របាយការណ៍ស្តីពីការជួញដូរមនុស្សឆ្នាំ២០១៥៖ ករណីអាស៊ីអាគ្នេយ៍
ក្រោយពីពន្យារពេលជាងមួយខែ នៅថ្ងៃចន្ទទី ២៧ កក្កដា ក្រសួងការបរទេសអាមេរិកបានចេញផ្សាយ របាយការណ៍ស្តីពីការជួញដូរមនុស្សឆ្នាំ ២០១៥ (TIP)។ ចំណោមសមាជិកអាស៊ានទាំងដប់ ប្រទេសថៃទទួលបានចំណាត់ថ្នាក់ទី៣ ជាចំណាត់ថ្នាក់ទាបជាងគេ។
ចុះផ្សាយនៅថ្ងៃ៖
ស្តាប់ - ០២:២៩
របាយការណ៍ប្រចាំឆ្នាំស្តីពីការជួញដូរមនុស្ស(TIP) វិភាគលើកិច្ចខិតខំប្រឹងប្រែងរបស់បណ្តាប្រទេស ចំនួន១៨៨ នៅទូទាំងពិភពលោក ក្នុងការអនុវត្តតាមបទដ្ឋានអប្បបរិមា ដែលតម្រូវឱ្យលុបបំបាត់ ការជួញដូរ មនុស្សទាំងបុរសស្ត្រី និងកុមារ ដើម្បីការកេងប្រវ័ញ្ចផ្លូវភេទ ឬបង្ខំអោយធ្វើពលកម្ម។ របាយការណ៍នេះ ចាត់ចំណាត់ថ្នាក់ប្រទេសនីមួយៗ ទៅតាមកម្រិតនៃខិតខំប្រឹងប្រែងរបស់គេ ដោយមានបីថ្នាក់៖ ពីថ្នាក់ទី ១ ជាប្រភេទនៃប្រទេសដែលគោរពបានខ្ជាប់ខ្ជួនជាងគេ រហូតដល់ថ្នាក់ទីបី ជាប្រភេទប្រទេសដែលល្មើសច្រើនជាងគេលើបទដ្ឋានអប្បបរិមានោះ និងដែលអាចត្រូវទទួលទណ្ឌកម្មតាមឆន្ទានុសិទ្ធិរបស់ ប្រធានាធិបតីអាមេរិក មានដូចជា ការរឹតបន្តឹងលើការផ្តល់ជំនួយមិនមែនមនុស្សធម៌ និងការផ្តល់ថវិកា។
ចំណែក ឯថ្នាក់ទី២វិញ ជាប្រភេទ ប្រទេសដែលអាចឋិតក្នុងបញ្ជីឃ្លាំមើលរបស់ក្រសួងការបរទេសសហរដ្ឋអាមេរិក ដោយសារ មិនទាន់បានប្រឹងប្រែងឱ្យបានគ្រប់គ្រាន់ ដើម្បីប្រឆាំងការជួញដូរមនុស្ស។
កាលពីរបាយការណ៍ឆ្នាំ២០១៤កន្លងទៅ ប្រទេស នៅអាស៊ីអាគ្នេយ៍ ដែលជាប់ចំណាត់ថា្នក់ទី៣មាន៖ ប្រទេសថៃនិងម៉ាឡេស៊ី។ ចំណែក ក្នុងរបាយការណ៍ឆ្នាំ២០១៥នេះវិញ ប្រទេសថៃ នៅរក្សាចំណាត់ថ្នាក់ ទី៣ទាបជាងគេដដែល ខណៈដែលប្រទេសម៉ាឡេស៊ីទទួលបានថ្នាក់ទី២ប្រសើរជាងមុន។
ប្រទេសថៃត្រូវបានទម្លាក់ពីចំណាត់ថ្នាក់ទី២ មកទី៣ កាលពីឆ្នាំ២០១៤ ដោយសារ តែការបរាជ័យ មិនបានប្រឹងប្រែងឱ្យបានគ្រប់គ្រាន់ដើម្បីបញ្ឈប់ការជួញដូរស្ត្រី និងកុមារដើម្បីការកេងប្រវ័ញ្ច ក្នុងការធ្វើពាណិជ្ជកម្មផ្លូវភេទ និងដើម្បីបញ្ឈប់ការជួញដូរបុរសៗ ដែលត្រូវបានគេលក់ឱ្យធ្វើជាទាសករ នៅលើទូកនេសាទ។ ហើយបើទោះជានៅក្នុងប៉ុន្មានខែចុងក្រោយនេះរដ្ឋាភិបាលយោធាថៃបានបង្ហាញពីការខិតខំព្យាយាម ដើម្បីដោះស្រាយបញ្ហានេះ កាលពីពេលថ្មីៗនេះទៀតក៏ដោយ។ កាលពីថ្ងៃសុក្រសប្តាហ៍កន្លងទៅនេះ អាជ្ញាធរថៃបានប្រកាសថា បានចោទប្រកាន់ចំពោះបុគ្គល ៧២រូប ដោយរួមទាំងមន្រ្តីរដ្ឋាភិបាល និងមន្ត្រីយោធាពីបទឧក្រិដ្ឋកម្មជួញដូរមនុស្ស ប៉ុន្តែ វាក៏មិនបានធ្វើឲ្យមានការប្រែប្រួលពីចំណាត់ថ្នាក់ដ៏ទាបជាងគេនោះដែរ នៅឆ្នាំ២០១៥នេះ។
ឯប្រទេសម៉ាឡេស៊ីវិញរបាយការណ៍ ឆ្នាំ២០១៥បានគូសបញ្ជាក់ថា បើទោះជារដ្ឋាភិបាលម៉ាឡេស៊ីមិនគោរពបានពេញលេញតាមបទដ្ឋានអប្បបរមាសម្រាប់ការបំបាត់ការជួញដូរមនុស្សក៏ពិតមែនតែ ម៉ាឡេស៊ីបានធ្វើការខិតខំប្រឹងប្រែងយ៉ាងពេញទំហឹងដើម្បីដោះស្រាយបញ្ហានេះ។
ចំណែក ប្រទេសសមាជិកអាស៊ានផ្សេងទៀតមាន ប្រទេសឥណ្ឌូនេស៊ី ព្រុយណេ ហ្វីលីពីន សិង្ហបុរី មីយ៉ាន់ម៉ា វៀតណាម ឡាវ និងកម្ពុជា ស្ថិតក្នុងចំណាត់ថា្នក់ទី២ ដោយក្នុងនោះ មីយ៉ាន់ម៉ា ឡាវ និងកម្ពុជា ឋិតក្នុងបញ្ជីឃ្លាំមើលរបស់ក្រសួងការបរទេសសហរដ្ឋអាមេរិកដូចប្រទេសម៉ាឡេស៊ីដែរ។
ប្រទេសកម្ពុជាបានទទួលការលើកលែងពីការទម្លាក់មកចំណាត់ថ្នាក់ទី៣ ដោយសារតែរដ្ឋាភិបាលកម្ពុជា មានផែនការសរសេរជាក់លាក់ បញ្ជាក់ពីកិច្ចខិតខំប្រឹងប្រែងដើម្បីបំពេញតាមបទដ្ឋានអប្បបរមាសម្រាប់ការបំបាត់ការជួញដូរមនុស្ស ហើយនិងមានធនធានគ្រប់គ្រាន់ដើម្បីអនុវត្តផែនការនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ