នាយករដ្ឋមន្រ្តីអ៊ីស្រាអែលបែរខ្នងដាក់លោកអូបាម៉ា នៅក្នុងសំណុំរឿងនុយក្លេអ៊ែរអ៊ីរ៉ង់
នាយករដ្ឋមន្រ្តីអ៊ីស្រាអែល លោកបិនចាមីន នេតានីញ៉ាហ៊ូកំពុងផ្តើមបេសកកម្ម ការទូត ប្រឆាំងអ៊ីរ៉ង់ ក្នុងទឹកដីអាមេរិក។ ទៅដល់ទីក្រុងវ៉ាស៊ីនតោន តាំងពីយប់ថ្ងៃអាទិត្យ លោកនាយករដ្ឋមន្រ្តីអ៊ីស្រាអែលត្រូវឡើងថ្លែងសុន្ទរកថា នៅចំពោះមុខ សភាអ្នកតំណាងរាស្រ្តអាមេរិក នៅថ្ងៃអង្គារ ទី ៤ មីនា។ វត្តមានរបស់នាយករដ្ឋមន្រ្តីអ៊ីស្រាអែលនៅទឹកដីអាមេរិក ធ្វើឡើង នៅចំពេលដែលលោកប្រមុខការទូតអាមេរិក ចន ឃេរី កំពុងពិភាក្សា ជាមួយរដ្ឋមន្រ្តីការបរទេសអ៊ីរ៉ង់ នៅទីក្រុងហ្សឺណែវ ដើម្បីបំបាត់ ចំណុចខ្វែងគំនិតគ្នា និងឈានទៅរកកិច្ចព្រមព្រៀងនយោបាយមួយឲ្យបានមុន ថ្ងៃទី ៣១មីនា។
ចុះផ្សាយនៅថ្ងៃ៖
នាយករដ្ឋមន្រ្តី អ៊ីស្រាអែលបានធ្វើដំណើរទៅទីក្រុងវ៉ាស៊ីនតោន ទៅតាមការអញ្ជើញរបស់ប្រធានសភាអ្នកតំណាងអាមេរិក ដែលមកពីគណបក្សសាធារណរដ្ឋ។ គោលដៅចំបងរបស់អ៊ីស្រាអែលគឺ បង្អាក់ កុំឲ្យកិច្ចព្រមព្រៀងអន្តរជាតិមួយស្តីពីកម្មវិធីនុយក្លេអ៊ែរអ៊ីរ៉ង់ អាចកើតចេញជារូបរាងបាន។ តាមគម្រោង អ៊ីរ៉ង់ និងប្រទេសមហាអំណាច ៥បូក១ ត្រូវចរចា រកឲ្យឃើញ កិច្ចព្រមព្រៀងនយោបាយមួយ ឲ្យបានមុន ចុងខែមីនានេះ មុននឹងកិច្ចព្រមព្រៀង ជាស្ថាពរ នៅខែកក្កដា។
នៅអាមេរិក លោកនាយករដ្ឋមន្រ្តីអ៊ីស្រាអែលនឹងនិយាយទៅកាន់គណៈកម្មាធិការ ទទួលបន្ទុកកិច្ចការសាធារណៈដែលគាំទ្រអ៊ីស្រាអែល នៅថ្ងៃចន្ទ និងនៅថ្ងៃបន្ទាប់ លោកនឹងថ្លែងសុន្ទករថា នៅចំពោះមុខសភាអ្នកតំណាង អាមេរិក។ គោលដៅរបស់លោក គឺចង់បញ្ចុះបញ្ចូលក្រុមអ្នកនយោបាយដែលគាំទ្រអ៊ីស្រាអែល ហើយនិងសភាទាំងពីរថ្នាក់របស់អាមេរិក ដែលកាន់កាប់ដោយក្រុមប្រឆាំង គឺគណបក្សសាធារណរដ្ឋ។
អ៊ីស្រាអែលសង្ឃឹម ចង់ពឹងពាក់រកជំនួយពី សភាអាមេរិកវិញម្តង ដែលពេលនេះ មាន សំឡេងភាគច្រើន និងមានអំណាច មិនចាញ់លោកប្រធានាធិបតីអាមេរិក។ អ៊ីស្រាអែលដឹងច្បាស់ថា គេលែងអាចបញ្ចុះបញ្ចូលលោកបារ៉ាក់ អូបាម៉ា ឲ្យឈប់ចរចាជាមួយអ៊ីរ៉ង់ បន្ទាប់ ពីអាមេរិករបស់លោកអូបាម៉ា រកឃើញកិច្ចព្រមព្រៀងបឋម មួយជាមួយអ៊ីរ៉ង់ ស្តីពីកម្មវិធីនុយក្លេអ៊ែរ អ៊ីរ៉ង់។ យោងតាមកិច្ចព្រមព្រៀងបឋម រវាងភាគីចរចា អ៊ីរ៉ង់ និងប្រទេសមហាអំណាចទាំង៥បូក មួយ (បារាំង អាមេរិក រុស្ស៊ី ចិន អង់គ្លេស បូកនឹងអាល្លឺម៉ង់) អ៊ីរ៉ង់ត្រូវបានអនុញ្ញាតឲ្យអនុវត្តកម្មវិធីនុយក្លេអ៊ែរស៊ីវិល ជាថ្នូរនឹងការលើកទណ្ឌកម្មសេដ្ឋកិច្ចខ្លះៗ ដែលអ៊ីរ៉ង់ទទួលរងពីអាមេរិក អឺរ៉ុប និងអង្គការសហប្រជាជាតិ។ នៅទីក្រុងហ្សឺណែវ ប្រមុខការបរទេសអាមេរិកត្រូវជួបពិភាក្សា ជាមួយសមភាគីអ៊ីរ៉ង់ រយៈពេលបីថ្ងៃ (ចាប់ពីថ្ងៃទី២ មីនា) ដើម្បីពិភាក្សាចំណុចខ្វែងគ្នា មុននឹងឈានទៅដល់កិច្ចព្រមព្រៀងនយោបាយមួយ ដែលគេកំណត់ធ្វើឲ្យបានមុនថ្ងៃទី ៣១ មីនា។
អ៊ីស្រាអែលវិញជឿថា សភាអាមេរិកអាចបោះឆ្នោត ដាក់ទណ្ឌកម្មសេដ្ឋកិច្ចទៅលើអ៊ីរ៉ង់ បើទោះបីមានសិទ្ធិវេតូពីលោកប្រធានាធិបតី។ ដូច្នេះ នៅចំពោះមុខអ្នកតំណាងរាស្ត្រ អ៊ីស្រាអែលត្រូវតែនិយាយបញ្ចុះបញ្ចូលឲ្យខានតែបានថា កិច្ចព្រមព្រៀង ដែលលោកអូបាម៉ាកំពុងចង់ធ្វើជាមួយអ៊ីរ៉ង់នោះ នឹងមិនអាចបញ្ឈប់អ៊ីរ៉ង់ឲ្យលះបង់ចោលមហិច្ឆតាផលិតអាវុធនុយក្លេអ៊ែរនោះទេ។
អ៊ីស្រាអែល បារម្ភខ្លាចថា កិច្ចព្រមព្រៀងអន្តរជាតិដែលប្រទេសមហាអំណាចអាចរកឃើញ ជាមួយ អ៊ីរ៉ង់ នឹងអាចធ្វើឲ្យអ៊ីរ៉ង់ រួចខ្លួនពីការដាក់ទណ្ឌកម្មសេដ្ឋកិច្ច ប៉ុន្តែ ផ្ទុយទៅវិញ វានឹងមិនជួយទប់ស្កាត់អ៊ីរ៉ង់ឲ្យឈប់ផលិត អាវុធនុយក្លេអ៊ែរ ដែលជាគ្រោះថ្នាក់ គំរាមកំហែងសន្តិសុខ និងវត្តមានអ៊ីស្រាអែល នៅតំបន់ដើមបូព៌ានោះទេ។
ទស្សនកិច្ចរបស់លោកបិនចាមីន នេតានីញ៉ាហ៊ូនៅអាមេរិកកំពុងទទួលរងការរិះគន់ មិនធ្លាប់មាន ពីរដ្ឋបាលលោកអូបាម៉ា
តាមមន្រ្តីអ៊ីស្រាអែល នៅថ្ងៃអង្គារស្អែក លោកនាយករដ្ឋមន្រ្តីអ៊ីស្រាអែលនឹងបង្ហាញពីលក្ខខណ្ឌលម្អិត ដែលមាននៅក្នុងការចរចា បច្ចុប្បន្ន រវាងអ៊ីរ៉ង់ និងក្រុមភាគីចរចា ៥ភាគីបូក ១នោះ។
សម្រាប់អាមេរិក ការលើកនិយាយពីចំណុចដែលគេកំពុងចរចា យ៉ាងសម្ងាត់ ជាមួយអ៊ីរ៉ង់ នឹងអាចបង្កឧបសគ្គដល់អាមេរិក នៅក្នុងដំណើរការចរចាជាមួយអ៊ីរ៉ង់។ អាមេរិកបានព្រមានអ៊ីស្រាអែលពីរឿងនេះ មួយលើក ជាពីរលើក និងបានប្រកាសឈប់ចែករំលែកព័ត៌មានសម្ងាត់ជាមួយអ៊ីស្រាអែលតទៅទៀត។ នៅពេលដែលរដ្ឋាភិបាលអ៊ីស្រាអែលគិតថា អាមេរិកលែងជឿទុកចិត្តខ្លួន អ៊ីស្រាអែល ក៏លែងអាចជឿទុកចិត្ត ឲ្យអាមេរិករបស់លោកអូបាម៉ា ថា នឹងជួយដោះស្រាយកង្វល់របស់ខ្លួន ជាពិសេសរឿងកម្មវិធីនុយក្លេអ៊ែររបស់អ៊ីរ៉ង់។ ដូច្នេះ អ៊ីស្រាអែលក៏លែងខ្វល់ថា តើរដ្ឋាភិបាលអាមេរិកត្រូវអាក់អន់ ចិត្ត ជាថ្មីដែរ ទេ។ ក្នុងហេតុផលនេះហើយ បានជាអ៊ីស្រាអែលនិយាយថា គេនឹងទម្លាយព័ត៌មានស្តីពីការចរចា ទៅសភាអាមេរិកនៅថ្ងៃស្អែកនោះ។
ជារួម ចាប់តាំងពីអូបាម៉ាបានសន្យា ថា នឹងដោះស្រាយវិបត្តិនុយក្លេអ៊ែរឲ្យបាននៅក្នុងអាណត្តិរបស់លោក ទំនាក់ទំនងរវាងអាមេរិក និងអ៊ីស្រាអែល ជាពិសេស រវាងប្រមុខដឹកនាំរបស់ប្រទេសទាំងពីរតែម្តង បានចុះល្អក់កករនឹងគ្នា ជាលំដាប់។ ជាក់ស្តែង នៅក្នុងទស្សនកិច្ចលើកនេះ នៅក្នុងទឹកដីអាមេរិក លោកអូបាម៉ា បាននិយាយហើយថា លោកនឹងមិនទទួលជួបលោកបិនចាមីន នេតានីញ៉ាហ៊ូនោះទេ។ តាមភាសាការទូត សេតវិមាននិយាយថា លោកអូបាម៉ាមិនអាចជួបលោកនាយករដ្ឋមន្រ្តីអ៊ីស្រាអែល ដែលជាបេក្ខជនបោះឆ្នោតនាយករដ្ឋមន្រ្តី នៅខែនេះក្នុងប្រទេសអ៊ីស្រាអែល ព្រោះដើម្បីជៀសវាងកុំឲ្យគេចោទលោកថា លំអៀង កាន់ជើង គណបក្សណាមួយ។
នេះ ជាភាសាការទូត ប៉ុន្តែ បើនិយាយពីកំហុសបច្ចេកទេសពិធីការវិញ សេតវិមានបាននិយាយថា លោក បិនចាមីន នេតានីញ៉ាហ៊ូបានធ្វើដំណើរទៅអាមេរិក ដោយមិនបានជូនដំណឹងជាមុនទៅលោកអូបាម៉ា។ តាមលោកចនឃេរី វាជាលើកទីមួយ និងមិនធ្លាប់មានពីមុនមក ដែលប្រមុខដឹកនាំប្រទេសមួយ បានធ្វើដំណើរទៅក្នុងទឹកដីអាមេរិក ដោយមិនបានជូនដំណឹង សុំទៅប្រមុខដឹកនាំរបស់អាមេរិកជាមុន។ នៅអាមេរិក លោក បិនចាមីន នេតានីញ៉ាហ៊ូនឹងមិនត្រូវបានទទួលគារវកិច្ចពីលោកអូបាម៉ា។
លោកអនុប្រធានាធិបតីអាមេរិក វិញ ដែលធ្លាប់តែទៅស្តាប់បទអន្តរាគមន៍របស់មេដឹកនាំបរទេស នៅសភា ក៏នឹងមិនទៅចូលស្តាប់ការថ្លែងសុន្ទរកថា របស់លោកនាយករដ្ឋមន្រ្តី អ៊ីស្រាអែល នៅថ្ងៃអង្គារ ដែរ ក្នុងហេតុផលដំណើរទស្សនកិច្ចរបស់លោក ទៅបរទេស៊ ចំណែកប្រមុខការបរទេសអាមេរិក លោកចន ឃេរី ក្នុងពេលដែលលោក បិនចាមីន នេតានីញ៉ាហ៊ូទៅដល់ទឹកដីអាមេរិក នៅថ្ងៃអាទិត្យ លោកក៏បានចាកចេញពីអាមេរិកសំដៅទីក្រុងហ្សឺណែវ ដើម្បីជួបចរចា រយៈពេលបីថ្ងៃជាមួយសមភាគីអ៊ីរ៉ង់ ក្នុងសំណុំរឿងនុយក្លេអ៊ែរអ៊ីរ៉ង់នេះ។
ជារួមក្នុងវត្តមានរបស់លោកនៅទឹកដីអាមេរិក លោកនាយកដ្ឋមន្រ្តី អ៊ីស្រាអែលនឹងមិនបានជួបមន្រ្តីរដ្ឋាភិបាលអាមេរិកណាម្នាក់ទេ សូម្បីតែបក្សកាន់អំណាចក៏គ្មានដែរ។ ពោលគឺលោកជួបតែអ្នកតំណាងរាស្រ្តមកពីគណបក្សប្រឆាំង ដែលលោកជឿថា ជាអ្នកចង់ឲ្យអាមេរិកដាក់ទណ្ឌកម្មទៅលើអ៊ីរ៉ង់ តែប៉ុណ្ណោះ។ ប៉ុន្តែ អ្វីដែលចោទជាបញ្ហាគឺថា បើសិនលោក បិនចាមីន នេតានីញ៉ាហ៊ូជាប់ឆ្នោត ធ្វើជានាយរដ្ឋមន្រ្តីនៅអាណត្តិទីបី នៅអ៊ីស្រាអែល នោះ លោកត្រូវប្រឈមមុខជាថ្មីនឹងលោកអូបាម៉ា ដែលបានសន្យាថា នឹងបញ្ចប់វិបត្តិនុយក្លេអ៊ែរ ជាមួយអ៊ីរ៉ង់ ឲ្យបាន នៅក្នុងអាណត្តិរបស់លោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ