អង្គការសហប្រជាជាតិបារម្ភពីការកើនឡើងនៃចំនួនកុមារ ដែលគ្មានសញ្ជាតិ គ្មានរដ្ឋទទួលស្គាល់
ឧត្តមស្នងការរបស់អង្គការសហប្រជាជាតិទទួលបន្ទុកខាងជនភៀសខ្លួន នៅថ្ងៃពុធទី ៤វិច្ឆិកានេះ ត្រូវឡើងបង្ហាញទៅ អង្គប្រជុំរបស់អង្គការសហប្រជាជាតិ នូវរបាយការណ៍មួយ ដែលនិយាយពីកុមារកើត និងធំដឹងក្តី ដោយគ្មានប្រទេស និងអត្តសញ្ញាណត្រឹមត្រូវ។ អង្គការសហប្រជាជាតិ ធ្លាប់បានដាក់ទិសដៅ ចង់លុបបំបាត់ចោល បញ្ហាមនុស្សគ្មានសញ្ជាតិ និងគ្មានរដ្ឋ ឲ្យបាន ពីពេលនេះ ដល់ឆ្នាំ ២០២៤។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
រាល់ ១០នាទី ម្តង មានទារកម្នាក់ នៅក្នុងពិភពលោក កើតឡើង ដោយគ្មានបានទទួលសញ្ជាតិត្រឹមត្រូវនឹងគេ។ នេះបើតាមរបាយការណ៍ដែលឧត្តមស្នងការទទួលបន្ទុកជនភៀសខ្លួន ត្រូវបង្ហាញ ទៅអង្គប្រជុំ របស់អង្គការសហប្រជាជាតិ នៅទីក្រុងញូវយ៉ក នៅថ្ងៃពុធនេះ។
តាមរបាយការណ៍ខាងលើ ក្នុងចំណោមប្រទេស ដែលសំបូរមនុស្ស គ្មានសញ្ជាតិ គ្មានរដ្ឋទទួលស្គាល់ រស់នៅច្រើនជាងគេ ដូចជា ប្រទេសភូមា កូឌីវ័រ និងប្រទេសថៃ ជាដើម ក្នុងមួយឆ្នាំៗ មានកុមារសរុប ៧ម៉ឺននាក់ ដែលកើត និងធំដឹងក្តី ដោយគ្មានសញ្ជាតិ ឬនិយាយដោយសាមញ្ញគឺគ្មានរដ្ឋណាមួយទទួលស្គាល់ជាប្រជាជនរបស់ខ្លួន។ ជាសរុបមានមនុស្សប្រមាណ ១០លាននាក់ រស់នៅដោយគ្មានសញ្ជាតិ និងគ្មានការទទួលស្គាល់ពីរដ្ឋាភិបាល របស់ប្រទេសដែលខ្លួនជ្រកកោន។
លោក Antonio Guterres ប្រធានឧត្តមស្នងការទទួលបន្ទុកជនភៀសខ្លួន បាននិយាយថា បញ្ហាគ្មានសញ្ជាតិ គ្មានប្រទេសពិតប្រាកដ នឹងចារជាប់ក្នុងខ្សែជីវិតរបស់កុមារ ដែលនឹងថ្កោលទោស តម្រូវឲ្យកុមារត្រូវរស់នៅជាមួយ នឹងការរើសអើង ក្តីអស់សង្ឃឹម ហើយនិងការមិនសប្បាយចិត្ត។
តាមប្រធានឧត្តមស្នងការទទួលបន្ទុកជនភៀសខ្លួន បញ្ហាមនុស្សគ្មានសញ្ជាតិ គ្មានរដ្ឋទទួលស្គាល់ត្រឹមត្រូវ បានធ្លាក់ធ្ងន់ធ្ងរ កាន់តែខ្លាំង ដោយសារសង្រ្គាមស៊ីវិលនៅប្រទេសស៊ីរី។ ដោយសារសង្គ្រាម និងជម្លោះប្រដាប់អាវុធ គេខកខាន មិនអាចចុះសំបុត្រកំណើតឲ្យកុមារ ដែលកើត នៅចំពេលដែលឪពុកម្តាយកំពុងរត់ភៀសខ្លួន ទៅរស់នៅប្រទេសជិតខាង។ តាមអង្គការសហប្រជាជាតិ សង្រ្គាមស៊ីវិល បានធ្វើឲ្យប្រជាជនស៊ីរីជាង ៤លាននាក់ រត់ភៀសខ្លួនទៅបរទេស។ ស្រ្តីស៊ីរី មួយចំនួន ក៏ធ្លាប់សម្រាលកូន នៅតាមផ្លូវ ធ្វើដំណើរ មករកកន្លែងជ្រកកោន នៅអឺរ៉ុប។
ជាទូទៅ ការរើសអើង ដោយផ្អែកលើជនជាតិ ជាតិសាសន៍ ឬសាសនា គឺជាឧបសគ្គរារាំងមិនឲ្យគេផ្តល់សញ្ជាតិដល់កុមារ។ ជាលទ្ធផល ការរើសអើងរបស់រដ្ឋាភិបាលម្ចាស់ស្រុករបស់ជនភៀសខ្លួន គឺជាអ្វីដែលជំរុញ ឲ្យចំនួន មនុស្ស គ្មានសញ្ជាតិ គ្មានរដ្ឋទទួលស្គាល់ កាន់តែកើនឡើង។ ដើម្បីកាត់បន្ថយ ឬលុបបំបាត់ចោលបញ្ហានេះ ឲ្យបានទាំងស្រុង តាមទិសដៅរបស់ខ្លួន សម្រាប់ឆ្នាំ ២០២៤ ស្ថាប័នការពារសិទ្ធិជនភៀសខ្លួនរបស់អង្គការសហប្រជាជាតិ បានស្នើដល់រដ្ឋាភិបាលនានាឲ្យផ្តល់សញ្ជាតិដល់កុមារដែលបានកើត នៅក្នុងទឹកដីរបស់ខ្លួន។ អង្គការសហប្រជាជាតិអំពាវនាវផងដែរ ឲ្យគេលុបចោល ការអនុវត្តដែលមានលក្ខណៈរើសអើង ហើយនិងលុបចោលច្បាប់ ដែលបានហាមឃាត់ម្តាយ មិនឲ្យផ្ទេរសញ្ជាតិបន្តទៅកូន ដូចករណីច្បាប់ស៊ីរីជាដើម។ សង្រ្គាមស៊ីវិលជាង ៤ឆ្នាំ បានធ្វើឲ្យគ្រួសារជនភៀសខ្លួនស៊ីរី ប្រមាណ ២៥ភាគរយ បាត់បង់បុរស ដែលជាមេគ្រួសារ និងជាអ្នកដែលមានសិទ្ធិដាក់ពាក្យសុំសញ្ជាតិ សម្រាប់កូនរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ