លោកស្រី Hillary និងលោក Bill Clinton ផ្សព្វផ្សាយឯកសារប្រកាសប្រាក់ចំណូលជាសាធារណៈ
ចុះផ្សាយនៅថ្ងៃ៖
ស្តាប់ - ០៤:១១
លោកស្រី Hillary Clinton បេក្ខនារីប្រធានាធិបតីអាមេរិកតំណាងឲ្យគណបក្សប្រជាធិបតេយ្យបានផ្សព្វផ្សាយឯកសារប្រកាសប្រាក់ចំណូលសំរាប់ឆ្នាំ២០១៥។ តាមរយៈនេះ លោកស្រីបានរិះគន់គូប្រជែងមកពីគណបក្សសាធារណរដ្ឋ គឺមហាសេដ្ឋី Donald Trump ដែលបដិសេធពុំព្រមបញ្ចេញឯកសារប្រាក់ចំណូលប្រចាំឆ្នាំរបស់ខ្លួន។ ជាទូទៅ បេក្ខជនប្រធានាធិបតីអាមេរិកតែងលាតត្រដាងឯកសារពន្ធផ្ទាល់ខ្លួននេះជូនសាធារណៈជន។ ការផ្សព្វផ្សាយនេះបានក្លាយជាប្រពៃណីចាប់តាំងពីរាប់សិបទសវត្សរ៍មកហើយ។
នៅពេលប្រឡូកខ្លួនចូលក្នុងឆាកនយោបាយចាប់តាំងពីឆ្នាំ ១៩៧៧ ប្តីប្រពន្ធត្រកូល Clinton តែងផ្សព្វផ្សាយសេចក្តីប្រកាសប្រភពប្រាក់ចំណូលរបស់ខ្លួន។ សមាជិកគណបក្សប្រជាធិបតេយ្យតែងអនុវត្តប្រពៃណីនេះ ដើម្បីបង្ហាញឲ្យឃើញពីតម្លារភាពរបស់ពួកគេ។ វេបសាយ៍ hillaryclinton.com បានបង្ហាញឯកសារនានាឲ្យដឹងថា សំរាប់ឆ្នាំ ២០១៥ កន្លងទៅនេះ ប្តីប្រពន្ធ Bill Clinton និង Hillary Clinton មានប្រាក់ចំណូលសរុបចំនួន ១០,៦ លានដុល្លារ។ប៉ុន្តែ អ្នកទាំងពីរបានបង់ពន្ធលើប្រាក់ចំណូលជូនរដ្ឋចំនួន ៣,៦ លានដុល្លារ។ ហើយអ្នកទាំងពីរបានបរិច្ចាកប្រាក់ចំនួន ១ លានដុល្លារទៅមូលនិធិសម្បុរសធម៌ ដែលមានឈ្មោះរបស់ខ្លួន។
ប្រភពចំណូលសំខាន់ជាងគេរបស់ប្តីប្រពន្ធត្រកូល Clinton គឺ ការទទួលបានប្រាក់កំរៃពីការអញ្ជើញឡើងថ្លែងសុន្ទរកថារបស់លោក Bill Clinton នៅក្នុងឱកាសសន្និសីទនានា។ ចំណូលកាលពីឆ្នាំមុននេះ គឺមានរហូតដល់ ៥,២ លានដុល្លារ។ ដូចស្វាមីរបស់ខ្លួន លោកស្រី Hillary Clinton បានទទួលប្រាក់ចំណូលចំនួន ១,៥ លានដុល្លារ តាមរយៈការអញ្ចើញឲ្យឡើងបញ្ចេញទេព្យកោសលវោហារសព្ទសាធារណៈ នៅតាមសន្និសីទធំៗ។ នេះជាប្រាក់ចំណូលតែប៉ុន្មានខែប៉ុណ្ណោះកាលពីដើមឆ្នាំ ២០១៥ ព្រោះលោកស្រីលែងឡើងថ្លែងសុន្ទរកថាទៀត ហើយចាប់ផ្តើមផ្តោតអារម្មណ៍លើយុទ្ធនាការបោះឆ្នោតបឋមក្នុងគណបក្សប្រជាធិបតេយ្យ ដើម្បីក្លាយជាបេក្ខនារីប្រធានាធិបតីផ្លូវការ។ សូមបញ្ជាក់ថា ចន្លោះពីឆ្នាំ ២០១៣ ដល់ ២០១៥ លោកស្រីក៏ទទួលបានប្រាក់ចំណូលបែបនេះផងដែរ ដោយគ្រាន់តែឡើងថ្លែងសុន្ទរកថាចំនួនជាងដប់ប៉ុណ្ណោះ។
ទន្ទឹមគ្នានេះផងដែរ សំរាប់ឆ្នាំ ២០១៥ កន្លងទៅនេះ លោកស្រី Hillary Clinton ក៏ទទួលបានចំណូលចំនួន ៣ លានដុល្លារពីគ្រឹះស្ថានបោះពុម្ភ Simon & Schuster។ គ្រឹះស្ថាននេះបានបង់ថ្លៃកម្មសិទ្ធិបញ្ញាចំពោះការបោះពុម្ភផ្សាយសៀវភៅរបស់លោកស្រី។ ដាក់លក់ជាសាធារណៈចាប់តាំងពីឆ្នាំ ២០១៤ សៀវភៅកំរាស់ ៦៥៦ ទំព័រនេះមានចំណងជើងថា Hard Choices (ជម្រើសដ៏លំបាក)។ សៀវភៅនេះ គឺជាការរំលឹកចងចាំអំពីបទពិសោធន៍របស់លោកស្រី Hillary Clinton ក្នុងឋានៈជារដ្ឋមន្រ្តីការបរទេសអាមេរិក ចន្លោះពីឆ្នាំ ២០០៩ ដល់ ២០១៣។ ហើយកម្រងស្នាដៃនេះក៏រៀបរាប់ខ្លះផងដែរពីជីវិតផ្ទាល់ខ្លួន និងដំណើរជីវិតនយោបាយរបស់លោកស្រី។
ផ្ទុយពីលោកស្រី Hillary Clinton បេក្ខជនសាធារណរដ្ឋ គឺមហាសេដ្ឋី Donald Trump តែងបដិសេធមិនព្រមលាតត្រដាងឯកសារពន្ធផ្ទាល់ខ្លួនឡើយ។ លោកស្រី Jennifer Palmieri នាយិការផែ្នកសារគមនាគមន៍ប្រចាំក្រុមកាងារឃោសនារបស់លោកស្រី Hillary Clinton បានចោទសំណួរថា ហេតុអ្វីបានជាលោក Donald Trump ពុំចង់ផ្សព្វផ្សាយឯកសារប្រាក់ចំណូលប្រចាំឆ្នាំរបស់ខ្លួន? តើបេក្ខជនដ៏ចម្រូងចម្រាស់រូបនេះមានអ្វីដែលត្រូវលាក់បាំង? សូមបញ្ជាក់ថា សមាជិកគណបក្សប្រជាធិបតេយ្យសង្ស័យថា មហាសេដ្ឋីអចលនទ្រព្យ Donald Trump អាចបង់ពន្ធតិចតួច ឬក៏អត់សោះតែម្តងលើប្រាក់ចំណូលខ្លួន។ ហើយគេក៏សង្ស័យថា លោក Trump ក៏ពុំមានប្រាក់ចំណូលខ្ពស់ដូចអ្វី ដែលបេក្ខជនមកពីគណបក្សសាធារណរដ្ឋរូបនេះធ្លាប់អួតក្អេងក្អាង។
មែនទែនទៅ គឺអស់រយៈពេល ១៥ ឆ្នាំមកហើយ ដែលលោក Trump ជាផ្ទាំងស៊ីបចំពោះសំណួរស្តីពីប្រភពប្រាក់ចំណូលផ្ទាល់ខ្លួន ពីសំណាក់សារព័ត៌មានអាមេរិក។ កន្លងមក លោក Donald Trump តែងយកលេសថា ការត្រួតពិនិត្យសារពើពន្ធផ្សេងទៀតលើមុខជំនួញរបស់ខ្លួនមានភាពស្មុគស្មាញ។ ហើយបេក្ខជនរូបនេះក៏ពន្យល់ផងដែរថា កាលពីខែឧសភា លោកបានតម្កល់ឯកសារតម្លារភាពថវិការជូនគណៈកម្មាធិការបោះឆ្នោតសហព័ន្ធ (FEC)។ ហើយឯកសារនេះគឺគ្រប់គ្រាន់ណាស់ទៅហើយ។
សូមបញ្ជាក់ថា ឯកសារនេះគ្រាន់តែជាការប៉ាន់ប្រមាណទ្រព្យសកម្ម ប្រាក់បំណុល និងប្រាក់ចំណូលតែប៉ុណ្ណោះ។ លោក Donald Trump តែងអួតក្អេងក្អាងថាខ្លួនមានទ្រសម្បត្តិក្នុងរង្វង់ទឹកប្រាក់ជាង ១០ ពាន់លានដុល្លារ។ គិតមកដល់ពេលនេះ គ្មាននរណាគេអាចផ្ទៀងផ្ទាត់ទំហំទ្រព្យសម្បត្តិនេះបានឡើយ។ ប៉ុន្តែ ទស្សនាវដ្តីជំនួញដ៏ល្បី គឺ Forbes បានប៉ាន់ស្មានថា លោក Trump មានទ្រព្យសម្បត្តិប្រមាណ ៤,៥ ពាន់លានដុល្លារតែប៉ុណ្ណោះ។
នៅក្នុងអត្ថបទស៊ើបអង្កេតមួយ ដែលចុះផ្សាយ នៅលើទំព័រសារព័ត៌មាន New York Times កាលពីថ្ងៃសុក្រកន្លងទៅនេះបានឲ្យដឹងថា មហាសេដ្ឋី Donald Trump ប្រហែលជាប្រើប្រាស់វិធីសាស្រ្តនានាគេចវៀសពុំបង់ពន្ធច្រើនជូនរដ្ឋ។ អត្ថបទនេះក៏បានលាតត្រដាងឲ្យដឹងដែរថា នៅឆ្នាំ ១៩៧៨ និងឆ្នាំ ១៩៧៩ លោក Trump ពុំបានបង់ពន្ធលើប្រាក់ចំណូលមួយសេនឡើយជូនរដ្ឋ។ ការបែកធ្លាយព័ត៌មាននេះ គឺដោយសារយោងលើឯកសារមួយចំនួន ដែលលោក Trump ត្រូវបង្ខំចិត្តផ្សព្វផ្សាយជាសាធារណៈកាលពីឆ្នាំ ១៩៨១ ស្របតាមការស្នើសុំរបស់ច្បាប់ ដើម្បីអាចទទួលបានអាជ្ញាប័ណ្ណបើកកាស៊ីណូល្បែងស៊ីសង។
សូមរំលឹកថា ចាប់តាំងពីឆ្នាំ ១៩៨០ ពោលគឺ សម័យលោកប្រធានាធិបតី Ronald Reagan បេក្ខជនប្រធានាធិបតីគណបក្សប្រជាធិបតី និងគណបក្សសាធារណរដ្ឋតែងលាតត្រដាងឯកសារប្រាក់ចំណូលប្រចាំឆ្នាំរបស់ខ្លួន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ