ប្រធានាធិបតី បូលីវី ប្រកាសលាលែងពីមុខតំណែង នៅក្រោយ កងទ័ពដោះដៃចោល
ចុះផ្សាយនៅថ្ងៃ៖
ស្តាប់ - ០៨:២២
បូលីវីកំពុងជួបភាពមិនច្បាស់លាស់ បន្ទាប់ពីប្រធានាធិបតី និងអ្នកដែលមានសិទ្ធិចូលកាន់តំណែង ដឹកនាំប្រទេស បណ្តោះអាសន្ន បានសុំលាឈប់ពីមុខតំណែង ជាបន្តបន្ទាប់គ្នា កាលពីថ្ងៃអាទិត្យម្សិលមិញ។ នៅថ្ងៃអាទិត្យម្សិលមិញ លោកប្រធានាធិបតី អេវ៉ូ ម៉ូរាលេសបានប្រកាសចុះចេញពីតំណែងប្រធានាធិបតី គឺនៅតែប៉ុន្មានម៉ោងក្រោយពីលោកទើបប្រកាសឲ្យមានការរៀបចំបោះឆ្នោតសាជាថ្មី។ លោកម៉ូរ៉ាលេស ដែលបានឈ្នះឆ្នោត យ៉ាងប្រផិតប្រផើយបំផុតលើបក្សប្រឆាំង បានសម្រេចចិត្តឲ្យមានការបោះឆ្នោតសាជាថ្មី បន្ទាប់ពី អង្គការរដ្ឋអាមេរិក បានចេញរបាយការណ៍ រកឃើញភាពមិនប្រក្រតីជាច្រើន នៅក្នុងការបោះឆ្នោតប្រធានាធិបតីបូលីវី កាលពីថ្ងៃទី ២០តុលាកន្លងទៅ។
ស្ថានការណ៍នៅប្រទេសបូលីវីបានវិវឌ្ឍ ប្រែប្រួលខ្លាំង កាលពីថ្ងៃអាទិត្យ។ អង្គការរដ្ឋអាមេរិក ដែលជាស្ថាប័នឯករាជ្យ តាមដានការបោះឆ្នោត ប្រធានាធិបតីនៅបូលីវី បានទាមទារឲ្យគេលុបចោលលទ្ធផលឆ្នោត ដែលបានផ្តល់ជ័យជំនះ បើកផ្លូវឲ្យលោកម៉ូរាលេសកាន់តំណែងជាប្រធានាធិបតី បូលីវី សម្រាប់អាណត្តិទី៤ បន្ទាប់ពី បានរកឃើញ ភាពប្រក្រតី ការបន្លំ រាប់ សន្លឹកឆ្នោត ជាលក្ខណៈ ទូទៅ នៅក្នុង ការបោះឆ្នោត បូលីវី កាលពីថ្ងៃ ទី២០តុលាកន្លងទៅ។
នៅថ្ងៃម្សិលមិញ លោកម៉ូរាលេសដែលបានសហការ យល់ព្រមឲ្យមានការស៊ើបអង្កេតរបស់អង្គការរដ្ឋអាមេរិក បានយល់ព្រម ឲ្យមានការរៀបចំការបោះឆ្នោតឡើងវិញ។ ប៉ុន្តែ សម្បទានរបស់លោកម៉ូរាលេសមិនបានទៅបន្ថយកំហឹងតវ៉ារបស់បាតុករបូលីវី ដែលបានធ្វើបាតុកម្មជាង៣សប្តាហ៍មកហើយ ដើម្បីប្រឆាំងលោកប្រធានាធិបតី ម៉ូរាលេសនោះទេ។ នៅថ្ងៃអាទិត្យដដែល ប្រមុខកងទ័ព ហើយនិងមេប៉ូលិស បានចូលរួម ជាមួយបាតុករ ដោយបានទាមទារឲ្យលោកម៉ូរាលេស ចុះចេញពីតំណែង ដើម្បីស្រោចស្រង់ ភាពស្ងប់សា្ងត់ក្នុងប្រទេសឡើងវិញ។ តាមប្រមុខកងទ័ពបូលីវី លោកម៉ូរាលេសត្រូវតែចុះចេញពីតំណែង ដើម្បីរក្សាសន្តិភាព និងធានាស្ថិរភាព សម្រាប់ប្រយោជន៍របស់ប្រជាជនបូលីវីទាំងមូល។
លោកម៉ូរាលេសបរិហារការធ្វើរដ្ឋប្រហារ និងដីកាតាមចាប់ខ្លួនលោក ពីសំណាក់ប៉ូលិសបូលីវី
លោកម៉ូរាលេសសុខចិត្តចុះចេញពីតំណែងនៅពេលនេះ ក៏ដោយសារតែ លោកបាត់ការគាំទ្រពីខាងកងទ័ព និងប៉ូលិសបូលីវីដែរ។ នៅក្នុងសុន្ទរកថា តាមទូរទស្សន៍ កាលពីថ្ងៃម្សិលមិញ លោកម៉ូរាលេស និយាយថា លោកសុខចិត្តចុះចេញពីតំណែង ដើម្បី ជៀសវាងកុំឲ្យមានការប៉ះទង្គិចគ្នារវាងក្រុមអ្នកគាំទ្រ លោក ហើយនិងបាតុករដឹកនាំដោយបក្សប្រឆាំង។
នៅយប់ថ្ងៃអាទិត្យ លោកម៉ូរាលេសដែលបានធ្វើដំណើរចាកចេញពីរដ្ឋធានីទៅកាន់ខេត្តកំណើតរបស់លោក នៅភាគកណ្តាលប្រទេសបានសរសេរ នៅក្នុងសារTwitter បរិហារពីការធ្វើរដ្ឋប្រហារប្រឆាំងរូបលោក បន្ទាប់ពី ប៉ូលិសចេញដីការតាមចាប់រូបលោក ចំណែកផ្ទះរបស់លោកនៅ រដ្ឋធានី ក៏ត្រូវជនងងឹតចូលដុតបំផ្លាញ។
មេបក្សប្រឆាំងបានបញ្ជាក់ដំណឹងស្តីពីដីកាតាមចាប់ខ្លួនលោកម៉ូរាលេស ប៉ុន្តែ មេប៉ូលិស បូលីវី លោក វិញបានបដិសេធថា គ្មានដីការ តាមចាប់លោកម៉ូរាលេសនោះទេ។ ប៉ុន្តែ ផ្ទុយទៅវិញ ប៉ូលិសបានចាប់ឃាត់ខ្លួន ប្រធាន ហើយនិងអនុប្រធានតុលាការបោះឆ្នោត ជាន់ខ្ពស់ ទៅតាមដីការរបស់អយ្យការដែលបានស៊ើបអង្កេតទៅលើភាពមិប្រក្រតី និងការចោទប្រកាន់របស់បក្សប្រឆាំង ដែលថា ស្ថាប័នរៀបចំការបោះឆ្នោត មួយនេះមានជំហរលំអៀងទៅរកបក្សកាន់អំណាចរបស់លោកម៉ូរាលេស។
លោកអេវ៉ូ ម៉ូរាលេសជាមេដឹកនាំដ៏កម្រក្នុងពិភពលោក ដែលមានដើមកំណើតជាជនជាតិភាគតិច
លោក ម៉ូរាលេស បានចូលកាន់តំណែងជាប្រធានាធិបតីបូលីវី តាំងពីឆ្នាំ ២០០៦ តាមរយៈ ការបោះឆ្នោត សកល ដែលធ្វើឲ្យលោកក្លាយជាជនជាតិភាគតិចដំបូងគេនៅក្នុងលោកដែលមានឱកាសបានចូលកាន់តំណែង ជាប្រធានាធិបតីស្របច្បាប់ ដឹកនាំប្រទេសបូលីវី។
នៅក្នុងការដឹកនាំ៣អាណត្តិជិត ១៤ឆ្នាំមកនេះ លោកម៉ូរាលេស ដែលកើតចេញពីគ្រួសារកសិករដាំកូកា ត្រូវបានគេទទួលស្គាល់ថា មេដឹកនាំដែលបាននាំយកយុត្តិធម៌ គិតដល់ប្រយោជន៍របស់ប្រជាជនក្រីក្រ និងប្រជាជនភាគតិច ដែលត្រូវបានមេដឹកនាំមុនៗ ទុកចោល នៅគន្លៀតជញ្ជាំង។ នៅក្នុងអាណត្តិដឹកនាំរបស់លោក លោកម៉ូរាលេស បានធ្វើកំណែទម្រង់ជាច្រើន ដើម្បី ជំរុញសេដ្ឋកិច្ចបូលីវី តាមប្រព័ន្ធគ្រប់គ្រងសង្គមនិយម ដូចជា បង្កើតច្បាប់ ទទួលស្គាល់ ការងាររបស់ក្រុមជនជាតិភាគតិច បង្កើនការយកពន្ធ លើប្រាក់ចំណូល ដើម្បីកែលម្អ សេវាសាធារណៈ ជាដើម។ នយោបាយកាត់បន្ថយគម្លាតរវាងអ្នកមាន និងអ្នកក្រ បានធ្វើឲ្យ ចំនួនអ្នកក្រីក្រ បានថយចុះ ៣៨% នៅឆ្នាំ ២០០៦ មកនៅត្រឹម ១៧% នៅឆ្នាំ ២០១៨។
លោកម៉ូរាលេស ជាមេដឹកនាំសង្គមនិយម ចុងក្រោយគេ ដែលបានជំរុញសេដ្ឋកិច្ចរបស់បូលីវី នៅពេល មេដឹកនាំឆ្វេងនិយម សង្គមនិយមរបស់ប្រទេសអាមេរិកឡាទីនដទៃទៀត ត្រូវខ្ទាតចេញពីតំណែង ឬកំពុងរងការដាក់សម្ពាធពីខាងបក្សស្តាំនិយម ដូចជានៅប្រទេសប្រេស៊ីល ឬនៅវ៉េណេស៊ុយអេឡា ជាដើម។
លោកម៉ូរាលេស និយាយថាលោក ចង់ដឹកនាំមួយអាណត្តិទៀត ដើម្បីសម្រេចចប់សព្វគ្រប់ នយោបាយកំណែទម្រង់
លោកម៉ូរាលេសមានស្នាដៃជា ច្រើន ដើម្បីជំរុញលទ្ធិប្រជាធិបតេយ្យ និងធ្វើនយោបាយ ដើម្បីប្រយោជន៍ប្រជាជនបូលីវី។ ប៉ុន្តែ លោកបានប្រព្រឹត្តកំហុស ដ៏ធំមួយ ដែលប្រជាជនបូលីវី មិនអាចអត់ឱនឲ្យបាន រហូតដល់ធ្វើបាតុកម្មប្រឆាំងខ្លាំង ទាមទារឲ្យចុះលោកចុះចេញពីតំណែង។ កំហុសរបស់លោកម៉ូរាលេស គឺ មិនគោរពតាមលទ្ធផលបោះឆ្នោតប្រជាមតិ ឆ្នាំ ២០១៦ ដែលនៅក្នុងនោះ ប្រជាជនបូលីវី បានប្រឆាំងមិនឲ្យលោកម៉ូរាលេសអាចបន្ថែមអាណត្តិដឹកនាំ ១អាណត្តិទៀត។ ដើម្បី អាចឈរឈ្មោះ សម្រាប់អាណត្តិទី ៤ ក្នុងហេតុផល សម្រេចគោលដៅ កំណែទម្រង់របស់លោក លោកម៉ូរាលេសបានដាក់ពាក្យសុំទៅតុលាការរដ្ឋធម្មនុញ្ញ ដែលបានលុបចោល លទ្ធផលបោះឆ្នោតប្រជាមតិ។ ការរំលោភ មិនគោរពលទ្ធផលឆ្នោតប្រជាមតិ ធ្វើឲ្យប្រជាជនបូលីវី សេចក្តីទុកចិត្តលើលោកម៉ូរាលេស។ លោកម៉ូរាលេសដែលបានបាក់មុខមួយជាន់ទៀត ដោយសារតែរដ្ឋាភិបាលរបស់លោក បរាជ័យមិនអាចទាមទារយកសិទ្ធិលើសមុទ្រ ពីប្រទេសឈីលី នៅក្នុងការប្តឹងផ្តល់ទៅតុលាការអន្តរជាតិ។
នៅពេលដែលចលនាប្រឆាំងកាន់តែមានទំហំធំ កើតពេញផ្ទៃប្រទេស គេឃើញ បណ្តើរ ៗ ប៉ូលិសចូលរួមក្នុងចលនាប្រឆាំងរបស់បាតុករ។ អាចថា កងទ័ព និងប៉ូលិស បូលីវី បោះបង់ចោល លោកមូរ៉ាលេស ក៏ដោយសារតែគេឃើញថា លោកម៉ូរាលេស ចុះអន់ខ្សោយប្រជាប្រិយភាព នៅក្នុងចំណោមប្រជាជន ប៉ុន្តែ មិនមែនដោយសារតែពួកគេចង់ធ្វើរដ្ឋប្រហារដើម្បី ដណ្តើមអំណាចដឹកនាំ នោះទេ។
បូលីវី គ្មានមេដឹកនាំ នៅក្រោយ លោកម៉ូរាលេស ប្រកាសចុះចេញពីតំណែង
បូលីវី ស្ថិតក្នុងស្ថានភាពមិនច្បាស់លាស់ ដោយសារថា ប្រទេស គ្មានអ្នកដឹកនាំទេ។ បូលីវី កំពុងជួបវិបត្តិគ្មានអ្នកដឹកនាំ នៅក្រោយ នៅក្រោយ លោក ម៉ូរាលេស ប្រកាសចុះចេញពីតំណែងប្រធានាធិបតី។ តាមរដ្ឋធម្មនុញ្ញ នៅពេលប្រធានានាធិបតីចុះចេញពីតំណែង គឺអនុប្រធានាធិបតីហើយនិងប្រធានព្រឹទ្ធសភាដែលចូលកាន់តំណែង ជាមេដឹកនាំស្តីទី។ ប៉ុន្តែ អ្វីដែលជាបញ្ហាចោទ គឺ ទាំង អនុប្រធានាធិបតី ប្រធានព្រឹទ្ធសភា រួមទាំងរដ្ឋមន្រ្តីជាច្រើនរូបរបស់រដ្ឋាភិបាលលោកម៉ូរាលេស បានសុំលាលែងពីមុខតំណែង បន្តបន្ទាប់គ្នា កាលពីថ្ងៃអាទិត្យម្សិលមិញ។ អនុប្រធានព្រឹទ្ធសភា នៅថ្ងៃអាទិត្យម្សិលមិញ បានអះអាងថា ខ្លួនមានសិទ្ធិស្របច្បាប់ ដើម្បី ដឹកនាំប្រទេសបណ្តោះអាសន្ន បើសិនប្រធានព្រឹទ្ធសភាចុះចេញពីតំណែង។
ប៉ុន្តែ មេដឹកនាំបក្សប្រឆាំង វិញ បានទាមទារឲ្យបង្កើតក្រុមប្រឹក្សាភិបាលគ្រប់គ្រងបណ្តោះអាសន្នមួយ ដែលមានការចូលរួមពីខាងកងទ័ព និងប៉ូលិស នៅក្នុងពេលរង់ចាំការបោះឆ្នោត ប្រធានាធិបតីសាជាថ្មី។
នៅពេលដែលកងទ័ពដកការទុកចិត្តពីប្រធានាធិបតី ម៉ូរាលេស ដើម្បីគោរពតាមលទ្ធិប្រជាធិបតេយ្យរបស់ប្រជាជនបូលីវី ដែលប្រឆាំង លោកម៉ូរាលេស គេក៏មិនច្បាស់ក្នុងចិត្តដែរថា ចលនាប្រឆាំងលោកម៉ូរាលេស នឹងអាចធានាឲ្យបូលីវីមានលទ្ធិប្រជាធិបតេយ្យដែរ។ នៅរដ្ឋធានី La Paz សកម្មភាពឆក់ប្លន់ លួចគាស់ហាងទំនិញបានកើតមានជាបន្តបន្ទាប់ នៅក្នុងពេលប្រទេសកំពុងជួបអស្ថិរភាពនយោបាយ។ បូលីវី នឹងអាចធ្លាក់លង់ជ្រៅ ក្នុងវិបត្តិនយោបាយ និងអស្ថិរភាព ប្រសិនបើគេមិនប្រញាប់ប្រញាល់រកមេដឹកនាំ មកជំនួសលោកម៉ូរាលេសទេនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ