រាអែល និងអារ៉ាប៊ីសាអូឌីតមិនមែនជារឿងថ្មីទេ។ អ្វីដែលថ្មី គឺអ៊ីស្រាអែល និងអារ៉ាប៊ីសាអូឌីតចង់ឆ្លៀតឱកាសនៃការដំឡើងសរសែ ក ដាក់គ្នារវាងអ៊ីរ៉ង់ និងអាមេរិកពេលនេះដើម្បីជម្រះបញ្ជីចាស់ជាមួយអ៊ីរ៉ង់ឲ្យដាច់ស្រឡះ។ តែគេមិនត្រូវភ្លេចនិយាយទេថា បើសង្រ្គាមរវាងអ៊ីរ៉ង់ និងអាមេរិកត្រូវផ្ទុះដោយចៀសមិនរួច គឺតំបន់ដើមបូព៌ាទាំងមូលដែលត្រូវធ្លាក់ក្នុងភ្លើងសង្រ្គាមដោយគ្មានប្រទេសណាមួយរួចខ្លួនឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ