ប្រេសិតអង្គការសហប្រជាជាតិ៖ ភាពតានតឹងរុស្ស៊ី-អាមេរិករឹតតែធ្វើឲ្យជម្លោះលីប៊ីកាន់តែស្មុគស្មាញ
៨ឆ្នាំក្រោយ ការដួលរលំ នៃរបបផ្តាច់ការកាដាហ្វី ប្រទេសលីប៊ី នៅតែមិនទាន់ងើបរួចផុតពី សង្រ្គាមស៊ីវិល ដែលបានបំផ្លាញ ស្ទើរខ្ទេចខ្ទី រចនាសម្ព័ន្ធរបស់ប្រទេសសេដ្ឋីប្រេងមួយនេះ។ សម្រាប់ប្រេសិតរបស់អង្គការសហប្រជាជាតិ ទទួលបន្ទុកបញ្ហាលីប៊ី ជម្លោះប្រដាប់អាវុធ នៅក្នុងប្រទេសអាហ្វ្រិកមួយនេះ រឹតតែស្មុគស្មាញ ខ្លាំងឡើង ជាមួយនឹងភាពតានតឹងកាន់តែខ្លាំងរវាងរុស្ស៊ី និងអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៨
បដិវត្តន៍ប្រជាជន ដែលបានឈានទៅផ្តួលរំលំរបបផ្តាច់ការកាដាហ្វី នៅឆ្នាំ ២០១១ បានរុញច្រានលីប៊ី ទៅក្នុងភាពវឹកវរ ជម្លោះប្រដាប់អាវុធ ដើម្បីដណ្តើមអំណាចគ្នា មិនចេះចប់។ នៅខែមេសាកន្លងទៅ មេទ័ពគ្រប់គ្រងតំបន់ខាងកើត លីប៊ី លោកកាលីហ្វា ហាវតា បានលើកកម្លាំងទាហានទៅវាយប្រហាររដ្ឋធានី ទ្រីប៉ូលី ដែលកាន់កាប់ដោយរដ្ឋាភិបាល ទទួលស្គាល់ដោយអន្តរជាតិ GNA។
ចាប់ពីពេលនោះហើយ ដែលប្រេសិតអង្គការសហប្រជាជាតិ ទទួលបន្ទុកកិច្ចការ លីប៊ី សង្កេតឃើញ មានអន្តរាគមន៍យោធា របស់បរទេស សាជាថ្មី នៅទឹកដីលីប៊ី។ ដូចសហរដ្ឋអាមេរិក ប្រេសិតអង្គការសហប្រជាជាតិ លោកGhassan Salamé បានសំដែងការព្រួយបារម្ភ នៅពេលឃើញ រុស្ស៊ី លូកដៃ ទៅក្នុងជម្លោះប្រដាប់អាវុធ លីប៊ី។ នៅក្នុងបទសម្ភាសន៍ជាមួយទីភ្នាក់ងារព័ត៌មានបារាំង AFP កាលពីថ្ងៃសុក្រ ប្រេសិតអង្គការសហប្រជាជាតិ បានលើកឡើងពីសេចក្តីរាយការណ៍ដែលថា មានវត្តមានទាហានស៊ីឈ្នួលរុស្ស៊ី ដែលចូលរួមជួយប្រយុទ្ធក្នុងជួរកងទ័ពរបស់លោក ហាវតា។ ការចោទប្រកាន់ដែលភាគីរុស្ស៊ីបដិសេធទាត់ចោលទាំងស្រុង។
នៅចំណែកខាងទ័ពរដ្ឋាភិបាល ទទួលស្គាល់ដោយអង្គការសហប្រជាជាតិ ពួកគេទទួលបានទទួលជំនួយយោធាពីខាងតួកគី។
“គេសង្កេតឃើញ មានអាវុធ ហូរមកពីគ្រប់កន្លែង” នេះជាប្រសាសន៍របស់ប្រេសិតអង្គការសហប្រជាជាតិ ដែលបានអំពាវនាវផងដែរ សុំគេពង្រឹងការងាររបស់គណៈកម្មាធិការដាក់ពិន័យរបស់អង្គការសហប្រជាជាតិ ឲ្យមានប្រសិទ្ធិភាពជាងមុខ ជាពិសេស ទៅលើបម្រាមអាវុធ ឆ្នាំ ២០១១។
នៅក្នុងរបាយការណ៍ នាដើមខែវិច្ឆិកា អ្នកជំនាញរបស់អង្គការសហប្រជាជាតិវាយតម្លៃថា តួកគី និងបណ្តាប្រទេសអេមីរ៉ា បានរំលោភច្បាប់ហាមលក់អាវុធរបស់អង្គការសហប្រជាជាតិ។
ទៅតាមផែនការសកម្មភាព ដែលក្រុមប្រឹក្សាសន្តិសុខអង្គការសហប្រជាជាតិ បោះឆ្នោត អនុម័តកាលពីខែកុម្ភៈ ប្រេសិតអង្គការសហប្រជាជាតិ ត្រូវទទួលបន្ទុក បើកសន្និសីទនៅទីក្រុងប៊ែរឡាំងដើម្បី ស្វែងរកកិច្ចព្រមព្រៀងបិទបញ្ចប់រវាងភាគីជម្លោះនៅលីប៊ី។
ប៉ុន្តែ សម្រាប់ លោកGhassan Salamé ផ្លូវដើរឈានទៅបិទបញ្ចប់សង្រ្គាមស៊ីវិលនៅលីប៊ី នៅវែងឆ្ងាយ និងសំបូរដោយឧបសគ្គ នៅក្នុងបរិបទស្មុគស្មាញ និងតានតឹង រវាងអាមេរិក រុស្ស៊ី។ នៅដើមខែវិច្ឆិកា អ្នកទទួលខុសត្រូវបានជួបពិភាក្សាជាមួយមេទ័ពហាវតា ដើម្បីនិយាយពីកង្វល់របស់វ៉ាស៊ីនតោនពីរឿងទ័ពរុស្ស៊ី នៅលីប៊ី។ ប៉ុន្តែ នៅក្រោយជួបជាមួយមន្រ្តីរដ្ឋាភិបាលក្រុងទ្រីប៉ូលី ដែលជាគូសត្រូវរបស់មេទ័ពហាវតា វ៉ាស៊ីនតោនបានអំពាវនាវឲ្យសេនាប្រមុខ ហាវតា ឈប់វាយប្រហារទៅលើរដ្ឋាភិបាលក្រុងទ្រីប៉ូលីតទៅទៀត។
នៅក្នុងសំណុំរឿងលីប៊ី អាមេរិក គិតតែផលប្រយោជន៍ប្រេង និងយុទ្ធសាស្រ្តប្រយុទ្ធប្រឆាំង ក្រុមភេរវនិយមតែប៉ុណ្ណោះ។ តើអាមេរិកត្រលប់មកផ្តោត ចាប់អារម្មណ៍ លីប៊ី ឡើងវិញ ដោយសារតែឃើញមានវត្តមានរុស្ស៊ីនៅលីប៊ី? នេះជាការចោទសួររបស់ប្រេសិតអង្គការសហប្រជាជាតិ។
នៅពេលរដ្ឋបាលអាមេរិកស្ថិតក្រោម ការដឹកនាំរបស់លោកដូណាល់ ត្រាំ ជញ្ជីង ចំណាប់អារម្មណ៍របស់អាមេរិក ទៅលើជោគវាសនា មនុស្សជាតិ របស់ប្រជាជនលីប៊ី នៅតែស្រាលជាងជញ្ជីងផលប្រយោជន៍ប្រេងបានមកពីលីប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ