លោកដូណាល់ ត្រាំ៖ការស្អប់ខ្ពើមគ្មានកន្លែងរបស់វានៅលើទឹកដីអាមេរិកាំងទេ
នៅសហរដ្ឋអាមេរិក មួយថ្ងៃក្រោយព្រឹត្តិការណ៍បាញ់ប្រហារចំនួន ២ ដែលបានសម្លាប់មនុស្សចំនួន ២៩នាក់ និងរបួសធ្ងន់ ស្រាលជាច្រើននាក់មក សហរដ្ឋអាមេរិក និងពលរដ្ឋអាមេរិកាំងទូទៅកំពុងបន្តតក់ស្លុតយ៉ាងខ្លាំង។ ចំណែកប្រធានាធិបតីលោកដូណាល់ ត្រាំបានបញ្ចេញប្រតិកម្មនាថ្ងៃអាទិត្យ ទី៤ សីហាដោយបញ្ជាក់ថា ការស្អប់ខ្ពើមគ្មានកន្លែងរបស់វានៅលើទឹកដីអាមេរិកាំងទេ និងប្តេជ្ញាចាត់វិធានការមិនឲ្យទង្វើបាញ់ប្រហាររបៀបនេះកើតមានជាថ្មីឡើយ។ គួររម្លឹកថានៅព្រឹកថ្ងៃសៅរ៍ ទី៣ សីហា បុរសខ្មាន់កាំភ្លើងម្នាក់បានបាញ់រះនៅ El Paso ក្នុងផ្សារទំនើបមួយស្ថិតក្នុងរដ្ឋ Texas ជាប់ព្រំដែនប្រទេសម៉ិចស៊ិក ហើយនៅរំលងអធ្រាត្រថ្ងៃសៅរ៍ឆ្លងចូលថ្ងៃអាទិត្យ ទី៤ សីហា បុរសខ្មាន់កាំភ្លើងម្នាក់ទៀតបានបាញ់រះនៅពីមុខភោជនីយដ្ឋានក្នុងស្រុក Dayton នៃរដ្ឋ Ohio។ លោកត្រាំបានចាត់ទុកការបាញ់ប្រហារទាំងពីរថាជាទង្វើស្ពប់ខ្ពើមជាតិសាសន៍ និងជាបញ្ហារបស់ក្រុមមនុស្សដែលមានជំងឺផ្លូវចិត្ត។
ចុះផ្សាយនៅថ្ងៃ៖
ស្តាប់ - ០១:៣២
« ក្នុងរយៈពេលដ៏ខ្លី ជនខ្មាន់កាំភ្លើងបានបាញ់សម្លាប់មនុស្សជាច្រើននាក់។ តែមិនដល់មួយនាទីផង ក្រុមកម្លាំងសន្តិសុខបានបាញ់សម្លាប់រូបជនខ្មាន់កាំភ្លើងនៅនឹងកន្លែងកើតហេតុ។ កុំតែសម្លាប់ជនខ្មាន់កាំភ្លើងបានទាន់ពេល ម្ល៉េះនឹងមានមនុស្សស្លាប់ច្រើនជាងនេះ។ ពិតជារឿងគួររន្ធត់ និងអាក្រក់ហួសប្រមាណ តែវានឹងអាចអាក្រក់ខ្លាំងថែមទៀត ប្រសិនបើគ្មានអន្តរាគមន៍យ៉ាងឆាប់រហ័សពីកម្លាំងប៉ូលិសទេនោះ។
ខ្ញុំគ្រាន់តែចង់និយាយថា កន្លែងកើតហេតុទាំងពីរសុទ្ធជាកន្លែងដ៏អស្ចារ្យ។ យើងស្រឡាញ់ពលរដ្ឋរបស់យើង ហើយការស្អប់ខ្ពើមគ្មានកន្លែងរបស់វានៅក្នុងប្រទេសរបស់យើងទេ។ យើងត្រូវតែបិទបញ្ចប់ភាពស្អប់ខ្ពើមជាតិសាសន៍មួយនេះ។ ទង្វើមួយនេះបានកើតមាន និងបានអូសបន្លាយអស់ជាច្រើនឆ្នាំមកហើយ។ គេត្រូវតែបញ្ចប់វា។
យើងធ្លាប់បានធ្វើការងារច្រើនណាស់ដើម្បីដោះស្រាយលើបញ្ហានេះ ហើយប្រហែលជាយើងត្រូវធ្វើការងារនេះឲ្យបានច្រើនបន្ថែមទៀត។ តែក្រៅពីហេតុផលស្អប់ខ្ពើម ទង្វើបាញ់ប្រហារនេះក៏កើតចេញពីក្រុមមនុស្សដែលមានជំងឺផ្លូវចិត្តដែរ។ បើអស់លោកសម្លឹងមើលព្រឹត្តិការណ៍បាញ់រះទាំងពីរ គឺវាកើតចេញពីមនុស្សដែលមានបញ្ហាផ្លូវចិត្ត។ យើងត្រូវដោះស្រាយជាមួយក្រុមមនុស្សដែលមានបញ្ហាផ្លូវចិត្តធ្ងន់ធ្ងរ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ