សេដ្ឋកិច្ចអាមេរិកចាប់ផ្តើមឲ្យសញ្ញាដើរយឺតៗ
តើសេដ្ឋកិច្ចអាមេរិកកំពុងចាប់រង្គោះរង្គើដោយសារសង្រ្គាមពាណិជ្ជកម្មចិន អាមេរិកឬក៏យ៉ាងណា? តួលេខរបស់នាយកដ្ឋានពាណិជ្ជកម្មអាមេរិក ចេញផ្សាយជាផ្លូវការនៅថ្ងៃ សុក្រ បានបង្ហាញថា ឱនភាពពាណិជ្ជកម្ម ប្រចាំខែ មិថុនាបានកាត់បន្ថយ ប្រមាណ ០,៣ភាគរយ ដោយសារការនាំចូលទំនិញ មកពីប្រទេសចិន និងសហភាព អឺរ៉ុប បានធ្លាក់ចុះ។ ទន្ទឹមគ្នានោះ ការនាំចេញទំនិញអាមេរិកក៏បានធ្លាក់ចុះ ខ្លាំងគួរ ឲ្យកត់សំគាល់ផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
នៅខែមិថុនា ឱនភាពពាណិជ្ជកម្មអាមេរិក មានទំហំទឹកប្រាក់ ៥៥ ២០០លានដុល្លារអាមេរិក គឺថយចុះបន្តិច ដោយសារការនាំចូលបានធ្លាក់ចុះ ប្រមាណ ១,៧% ឬ ២៦១ពាន់លានដុល្លារ ចំណែក ការនាំចេញរបស់អាមេរិកវិញ ធ្លាក់ចុះខ្លាំង ជាងការនាំចូលទៅទៀត ដល់ ទៅ២%។
តាមរបាយការណ៍របស់នាយកដ្ឋានពាណិជ្ជកម្មអាមេរិក ចេញផ្សាយ កាលពីថ្ងៃសុក្រ ដោយសារការនាំចូលពីចិន និងអឺរ៉ុបធ្លាក់ថយចុះ ទំនិញនាំចូលអាមេរិក ដូចជាទូរស័ព្ទដៃ និងសំភារៈប្រើប្រាស់របស់ប្រជាជនអាមេរិកាំង បានធ្លាក់ថយចុះ ជាង ១៤០០លានដុល្លារ។ នៅក្នុងជម្លោះពាណិជ្ជកម្ម រវាងគ្នា ប៉េកាំង និងវ៉ាស៊ីនតោនបានប្រកាសដំឡើងពន្ធ លើទំនិញនាំចូលគ្នាទៅវិញ ទៅមក សរុប ៣៦០ពាន់លានដុល្លារ ក្នុងគោលដៅ កាត់បន្ថយ ការដោះដូរពាណិជ្ជកម្មរវាងមហាអំណាចសេដ្ឋកិច្ចទាំងពីរ។
លោកដូណាល់ ត្រាំ ប្រើនយោបាយ ដំឡើងពន្ធលើទំនិញនាំចូលពីប្រទេសចិន ដើម្បី ការពារការងារប្រជាជនអាមេរិកាំង និងកាត់បន្ថយ គម្លាត នៃការដោះដូរពាណិជ្ជកម្មជាមួយប្រទេសចិន។ ប៉ុន្តែ តួលេខរបស់ក្រសួងការងារអាមេរិក នៅថ្ងៃសុក្របានបង្ហាញដែរថា សម្រាប់ខែកក្កដា ចំនួនការងារបង្កើតថ្មី បានថយចុះ នៅពេលអត្រាអ្នកអត់ការងារធ្វើវិញ នៅនឹងថ្កល់ ប្រមាណ ៣,៧% ដែលនេះ ជាសញ្ញានៃសេដ្ឋកិច្ចដើរយឺតរបស់អាមេរិក។
ការនាំចេញធ្លាក់ចុះ ចំណែកចំនួនការងារបង្កើតថ្មី ក៏ធ្លាក់ចុះ។ សញ្ញានៃសេដ្ឋកិច្ចដើរយឺត នឹងអាចរឹតតែអាក្រក់ នៅពេលនយោបាយដំឡើងពន្ធរបស់លោកដូណាល់ ត្រាំ ទៅលើទំនិញចិន នាំចូលអាមេរិក ដែលមានតម្លៃ ជាង ៣០០ពាន់លានដុល្លារផ្សេងទៀត ចាប់ចូលជាធរមាន នៅខែកញ្ញាខាងមុខ។
នៅថ្ងៃ ព្រហស្បតិ៍ ដោយសារការចរចាពាណិជ្ជកម្មជាមួយចិន នៅទីក្រុងសៀងហៃ មិនបានផ្តល់លទ្ធផលតាមការចង់បាន លោកដូណាល់ ត្រាំ បានប្រកាសដំឡើងពន្ធ ១០ភាគរយ លើទំនិញនាំចូលពីចិន ប្រមាណ ៣០០ពាន់លានដុល្លារផ្សេងទៀត ចាប់ពីថ្ងៃទី ១កញ្ញា។
នៅពេលវិធានការដំឡើងពន្ធពីរលើកដំបូង លើទំនិញនាំចូលពីចិន ផ្តោតសំខាន់ទៅលើវត្ថុធាតុដើម វិធានការដំឡើងពន្ធ លើកទី៣របស់លោកដូណាល់ ត្រាំ កាលពីថ្ងៃព្រហស្បតិ៍ លើទំនិញចិន តម្លៃ ជាង ៣០០ពាន់លានដុល្លារផ្សេងទៀត នឹងធ្វើឲ្យទំនិញ លក់រាយឡើងថ្លៃនៅអាមេរិក ដែលជាការប៉ះពាល់ដោយផ្ទាល់ លើប្រយោជន៍ របស់អ្នកប្រើប្រាស់ និងអ្នកជំនួញអាមេរិកាំង។
ធនាគារកណ្តាលអាមេរិក នៅសប្តាហ៍នេះបានកាត់បន្ថយអត្រាការប្រាក់ប្រមាណ០,២៥ភាគរយ ដើម្បី ជំរុញ ពង្រីក សេដ្ឋកិច្ចអាមេរិក ក្នុងកាលៈទេសៈដែលសេដ្ឋកិច្ចពិភពលោកដើរយឺត ហើយនិងភាពមិនច្បាស់លាស់ ដោយសារសង្រ្គាមពាណិជ្ជកម្មចិន អាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ