រដ្ឋអាជ្ញាពិសេសដែលធ្លាប់ធ្វើឱ្យលោកត្រាំព្រួយ ចេញថ្លែងជាសាធារណៈ
លោក Robert Mueller រដ្ឋអាជ្ញាពិសេសទទួលបន្ទុកអង្កេតសំណុំរឿងសង្ស័យរុស្ស៊ីចូលលូកដៃក្នុងការបោះឆ្នោតប្រធានាធិបតីអាមេរិក ជួយក្រុមលោកដូណាល់ត្រាំ កាលពីឆ្នាំ២០១៦ បានចេញមុខ ថ្លែងជាសាធារណៈជាលើកទីមួយ នៅថ្ងៃទី ២៩ ឧសភា ២០១៩។ សម្រាប់លោករដ្ឋអាជ្ញា ទោះបីជាគេមានការសង្ស័យច្រើនមែន តែគេមិនអាចធ្វើការចោទប្រកាន់លោក ដូណាល់ត្រាំ បានឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ក្នុងរយៈពេល២២ខែ អតីតមេដឹកនាំចារកិច្ចFBI បានដឹកនាំការអង្កេត ដោយស្ងប់ស្ងាត់ ឆ្ងាយពីកាមេរ៉ា ឬក្បាលមីក្រូ និងក្រសែភ្នែករបស់សាធារណជន។ លោកតែងផ្តល់ព័ត៌មាន ឬបញ្ចេញមតិ តាមរយៈតែសំណេរប៉ុណ្ណោះ។ លោកបានចេញសេចក្តីសន្និដ្ឋានបញ្ចប់ការអង្កេត កាលពីចុងខែមីនា នូវឯកសារកម្រាស់៤០០ទំព័រ និងចេញផ្សាយ ដោយកែលុបចោលនូវរាល់ទិន្នន័យជាការសម្ងាត់ជាតិ នៅថ្ងៃទី១៨មេសា២០១៩។ ហើយនៅថ្ងៃពុធម្សិលមិញនេះ លោកបានថ្លែងជាសាធារណៈ សង្ខេបអំពីខ្លឹមសារគោលនៃសេចក្តីសន្និដ្ឋានអង្កេតថា ៖ មានការប្រឹងចូលជាជ្រៀតជ្រែងជាច្រើននិងជាស្វ័យប្រវត្តិ ក្នុងសម័យបោះឆ្នោតប្រធានាធិបតីអាមេរិកឆ្នាំ២០១៦។
ប៉ុន្តែ ទោះបីជារកឃើញមានចំណងជាច្រើនរវាងរុស្ស៊ីជាមួយសមាជិកក្រុមឃោសនារបស់បេក្ខជនប្រធានាធិបតីបក្សសាធារណរដ្ឋមែនក៏ដោយ ក៏លោករដ្ឋអាជ្ញាពិសេសយល់ថាគ្មានភស្តុតាងគ្រប់គ្រាន់បញ្ជាក់អំពីភាពត្រូវរ៉ូវគ្នានៃភាគីទាំងពីរដែរ។
មានអាយុ៧៤ឆ្នាំ លោករដ្ឋអាជ្ញា Robert Mueller បានគូសបញ្ជាក់ទៀតថា លោកនឹងមិនអញ្ជើញទៅធ្វើសក្ខីកម្មនៅចំពោះមុខសភាទេ ទោះបីជាបក្សប្រជាធិបតេយ្យចង់បានយ៉ាងណាក៏ដោយ ហើយលោកបានប្រកាសលាលែងពីតួនាទីនិងការងារនៅក្រសួងយុត្តធម៌ ដើម្បីមានជីវិតរស់នៅជាជនសាមញ្ញវិញ។
ទាក់ទងនឹងការចោទប្រកាន់សង្ស័យថាប្រធានាធិបតីត្រាំ រារាំងតុលការមិនឱ្យធ្វើអង្កេតត្រឹមត្រូវវិញ លោករដ្ឋអាជ្ញាពិសេសមិនអារកាត់សេចក្តីទេ ដោយសុំប្រគល់ភារកិច្ចទៅឱ្យសភាជាអ្នកសម្រេច។ លោកបានពន្យល់ការពារខ្លួនថា “ប្រធានាធិបតីដែលកំពុងកាន់អំណាចមិនត្រូវរងការប្តឹងផ្តល់ចំពោះបទល្មើសអ្វីទេ គឺជាទង្វើផ្ទុយនឹងរដ្ឋធម្មនុញ្ញ។” រដ្ឋធម្មនុញ្ញមានចែងអំពីដំណើរការចោទប្រកាន់ ប្រធានាធិបតីកំពុងកាន់អំណាច ក្រៅប្រព័ន្ធតុលាការ។ ពោលគឺបែបបទចង់ទម្លាក់ប្រធានាធិបតី« impeachment » ត្រូវធ្វើនៅសភា។
ដោយគ្មានបង្អង់ ក្រុមអ្នកប្រជាធិបតេយ្យ បានសេចក្តីថ្លែងការណ៍បែបខឹងសម្បារភ្លាម ថា”ដោយរដ្ឋអាជ្ញាមិនអាចរៀបដំណើរការនីតិវិធីប្រឆាំងនឹងប្រធានាធិបតី ដូច្នេះត្រូវជាភារៈរបស់សភា” ! នៅអាមេរិក គ្មាននរណាអង្គុយលើច្បាប់ទេ។ ប៉ុន្តែអ្នកប្រជាធិបតេយ្យមិនបានបញ្ជាក់ឱ្យច្បាស់លាស់អំពីការចាប់ផ្តើមដាក់សំណុំបែបបទទម្លាក់ប្រធានាធិបតីទេ។
សមាជិកបក្សចង់ដាក់ឱ្យដំណើរការបែបបទសុំទម្លាក់ប្រធានាធិបតី ប៉ុន្តែមេដឹកនាំបក្សខ្លាចមិនបានសម្រេច ព្រោះគណបក្សសាធារណរដ្ឋមានសំឡេងភាគច្រើននៅព្រឹទ្ធសភា ហើយមកបាំងប្រធានបទផ្សេងៗក្នុងសម័យឃោសនាបោះឆ្នោតប្រធានាធិបតីឆ្នាំ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ