UNHCR៖មានចំនួនជនភៀសខ្លួន ជនបម្លាស់ទី និងជនសុំសិទ្ធិជ្រកកោនសរុបជាង ៧០លាននាក់លើលោកក្នុងឆ្នាំ ២០១៨
ចុះផ្សាយនៅថ្ងៃ៖
ស្តាប់ - ០៦:២៩
នៅថ្ងៃពុធ ទី១៩ មិថុនា ឧត្តមស្នងការដ្ឋានអង្គការសហប្រជាជាតិទទួលបន្ទុកជនភៀសខ្លួន UNHCR បានផ្សព្វផ្សាយរបាយការណ៍ប្រចាំឆ្នាំស្តីពីស្ថានភាពជនភៀសខ្លួន ជនបម្លាស់ទី និងជនសុំសិទ្ធិជ្រកកោន ក្នុងលោកសម្រាប់ឆ្នាំ ២០១៨។ របាយការណ៍បានបង្ហាញថា មានមនុស្សជាង ៧០លាននាក់បានភៀសខ្លួនចេញពីប្រទេស បានប្តូរកន្លែងរស់នៅក្នុងប្រទេស និងបានសុំសិទ្ធិជ្រកកោន។ បើធៀបនឹងឆ្នាំ ២០១៧ គឺមានការកើនឡើងចំនួន ២លាន ៣សែននាក់។ តាម UNHCR ឆ្នាំ ២០១៨ ជាឆ្នាំដែលមានចំនួនជនភៀសខ្លួន ជនបម្លាស់ទី និងជនសុំសិទ្ធិជ្រកកោនច្រើនជាងគេមិនធ្លាប់មាន គិតតាំងពីថ្ងៃបង្កើត UNHCR ជិត ៧០ឆ្នាំកន្លងទៅ។ ខុសពីក្តីរំពឹងទុក ក្រុមប្រទេសដែលបានទទួលជនភៀសខ្លួនឲ្យជ្រកកោនច្រើនជាងគេមិនមែនជាក្រុមប្រទេសអភិវឌ្ឍទេ តែជាក្រុមប្រទេសកំពុងអភិវឌ្ឍ។
នៅក្នុងតួលេខទាំង ៧០ ៨០០ ០០០នាក់ត្រូវបាន UNHCR ចែកចេញជា៣ ក្រុមមនុស្សប្រុស ស្រីក្នុងនោះ មានជនភៀសខ្លួនចំនួន ២៥ ៩០០ ០០០នាក់ ជនបម្លាស់ទីចំនួន ៤១ ៣០០ ០០០នាក់ និងជនសុំសិទ្ធិជ្រកកោនចំនួន ៣ ៥០០ ០០០នាក់។ បើធៀបនឹងឆ្នាំ ២០១៧ គឺមានការកើនឡើងចំនួន ២លាន ៣សែននាក់។ តាម UNHCR ឆ្នាំ ២០១៨ ជាឆ្នាំដែលចំនួនជនភៀសខ្លួន ជនបម្លាស់ទី និងជនសុំសិទ្ធិជ្រកកោនមានអត្រាខ្ពស់មិនធ្លាប់មានគិតតាំងថ្ងៃបង្កើត UNHCR ជិត ៧០ឆ្នាំកន្លងទៅ ហើយសន្ទុះកំណើនជាបន្តបន្ទាប់នេះបានចាប់ផ្តើមតាំងពីឆ្នាំ ២០០៩។
លោកហ្វីលីបប៉ូ ហ្រ្គង់ឌី ឧត្តមស្នងការ UNHCR បាននិយាយដោយមិនលាក់លៀមថា ពិភពលោកកំពុងធ្វើដំណើរនៅលើផ្លូវដ៏អាក្រក់ និងបានអំពាវនាវដល់ក្រុមប្រឹក្សាសន្តិសុខឲ្យរួមគ្នាជួយទប់ស្កាត់។ ក៏ដូចជាក្នុងឆ្នាំ ២០១៧ ដែរ ជនភៀសខ្លួន ជនបម្លាស់ទី និងជនសុំសិទ្ធិជ្រកកោនភាគច្រើនជាជនជាតិវ៉េណេស៊ុយអេឡា អេត្យូពី នីហ្សេរីយ៉ា ស៊ីរី និងពួករ៉ូហ៊ីងយ៉ានៅក្នុងប្រទេសភូមា។
ដើមចមនៃកំណើនជនភៀសខ្លួន ជនបម្លាស់ទី និងជនសុំសិទ្ធិជ្រកកោនក្នុងលោក
មានហេតុផលខុសគ្នារវាងជនជនភៀសខ្លួន ជនបម្លាស់ទី និងជនសុំសិទ្ធិជ្រកកោន។ គួរបញ្ជាក់ថា ក្រុមជនភៀសខ្លួនជាក្រុមមនុស្សដែលបានរត់ចេញពីប្រទេសរបស់ខ្លួនដោយសារជម្លោះប្រដាប់អាវុធ សង្រ្គាម ឬមួយការធ្វើទុកបុកម្នេញ។ ចំណែកក្រុមជនបម្លាស់ទីជាក្រុមមនុស្សដែលបានរត់ពីតំបន់មួយទៅកាន់តំបន់មួយទៀតក្នុងប្រទេសដោយហេតុផលនយោបាយ សាសនា សង្គម ជាតិពិន្ធុ មនុស្សធម៌ ឬមួយក៏អាកាសធាតុ។ រីឯក្រុមជនសុំសិទ្ធិជ្រកកោនជាក្រុមមនុស្សដែលកំពុងស្ថិតនៅក្រៅប្រទេសកំណើតរបស់ខ្លួន ហើយកំពុងរង់ចាំចម្លើយនៃការសុំសិទ្ធិជ្រកកោនរបស់ខ្លួន។ ក្នុងពេលរងចាំនេះ និងតាមធម្មតា ពួកគេទទួលបានការគាំពារពីអន្តរជាតិដូចជនភៀសខ្លួន។
ស៊ីរីដែលបានធ្លាក់ក្នុងវិបត្តិហែកហួរផ្ទៃក្នុងជិត ១០ឆ្នាំកំពុងបន្តជាប្រទេសទី១ ដែលមានពលរដ្ឋយ៉ាងច្រើនសម្បើមបង្ខំចិត្តភៀសខ្លួនចេញពីប្រទេស។ នៅនីហ្សេរីយ៉ា ពលរដ្ឋភាគច្រើនបានប្តូរកន្លែងរស់នៅពីតំបន់មួយទៅកាន់តំបន់មួយទៀតដើម្បីគេចពីអំពើហិង្សា។ ករណីស្រដៀងគ្នានេះក៏កើតមាននៅក្នុងប្រទេសអេត្យូពីដែលពលរដ្ឋបានធ្វើបម្លាស់ទីក្នុងស្រុកដើម្បីគេចពីអំពើហិង្សាសហគមន៍។ ដោយឡែកនៅក្នុងប្រទេសវ៉េណេស៊ុយអេឡា UNHCR ហាក់មានការប្រយ័ត្នប្រយែងខ្លាំង ព្រោះពលរដ្ឋប្រមាណជា ៤លាននាក់ដែលបានរត់ភៀសខ្លួនដោយហេតុផលសេដ្ឋកិច្ចទៅជ្រកកោននៅប្រទេសជិតខាង និងដែលពួកគេត្រូវទទួលបានការគាំពារពីអន្តរជាតិដូចជនភៀសខ្លួនដែរនោះ មានមិនដល់កន្លះលាននាក់ផងដែលបានដាក់ពាក្យសុំសិទ្ធិជ្រកកោន។
តាមរបាយការណ៍របស់ UNHCR ចំនួនជនភៀសខ្លួនទាំង ២៦លាននាក់ក្នុងឆ្នាំ ២០១៨ មានពាក់កណ្តាលជាកូនកូនក្មេង ហើយក្នុងចំណោមកូនក្មេងទាំងអស់នោះ មាន ១១១ ០០០នាក់គ្មានឱពុក និងគ្មានម្តាយទេ។
តួកគីជាប្រទេសដែលបានទទួលជនភៀសខ្លួនច្រើនជាងគេក្នុងរយៈពេល ៤ឆ្នាំជាប់គ្នា
តាមរបាយការណ៍ប្រចាំឆ្នាំរបស់ UNHCR មានជនភៀសខ្លួនចំនួន ៤នាក់ក្នុងចំណោម ៥នាក់កំពុងជ្រកកោននៅក្នុងប្រទេសក្បែរ ហើយជនភៀសខ្លួនភាគច្រើនកំពុងរស់នៅក្នុងបណ្តាប្រទេសកំពុងអភិវឌ្ឍ។ ជាក់ស្តែងក្នុងឆ្នាំ ២០១៨ ជនភៀសខ្លួនស៊ីរីភាគច្រើនបានដាក់ពាក្យសុំសិទ្ធិជ្រកកោននៅក្នុងប្រទេសតួកគី។ ចំណែកកូឡុំប៊ី និងប៉េរូជាប្រទេសដំបូងគេដែលបានទទួលជនភៀសខ្លួនវ៉េណេស៊ុយអេឡាឲ្យជ្រកកោន។ ដោយឡែក ប្រទេសដែលទទួលបានពាក្យសុំសិទ្ធិជ្រកកោនច្រើនជាងគេក្នុងឆ្នាំ ២០១៨ មានអាមេរិក ប៉េរូ អាល្លឺម៉ង់ បារាំង និងប្រទេសតួកគី។ តួកគីជាប្រទេសដែលបានទទួលជនភៀសខ្លួនច្រើនជាងគេក្នុងលោកក្នុងរយៈពេល ៤ឆ្នាំជាប់គ្នា។ ជាក់ស្តែងក្នុងឆ្នាំ ២០១៨ តួកគីបានទទួលជនភៀសខ្លួនចំនួន ៣ ៧០០ ០០០នាក់ឲ្យជ្រកកោនលើទឹកដីរបស់ខ្លួន។ បន្ទាប់មកមានប្រទេសប៉ាគីស្ថាន អ៊ូហ្កង់ដា ស៊ូដង់ និងប្រទេសអាល្លឺម៉ង់។
ឧត្តមស្នងការ UNHCR លោកហ្វីលីបប៉ូ ហ្រ្គង់ឌីបានបញ្ជាក់ថា លោកគ្មានទម្លាប់ឲ្យពិន្ទុប្រទេសនេះ ឬប្រទេសនោះក្នុងរឿងទទួលជនភៀសខ្លួនឲ្យជ្រកកោនទេ តែលោកមិនអាចមិនសរសើរអាល្លឺម៉ង់បានឡើយ ពិសេសសេចក្តីក្លាហានរបស់នាយករដ្ឋមន្រ្តីលោកស្រីមែរកិល។ ទន្ទឹមគ្នានេះ លោកហ្វីលីបប៉ូក៏ឆ្លៀតអំពាវនាវឲ្យអឺរ៉ុបស្វែងរកដំណោះស្រាយមួយយូរអង្វែងក្នុងការចែកគ្នាទទួលជនអន្តោប្រវេសន៍តាមសមុទ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ