Twitter លុបចោលគណនីក្លែងក្លាយ រាប់ពាន់ដែលជាប់ពាក់ព័ន្ធនឹងមហាអំណាចបរទេស
ក្រុមហ៊ុនTwitterបានសម្រេចលុបចោលគណនីក្លែងក្លាយ ជាង ៥ពាន់ ដែលមានជាប់ពាក់ព័ន្ធនឹងរដ្ឋាភិបាលបរទេស។ នៅក្នុងសេចក្តីប្រកាសកាលពីថ្ងៃសុក្រ ក្រុមហ៊ុនTwitterបានចោទប្រកាន់គណនីក្លែងក្លាយថា ជាឧបករណ៍នយោបាយ សម្រាប់ដើរផ្សព្វផ្សាយព័ត៌មានមិនពិត នៅលើបណ្តាញសង្គម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
គណនីដែលក្រុមហ៊ុនTwitter បានលុបចោល ពីបណ្តាញសង្គមរបស់ខ្លួន ភាគច្រើនជាគណនី ដែលឃោសនាឲ្យរដ្ឋាភិបាលអារ៉ាប៊ី សាអូឌីត ឬ ផ្សព្វផ្សាយព័ត៌មានមិនពិត ក្នុងគោលដៅវាយប្រហារ ប្រទេសអ៊ីរ៉ង់ កាតា ហើយនិងបាតុកម្ម នៅទីក្រុងហុងកុង។
នៅក្នុងចំណោមគណនីជាង ៥ពាន់ ដែលបណ្តាញសង្គមTwitter បានសម្រេចលុបចោល កាលពីថ្ងៃសុក្រ មានគណនីក្លែងក្លាយជាង ៤ពាន់ ដែលមានប្រភពមកពីប្រទេសអេមីរ៉ា អារ៉ាប់រួម។ គណនីទាំងនោះផ្តោតសំខាន់ទៅលើការឃោសនាផ្សព្វផ្សាយព័ត៌មានមិនពិត ទាក់ទងនឹងសង្រ្គាមនៅយេម៉ែន ជាទី ដែល អេមីរ៉ា អារ៉ាប់រួមបានចូលដៃ ធ្វើសង្រ្គាមជាមួយអារ៉ាប៊ី សាអូឌីត តាំងពីឆ្នាំ ២០១៥។
តាមសេចក្តីប្រកាសរបស់Twitter ដោយផ្អែកទៅលើនយោបាយប្រយុទ្ធប្រឆាំងនឹងក្រុមឧបាយបញ្ឆោត ក្រុមហ៊ុនបានសម្រេចផងដែរ លុបចោលគណនីជិត ៣០០ (២៧៣) មកពីអេហ្ស៊ីប និងអេមីរ៉ា អារ៉ាប់រួម ក្នុងហេតុផលថា គណនីទាំងនោះផ្សព្វផ្សាយព័ត៌មានមិនពិត ទាក់ទងនឹងប្រទេសកាតា ហើយនិងអ៊ីរ៉ង់។ តាមTwitter គណនីខាងលើ ដែលឧស្សាហ៍ បង្ហោះសារ លើកសរសើររដ្ឋាភិបាលអារ៉ាប៊ី សាអូឌីត ត្រូវបានបង្កើត និងគ្រប់គ្រងដោយក្រុមហ៊ុនបច្ចេកវិទ្យា Dot Dev នៅអេមីរ៉ា អារ៉ាប់រួម និងនៅអេហ្ស៊ីប។
គួររំលឹកថា ចាប់តាំងពីខែមិថុនា ឆ្នាំ ២០១៧ អារ៉ាប៊ី សាអូឌីត ជាមួយ អេមីរ៉ាអារ៉ាប់រួម បារ៉ែន និងអេហ្ស៊ីបបានធ្វើពហិការសេដ្ឋកិច្ចជាមួយ ប្រទេសកាតារដែលក្រុមប្រទេសសេដ្ឋីប្រេងចោទប្រកាន់ថា ជាអ្នកឧបត្ថម្ភទុនដល់ក្រុមភេរវនិយម ហើយនិងមានទំនាក់ទំនងជិតស្និទ្ធជាមួយប្រទេសអ៊ីរ៉ង់ដែលជាសត្រូវរបស់អារ៉ាប៊ីសាអូឌីត។
ក្រៅតែបិទគណនីរបស់ប្រទេសអារ៉ាប់ ក្រុមហ៊ុនTwitter បានបិទផងដែរ គណនីរាប់រយ នៅប្រទេសអេស្ប៉ាញ និងគណនី ជាង ១ពាន់ នៅអេក្វាទ័រ ដែលបង្កើតឡើងដោយក្រុមគណបក្សនយោបាយកាន់អំណាច។ គណនីរបស់អេក្វាទ័រដែលTwitter បានសម្រេចចិត្តលុបចោល ទាំងស្រុង ភាគច្រើន លើកសរសេរពីបញ្ហា ដែលកើតឡើងមកពីច្បាប់អេក្វាទ័រទាក់ទងនឹងសិទ្ធិសេរីភាពបញ្ចេញមតិ។
នៅក្នុងយុទ្ធនាការបោសសម្អាត គណនីក្លែងក្លាយ និងការផ្សព្វផ្សាយព័ត៌មានមិនពិត Twitter បានកំណត់ សំគាល់ឃើញ មានគណនី ជាង ៤ពាន់ (៤៣០២) មានទីតាំងនៅប្រទេសចិន ប៉ុន្តែ ដែលព្យាយាម ប៉ុនប៉ង និយាយអាក្រក់ពីបាតុកម្មនៅហុងកុង។ Twitter ផ្តោតសំខាន់លើគណនីរបស់អ្នកប្រើប្រាស់ចិន បន្ទាប់ពីបានលុបចោលគណនី ក្លែងក្លាយ ជាង ២សែន របស់ចិន ដែលមានចេតនាសរសេរ ញុះញង់ឲ្យមានអសណ្តាប់ធ្នាប់សាធារណៈនៅហុងកុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ