លោកដូណាល់ ត្រាំព្រមានកម្ទេចសេដ្ឋកិច្ចតួកគី បើតួកគីហ៊ានធ្វើអ្វីជ្រុលហួសហេតុនៅស៊ីរី
នៅអាមេរិក ការសម្រេចរបស់លោកដូណាល់ ត្រាំក្នុងការដកទ័ពអាមេរិកចេញពីស៊ីរីកំពុងបន្តឲ្យមានប្រតិកម្មប្រឆាំងពីគ្រប់មជ្ឈដ្ឋាន មានទាំងពីក្នុងគណបក្សសាធារណរដ្ឋរបស់លោកផងដែរ។ លោក Lindsey Graham សមាជិកព្រឹទ្ធសភាដែលស្និទ្ធិនឹងលោកត្រាំបានជំរុញឲ្យលោកត្រាំដកការសម្រេចចិត្តរបស់លោកវិញ។ ចំណែកលោក Mitch Mc Connell ដែលជាប្រធានក្រុមសម្លេងភាគច្រើននៅព្រឹទ្ធសភារបស់គណបក្សសាធារណរដ្ឋក៏បានស្នើដូចគ្នា និងបានយល់ឃើញថា ការដកទ័ពអាមេរិកពីស៊ីរីយ៉ាងទាន់ហន់នឹងផ្តល់ផលចំណេញឲ្យប្រទេសរុស្ស៊ី និងអ៊ីរ៉ង់ ពិសេសរបបស៊ីរីរបស់ប្រធានាធិបតីអាសាដ។ ទន្ទឹមគ្នានេះ វាក៏អាចបង្កឲ្យមានកំណើនហានិភ័យនៃការវាយប្រហារភេរវកម្មនៅក្នុងលោកដែរ។ អ្វីដែលគ្នាបារម្ភខ្លាំង គឺវាសនារបស់កម្លាំងគួដឌីស្ថានស៊ីរីដែលអាចប្រឈមនឹងការវាយប្រហារពីកម្លាំងតួកគី។ លោកត្រាំបានបញ្ជាក់ជាថ្មីពីការនាំទាហានអាមេរិកទៅផ្ទះវិញ តែក៏បានព្រមានថ្នាក់ដឹកនាំតួកគីទុកជាមុន ប្រសិនបើមានការវាយប្រហារលើពួកគួដឌីស្ថានស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៨
« ខ្ញុំមិនកាន់ជើងអ្នកណាទាំងអស់។ ឥឡូវនេះខ្ញុំគិតថា មានការដាក់សម្ពាធយ៉ាងច្រើនទៅលើប្រទេសតួកគី។ តួកគីបានប្រយុទ្ធប្រឆាំងទល់នឹងពួក PKK តាំងពីច្រើនឆ្នាំមកហើយ។ ភាគីទាំងពីរតួកគី និងពួក PKK កំពុងបន្តស្អប់គ្នាខ្លាំងណាស់ គឺគ្មានការយោគយល់គ្នាទេ។ តែខ្ញុំបានប្រាប់តួកគីរួចហើយថា ប្រសិនបើគេហ៊ានធ្វើអ្វីឲ្យជ្រុលហួសហេតុ គេនឹងទទួលផលវិបាកធ្ងន់ធ្ងរដោយសេដ្ឋកិច្ចត្រូវបំផ្លាញខ្ទេចខ្ទីរ។
តែខ្ញុំចង់ប្រាប់អស់ លោករឿងមួយ គឺរឿងដែលយើងបានប្រយុទ្ធឈ្នះអង្គការរដ្ឋអ៊ីស្លាម។ យើងចង់នាំទាហានរបស់យើងត្រឡប់ទៅផ្ទះវិញ ហើយខ្ញុំបានជាប់ឆ្នោតលើពាក្យសន្យាមួយនេះ។ យើងនឹងមិនបន្តឈរជើងយូរអង្វែងនៅទីនោះឡើយ។ យើងនឹងបន្តតាមដាន ឃ្លាំមើលសកម្មភាពរបស់ប្រទេសតួកគី ហើយយើងសង្ឃឹមថា តួកគី និងបណ្តាប្រទេសផ្សេងទៀត រួមទាំងសហភាពអឺរ៉ុបផង នឹងធ្វើអ្វីដែលពួកគេត្រូវធ្វើដើម្បីដោះស្រាយរឿងក្រុមអ្នកទោសពួកជីហាតអង្គការរដ្ឋអ៊ីស្លាម និងក្រុមគ្រួសាររបស់ពួកគេ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ