ចិនសន្យាជួយវិនិយោគអេក្វាទ័រ ចំនួន១០ពាន់លានដុល្លារ
លោកប្រធានាធិបតីចិន ដែលកំពុងមានវត្តមាននៅទ្វីបអាមេរិកខាងត្បូង បានឆ្លៀតទៅបំពេញទស្សនកិច្ចផ្លូវរដ្ឋលើកទីមួយ នៅប្រទេសអាក្វាទ័រ ដែលជាប្រទេសផលិតប្រេងមួយដ៏សំខាន់។ លោកស៊ី ជីនពីង បានសន្យាជួយបោះទុនវិនិយោគក្នុងប្រទេសនេះ ចំនួន១០ពាន់លានដុល្លារ ហើយបានចុះហត្ថលេខាជាមួយប្រធានាធិបតីអាក្វាទ័រ លើកិច្ចព្រមព្រៀងសហប្រតិបត្តិការយុទ្ធសាស្ត្រចំនួនជាង១០ផ្សេងទៀត។
ចុះផ្សាយនៅថ្ងៃ៖ កែប្រែថ្ងៃទី៖
គ្រាន់តែទៅដល់ក្រុងគីតូស ប្រទេសអាក្វាទ័រ បានមួយថ្ងៃ លោកស៊ី ជីនពីង ប្រធានាធិបតីចិន បានចុះហត្ថលេខាលើកិច្ចព្រមព្រៀងសហប្រតិបត្តិការយុទ្ធសាស្រ្តចំនួន១១។ ចិនបានសន្យាបោះទុនវិនិយោគចំនួន១០ពាន់លានដុល្លារនៅអេក្វាទ័រ។
អេក្វាទ័រ ប្រទេសផលិតប្រេងមួយដ៏ធំនៅទ្វីបអាមេរិកខាងត្បូង កំពុងជួបវិបត្តិ ហើយត្រូវការជំនួយវិនិយោគយ៉ាងច្រើន ដើម្បីបង្កើនសមត្ថភាពផលិតប្រេងរបស់ខ្លួន។ គម្រោងបង្កើតរោងចក្រចម្រាញ់ប្រេងឆៅ ដែលមានសមត្ថភាពផលិតចំនួន៣សែនធុងបារីលក្នុងមួយថ្ងៃ ត្រូវការប្រាក់វិនិយោគចំនួនប្រមាណ១៣ពាន់លាន។
សូមរំលឹកថា ប្រធានាធិបតីចិន និងប្រធានាធិបតីអេក្វាទ័រ ធ្លាប់បានជួបគ្នាម្តងរួចមកហើយ កាលពីឆ្នាំ២០១៥ នៅទីក្រុងប៉េកាំង។ កាលនោះ មេដឹកនាំទាំងពីរ បានសន្យាចាប់ដៃគ្នាធ្វើសហប្រតិបត្តិការយុទ្ធសាស្ត្រក្នុងវិស័យជាច្រើន រួមមានវិស័យសេដ្ឋកិច្ច ហិរញ្ញវត្ថុ វិទ្យាសាស្ត្រ នយោបាយការបរទេស និងវិស័យវប្បធម៌ជាដើម។
បច្ចុប្បន្ន ចិនគឺជាដៃគូពាណិជ្ជកម្មធំបំផុតទី៣របស់អេក្វាទ័រ។ ហើយចិនគឺជាប្រទេសទីមួយ ដែលបានបោះទុនវិនិយោគច្រើនជាងគេក្នុងប្រទេសនេះ។ ចិន ក៏ជាម្ចាស់បំណុលសាធារណៈ របស់អេក្វាទ័រ ចំនួន២០% ផងដែរ។
ក្រៅពីបានសន្យាបោះទុនវិនិយោគចំនួន១០ពាន់លានដុល្លារ លោកប្រធានាធិបតីចិន បានសន្យាផ្តល់ជំនួយចំនួន១៥០លានដុល្លារ ដើម្បីជួយសាងសង់មន្ទីរពេទ្យពីរ ព្រមទាំងសំណង់អាគារស្នាក់នៅសម្រាប់៤០០គ្រួសារ នៅតំបន់ដែលបានរងការខូចខាត ដោយសារគ្រោះរញ្ជួយដី កាលពីឆ្នាំ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ