ភាគីជម្លោះនៅវ៉េណេស៊ុយអេឡានឹងជួបចរចាគ្នាជាលើកទី៣ នៅកោះ ការ៉ាអ៊ីប
រដ្ឋាភិបាលវ៉េណេស៊ុយអេឡានឹងជួបចរចាជាលើកទី៣ ជាមួយ ក្រុមប្រឆាំង ដឹកនាំដោយលោក ហ័ន ហ្កៃដូ នៅប្រទេសកោះ ការ៉ាអ៊ីប La Barbade នៅសប្តាហ៍នេះ។ ជាការចរចាលើកទី៣ នៅដំណើរស្វែងរកដំណោះស្រាយសម្រាប់វិបត្តិនយោបាយនៅវ៉េណេស៊ុយអេឡា ដែលចាប់ផ្តើម តាំងពីខែឧសភា នៅប្រទេសន័រវែស។ តើជំនួបចរចាជាលើកទី ៣ រវាងភាគីជម្លោះ នឹងអាចជួយទៅបិទបញ្ចប់វិបត្តិនយោបាយ នៅវ៉េណេសុយអេឡាបានដែរឬទេ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៦
អ្នកតំណាងរដ្ឋាភិបាលវ៉េណេស៊ុយអេឡា នឹងជួបចរចា សាជាថ្មី ជាមួយ ក្រុមប្រឆាំង បន្ទាប់ពីការចរចាពីរលើក នៅទីក្រុងអូស្លូ ប្រទេសន័រវែស កាលពីខែ ឧសភាកន្លងទៅ គ្មានបានផ្តល់លទ្ធផលអ្វីទាល់តែសោះ។
នៅសប្តាហ៍មុន នៅក្រោយមេទាហានម្នាក់ ដែលរដ្ឋាភិបាលចាប់ខ្លួនក្នុងបទប៉ុនប៉ងធ្វើរដ្ឋប្រហារមិនបានសម្រេច ស្លាប់នៅក្នុងពន្ធនាគារ មេដឹកនាំក្រុមប្រឆាំង លោកហ័ន ហ្កៃដូបានបដិសេធថា នឹងគ្មានការចរចាជាលើកទី ៣ជាមួយរដ្ឋាភិបាលរបស់លោកនីកូឡា ម៉ាឌូរ៉ូ ដែលលោកចាត់ទុកជាមេដឹកនាំលួចអំណាច និងផ្តាច់ការ។
ប៉ុន្តែ សម្រាប់នយោបាយវិទូ មេដឹកនាំក្រុមប្រឆាំង លោកហ័ន ហ្កៃដូ មិនអាចយកឈ្នះ ផ្តួចអំណាច របស់លោកនីកូឡា ម៉ាឌូរ៉ូបានទេ នោះបើទោះបីជាមានជំនួយពីអាមេរិកក្តី។ ក្រុមប្រឆាំង ត្រូវរកគន្លឹះ យន្តការថ្មីដើម្បីធ្វើយ៉ាងណាឲ្យមានការបោះឆ្នោត មុនកាលកំណត់។
នៅក្នុងសេចក្តីថ្លែងការណ៍ចេញផ្សាយនៅថ្ងៃអាទិត្យ លោកហ័ន ហ្កៃដូបានអះអាងថា ជំនួប ចរចាជាមួយអ្នកតំណាង រដ្ឋាភិបាល នឹងជួយឲ្យវ៉េណេស៊ុយអេឡាចាកចេញពីរបបផ្តាច់ការ។ តាមមេបក្សប្រឆាំងវ៉េណេស៊ុយអេឡា ការចរចាជាលើកទី៣នៅប្រទេសកោះការ៉ាអ៊ីប La Barbade មានគោលដៅបីធំគឺ ការចុះចេញពីតំណែងរបស់លោកនីកូឡា ម៉ាឌូរ៉ូ ការបង្កើតរដ្ឋាភិបាលអន្តរកាល ហើយនិងការរៀបចំបោះឆ្នោតសេរី ដែលមានការចូលរួមពីអ្នកសង្កេតការណ៍អន្តរជាតិ។
លោកហ័ន ហ្កៃដូ ដែលចោទប្រកាន់លោកប្រធានាធិបតី ម៉ាឌូរ៉ូ ថា បានលួចបន្លំ សន្លឹកឆ្នោត នៅឆ្នាំ ២០១៨ បានប៉ុនប៉ង ផ្តួលអំណាចរបស់ប្រធានាធិបតី តាំងពីដើមឆ្នាំ នេះ តាមរយៈចលនាប្រឆាំងតាមផ្លូវ ហើយនិង រដ្ឋប្រហារមិនបានសម្រេច។
លោកប្រធានាធិបតីនីកូឡា ម៉ាឌូរ៉ូ វិញ បានអះអាងជាច្រើនលើក ចង់ជួបចរចាជាមួយក្រុមប្រឆាំង ប៉ុន្តែ អ្នកវិភាគជាច្រើន វាយតម្លៃថា លោកម៉ាឌូរ៉ូ ដែលបានទទួលការគាំទ្រខ្លាំងពីកងទ័ព តាមពិតគ្រាន់តែចង់ចំណេញពេល ព្រោះលោកគ្មានចេតនាចង់ដោះស្រាយបញ្ហាពិតប្រាកដនោះទេ។
នៅថ្ងៃអាទិត្យម្សិលមិញ នៅក្នុងពិធីប្រគល់សញ្ញាប័ត្រដល់និស្សិតទាហាន លោកប្រធានាធិបតីម៉ាឌូរ៉ូបានលើកសរសើរពីចំណងសម្ព័ន្ធភាព ហើយនិងការស្មោះស្ម័គ្ររបស់កងទ័ព ដែលជាសរសរគ្រឹះ ដើរតួសំខាន់ក្នុងជីវិតនយោបាយវ៉េណេស៊ុយអេឡា។
មេដឹកនាំបក្សប្រឆាំង លោកហ័ន ហ្កៃដូវិញ បានព្យាយាមអូសទាញកងទ័ពឲ្យបែរខ្នងដាក់លោកម៉ាឌូរ៉ូ ប៉ុន្តែ មិនបានសម្រេច។ នៅថ្ងៃអាទិត្យ ប្រធានរដ្ឋសភា រូបនេះ នៅបានបង្កើនការដាក់សម្ពាធ ដោយបានគំរាមថា រដ្ឋសភាដែលដឹកនាំដោយក្រុមបក្សប្រឆាំងនឹងអនុម័តច្បាប់កងទ័ព ដែលនឹងអនុញ្ញាត បើកផ្លូវឲ្យមានអន្តរាគមន៍យោធាបរទេស ស្របច្បាប់ ដើម្បីទម្លាក់លោកម៉ាឌូរ៉ូពីអំណាច។ ការប៉ុនប៉ងរបស់សមាជិកសភា របស់ក្រុមប្រឆាំងនឹងអាចបរាជ័យសាជាថ្មី ព្រោះថា តុលាការកំពូល ដែលស្ថិតនៅខាងភាគីលោកប្រធានាធិបតី ជាអ្នកមានអំណាច រំលាយចោលការសម្រេចរបស់រដ្ឋសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ