មានកូដកម្មទូទាំងប្រទេស ប្រធានាធិបតីអេក្វាទ័រ រំពឹងលើការចរចាជាមួយជនជាតិដើម
ក្រោយបាតុកម្មទ្រង់ទ្រាយធំ ដឹកនាំដោយជនជាតិដើមភាគតិច និងពលករ ដែលជារាលដាលជាអំពើហិង្សាខ្លាំង ស្ទើរទូទាំងប្រទេសមក ប្រធានាធិបតីអេក្វាទ័រ បានត្រលប់មកកាន់រដ្ឋធានីគីតូ វិញ និងប្រកាសសុំជួបចរចា ជាមួយសហគមន៍ជនជាតិដើមភាគតិច។ ជាមួយភាពជឿជាក់ លោកប្រធានាធិបតី លេនីន ម៉ូរ៉េណូ (Lenin Moreno) វិបត្តិនឹងអាចដំណោះស្រាយចេញក្នុងពេលឆាប់ៗ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
ប្រឈមនឹងវិបត្តិដ៏ធ្ងន់ធ្ងរបំផុតមិនធ្លាប់មានក្នុងអាណត្តិ ប្រមុខរដ្ឋអេក្វាទ័រ បានលើកទីស្នាក់ការរដ្ឋាភិបាលទៅធ្វើការនៅក្រុងហ្កាយ៉ាគីល ភាគនិរតីប្រទេស តែរូបលោកប្រធានាធិបតីបានត្រលប់មករដ្ឋធានីវិញ នៅថ្ងៃពុធ ចំពេលដែលក្រុមជនជាតិដើមភាគតិច កំពុងដើរដង្ហែក្បួនបាតុកម្មយ៉ាងស្ងប់ស្ងាត់ ពេញទីក្រុង។
“ខ្ញុំមករដ្ឋធានីដើម្បីសុំបើកការចរចា និងអាចប្រកាសអំពីលទ្ធផលដំបូងនៃការចរចា » នេះជាប្រសាសន៍របស់លោកប្រធានាធិបតី លេនីន មុននឹងចាកចេញពីរដ្ឋធានីវិញនៅល្ងាច។ ជាការពិត រដ្ឋាភិបាលនិងក្រុមបាតុករ ចាប់មានទំនាក់ទំនងនឹងគ្នាឡើងវិញ ដោយមានការសម្របសម្រួលរបស់អង្គការសហប្រជាជាតិ និងវិហារកាតូតលិក។ ជាងនេះទៅទៀត រដ្ឋាភិបាលបានប្រកាសចេញនូវផែនការសេដ្ឋកិច្ចដែលមានវិធានការគិតគូរជាសំខាន់ នៅលើកនេះ ទៅលើវិស័យកសិកម្ម និងដល់ជនជាតិដើមភាគតិច ដោយបង្កើនជំនួយឧបត្ថម្ភ១៥បន្ថែម ដល់អ្នកក្រីក្រខ្លាំង។
ថ្វីបើប្រធានាធិបតី បានបង្ហាញសុទិដ្ឋនិយម ថានឹងអាចរកដំណោះស្រាយបញ្ចប់វិបត្តិបានដោយឆាប់ៗមែន ប៉ុន្តែប្រមុខដឹកនាំសហព័ន្ធក្រុមជនជាតិភាគតិចអេក្វាទ័រ ស្ថាប័នតំណាងឱ្យពលរដ្ឋជនជាតិដើមរបស់ប្រទេស បានអះអាងថាចលនាបាតុកម្មនៅតែបន្ត ! ជនជាតិដើមភាគតិច គ្មានទំនុកចិត្តលើការចរចាជាមួយរដ្ឋាភិបាលនេះ ព្រោះរដ្ឋាភិបាលព្រមចុះចាញ់ដោយសារគំនាបរបស់មូលនិធិរូបិយវត្ថុអន្តរជាតិ។
ក្រុមជនជាតិភាគតិច ដែលតំណាងឱ្យ២៥%នៃពលរដ្ឋអេក្វាទ័រសរុប១៧,៣លាននាក់ បានដាក់លក្ខខណ្ឌយ៉ាងច្បាស់លាស់ថា រដ្ឋាភិបាលត្រូវបោះបង់ចោលគម្រោងធ្វើកំណែទម្រង់លុបបំបាត់ជំនួយឧបត្ថម្ភផ្នែកថាមពលប្រេងឥន្ធនៈ ដែលបណ្តាលឱ្យតម្លៃប្រេងឡើងថ្លៃមួយជាពីរ។
តែលោកលេនីន ម៉ូរីណូ ទំនងជាពិបាកត្រលប់ក្រោយណាស់ ព្រោះដើម្បីផ្តល់សន្ទុះសេដ្ឋកិច្ចដល់ប្រទេស ប្រធានាធិបតីអេក្វាទ័របានចុះកិច្ចព្រមព្រៀងជាមួយFMI ខ្ចីប្រាក់៤២០០លានដុល្លារជាថ្នូរនឹងការធ្វើកំណែទម្រង់សេដ្ឋកិច្ច។ ក្រុមអ្នកគាំទ្រប្រធានាធិបតីក៏បានរៀបចំបាតុកម្មដែរដើម្បីការពារនយោបាយរបស់លោក ម៉ូរីណូ។
សូមបញ្ជាក់ថា បាតុកម្មបានផ្ទុះឡើងតាំងពីជាមួយសប្តាហ៍មក រាលដាលជាអំពើហិង្សា សកម្មភាពសេដ្ឋកិច្ចប្រទេសត្រូវបន្ថយល្បឿន ការផលិតដឹកជញ្ចូនប្រេងដែលសកម្មភាពសេដ្ឋកិច្ចដ៏សំខាន់មួយរបស់ប្រទេសបានផ្អាក ប្រមាណ៦៨% ... វិបត្តិធ្លាក់ធ្ងន់ធ្ងរខ្លាំង រហូតប្រធានាធិបតីលើករដ្ឋាភិបាលទៅធ្វើការនៅក្រុងសេដ្ឋកិច្ច និងប្រកាសដាក់ប្រទេសក្នុងភាពអាសន្ន៦០ថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ