កាណាដាបានជួយសំរួលការស្តារទំនាក់ទំនងអាមេរិក-គុយបា
ក្រៅពីតួនាទីរបស់សម្តេចប៉ាបក្នុងការរុញច្រានអោយសហរដ្ឋអាមេរិក និងគុយបា ភ្ជាក់ទំនាក់ទំនងការទូតគ្នាឡើងវិញ ប្រទេសកាណាដាបានជួយសំរួលការចរចាររវាងភាគីទាំងពីរតាមរយៈការផ្តល់ទីតាំងប្រជុំ។ ជំនួបសំងាត់ជាច្រើនលើកបានប្រព្រឹត្តទៅនៅលើទឹកដីកាណដា ចាប់តាំងពីខែមិថុនា ឆ្នាំ២០១៣ មកម្ល៉េះ។ ដំណឹងនេះត្រូវបានផ្សព្វផ្សាយកាលពីម្សិលម៉ិញ នៅតាមបណ្តាញព័ត៌មានក្នុងប្រទេសកាណាដា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
អ្វីៗទាំងអស់បានចាប់ផ្តើម កាលពីរដូវផ្ការីកឆ្នាំ២០១៣ នៅពេលលោកប្រធានាធិបតី បារាក់ អូបាម៉ា អនុញ្ញាតិដោយសំងាត់បើកអោយមានការពិភាក្សា ស្វែងរកផ្លូវចរចារជាមួយប្រទេសគុយបា ក្នុងគោលបំណងស្តារទំនាក់ទំនងការទូត រវាងប្រទេសទាំងពីរឡើងវិញ។ បើតាមបណ្តាញព័ត៌មាននានាក្នុងប្រទេសកាណាដា បានដកស្រង់សំដីមន្ត្រីជាន់ខ្ពស់អាមេរិកម្នាក់ ដែលសុំមិនបញ្ចេញឈ្មោះ បានអោយដឹងថា ជំនួបប្រជុំផ្លូវការតំបូងបានចាប់ផ្តើមកាលពីខែមិថុនា ឆ្នាំ២១០៣ នៅលើទឹកដីកាណាដា ក្នុងទីតាំងសំងាត់មួយ។
បន្ទាប់មក កិច្ចប្រជុំជាច្រើនលើក បានប្រព្រឹត្តទៅដោយសំងាត់ នៅទីក្រុងតូរុនតូ និងរដ្ឋធានីអូតាវ៉ា។ បើតាមមន្រ្តីរូបនោះ ដែលបានរៀបរាប់ដំណើរចរចារនោះ បានអោយដឹងថា ជំនួបពិភាក្សាដោយផ្ទាល់ និងស្មោះត្រង់រវាងគណប្រតិភូអាមេរិក និងគុយបាបានអូសបន្លាយអស់រយៈពេលមួយឆ្នាំកន្លះ ពោលគឺរហូតដល់ខែវិច្ឆិការមុននេះ។
ការផ្លាស់ប្តូរព័ត៌មានគ្នាទៅវិញទៅមក រវាងភាគីទាំងពីរ ត្រូវបានធ្វើឡើង តាមរយៈបណ្តាញដែលមានស្រាប់ ក្នុងនោះមានការិយាល័យផលប្រយោធន៍អាមេរិក ប្រចាំទីក្រុងឡាហាវ៉ាន ការិយាល័យដូចគ្នារបស់គុយបាប្រចាំទីក្រុងវ៉ាស៊ីងតោន និងតាមរយៈស្ថានបេសកកម្មរបស់ប្រទេសទាំងពីរប្រចាំនៅអង្គការសហប្រជាជតិ។ ដូចនេះ តាមការពិត ដំណើរការចរចារនេះបានប្រព្រិត្តទៅមុនពេលមានជំនួបផ្លូវការរវាងលោកប្រធានាធិបតី អូបាម៉ា និងសម្តេចប៉ាប ហ្វ្រង់ស័រ កាលពីខែមិនា ឆ្នាំ២០១៤ នេះ។
កាលនោះ ការពិភាក្សាគ្នារវាងឥស្សរជនទាំងពីរ នាបុរីវ៉ាទីកង់ គឺផ្តោតលើបញ្ហានានាលើពិភពលោក ក្នុងនោះ បញ្ហាគុយបាត្រូវបានលើកយកមកជជែក។ បើតាមសេចក្តីប្រកាសរបស់បុរីវ៉ាទីកង់ បានអោយដឹងថា ដោយបានយល់ពីឆន្ទៈរបស់លោកអូបាម៉ា នាខែកក្កដាកន្លងទៅនេះ ទើបសម្តេចប៉ាបបានសរសេរលិខិតជាផ្លូវការ ពីរដាច់ដោយឡែកពីគ្នា ទៅកាន់លោកប្រធានាធិបតី បារាក់ អូបាម៉ា និងលោក រ៉ាអ៊ូល កាសស្រ្តូ សុំអោយប្រទេសទាំងពីរនេះដោះស្រាយបញ្ហាមនុស្សធម៌ក្នុងផលប្រយោធន៍រួមគ្នា ជាពិសេសស្ថានភាពអ្នកទោសរបស់ទាំងពីរ។
នៅក្នុងកិច្ចសម្ភាសន៍មូយជាមួយស្ថានីយទូរទស្សន៍ CBC លោកនាយករដ្ឋមន្ត្រីកាណាដា Stephen Harpher បានព្យាយាមបញ្ជាក់ថា ប្រទេសកាណាដាពុំបានដើរតួនាទីជាអ្នកសម្របសម្រួល ឬដឹកនាំការប្រជុំអ្វីទេ ប៉ុន្តែកាណាដាបានផ្តល់ទីតាំងអព្យាក្រិតដើម្បីអនុញ្ញាតិអោយមន្ត្រីជាន់ខ្ពស់អាមេរិក និងគុយបាជួបពិភាក្សាគ្នាដោយស្ងាត់ៗ ក្នុងការស្វែងរកមធ្យោបាយ នាំអោយទំនាក់ទំនងរវាងប្រទេសទាំងពីរ មានភាពប្រក្រតីឡើងវិញ។
តាមរយៈសេចក្តីប្រកាសមួយ លោក Harpher បានអបអរសាទរ ចំពោះការភ្ជាប់ទំនាក់ទំនងជាធម្មតាឡើងវិញ រវាងសហរដ្ឋអាមេរិក និងគុយបា ដោយលោកបានចាត់ទុកថា នេះជាព្រឹត្តិការណ៍ប្រវត្តិសាស្រ្ត ក្នុងប្រវត្តិនយោបាយអាមេរិក។ ថ្វីត្បិតតែ កាណាដាពុំបានចូលសម្របសម្រួលដោយផ្ទាល់ ក្នុងដំណើរការចរចារ ប៉ុន្តែ លោកប្រធានាធិបតីបារាក់ អូបាម៉ា និងលោក រាអ៊ូល កាសស្រ្តូ បានថ្លែងអំណរគុណដល់ប្រទេសនេះ ដែលបានធ្វើជាម្ចាស់ផ្ទះក្នុងរយៈពេលនៃការចរចារកន្លងមក។ សូមបញ្ជាក់ផងដែរថា ទោះបីជា សហរដ្ឋអាមេរិកបានផ្តាច់ទំនាក់ទំនងទាំងស្រុង ជាមួយគុយបានៅឆ្នាំ ១៩៦១ ប៉ុន្តែ កាណាដានៅតែផ្សារភ្ជាប់ចំណងការទូតជាមួយគុយបា ក្រោយពីប្រទេសកូនកោះកុំមុយនីស្តមួយនេះ បានធ្វើបដិវត្តន៍ កាលពីឆ្នាំ ១៩៥៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ