វ៉េណេស៊ុយអេឡា ៖ រដ្ឋាភិបាលនិងបក្សប្រឆាំងព្រមរៀបចំវេទិកាចរចាជាអចិន្ត្រៃយ៍
រដ្ឋាភិបាលវ៉េណេស៊ុយអេឡា និងបក្សប្រឆាំង បានរកឃើញការព្រមព្រៀងគ្នា បង្កើតវេទិកាចរចាជាអចិន្ត្រៃយ៍ ដើម្បីដោះស្រាយវិបត្តិនយោបាយដោយសន្តិវិធី។ នេះជាលទ្ធផលនៃជួបពិភាក្សាជាលើកទីបី ក្រោមម្លប់ដឹកនាំរបស់ប្រទេសន័រវែស ដែលប្រព្រឹត្តទៅនៅកោះការ៉ាអ៊ីប និងទើបបិទបញ្ចប់នៅថ្ងៃព្រហស្បតិ៍ម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
“មានវេទិកាចរចា ភាគីបក្សដិបក្សនឹងអាចធ្វើការរួមគ្នា ជាប្រចាំនិងយ៉ាងលឿន ដើម្បីដោះស្រាយវិបត្តិនយោបាយ ក្នុងក្របខ័ណ្ឌនៃរដ្ឋធម្មនុញ្ញ” នេះបើតាមការគូសបញ្ចាក់របស់រដ្ឋមន្ត្រីក្រសួងការបរទេសន័រវែស នៅក្នុងសេចក្តីថ្លែងការណ៍ ផ្សាយជាសាធារណៈពីទីក្រុងការ៉ាកាស។ បើតាមការលោករដ្ឋមន្ត្រី ភាគីទាំងពីរ នឹងពិគ្រោះយោបល់គ្នាដើម្បីអាចជំរុញការចរចាឱ្យទៅមុខ ប៉ុន្តែលោកមិនបានផ្តល់ការបរិច្ឆេទនៃការជួបចរចាជាថ្មីទេ។
រដ្ឋាភិបាលន័រវែស ដែលជាអ្នកផ្ចុងផ្តើមឱ្យភាគីរដ្ឋាភិបាលនិងបក្សប្រឆាំងដោះស្រាយវិបត្តិតាមផ្លូវចរចា ក៏បានឆ្លៀតណែនាំឱ្យភាគីទាំងពីរប្រកាន់ជំហរប្រុងប្រយ័ត្នជាអតិបរិមា នៅពេលបញ្ចេញមតិធ្វើអត្ថាធិប្បាយ ឬសេចក្តីថ្លែងការណ៍អ្វីមួយ ទាក់ទងនឹងដំណើរការចរចានេះ។
សូមបញ្ជាក់ថា តំណាងរដ្ឋាភិបាលវ៉េណេស៊ុយអេឡា របស់លោក នីកូឡា ម៉ាឌូរ៉ូ និងក្រុមបក្សប្រឆាំងដឹកនាំដោយលោក ហ្កៃដូ ក៏បានជួបពិភាក្សាគ្នា តាំងពីថ្ងៃចន្ទទី ៨ កក្កដាមក នៅប្រទេសBarbade ក្នុងតំបន់ប្រជុំកោះការ៉ាអ៊ីប ជាគម្រប់លើកទីបី ក្រោមម្លប់ដឹកនាំរបស់ន័រវែស។ ជំនួបចរចាពីរលើកដំបូង នៅអូស្លូ ប្រទេសន័រវែស កាលពីខែឧសភា មិនបានផ្តល់លទ្ធផលអ្វី ទាំងអស់។
កាលពីសប្តាហ៍មុន ក្រោយមានហេតុការណ៍ស្លាប់ទាហានម្នាក់ ជាមេដឹកនាំចលនាបាតុកម្មប្រឆាំងនឹងរដ្ឋាភិបាល នៅក្នុងពន្ធនាគារ ប្រមុខបក្សប្រឆាំង លោក ហ្កៃដូ ដែលអន្តរជាតិជាង៥០ប្រទេស ទទួលស្គាល់ជាប្រធានាធិបតីស្តីទីវ៉េណេស៊ុយអេឡា បានព្រមានមិនចូលចរចាជាថ្មីទៀត។ តែខាងរដ្ឋាភិបាល បានទទូចហើយទទូចទៀង ថាការចរចាជាមួយបក្សប្រឆាំងត្រូវតែបន្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ