លោកចនឃេរី៖ ការប្រែប្រួលអាកាសធាតុគំរាមកំហែងសន្តិសុខពិភពលោក
លោកប្រមុខការបរទេសអាមេរិក ចន ឃេរី បានព្រមានកាលពីថ្ងៃសៅរ៍ម្សិលមិញ ថា ការឡើងកំដៅ នៃភពផែនដីបានគំរាមកំហែងសន្តិសុខពិភពលោក។ ក្នុងសុន្ទរកថា ថ្លែងទៅកាន់អ្នកតំណាងរដ្ឋាភិបាលមកពីប្រទេសជាង ១៤០ នៅក្នុងពិព័រណ៌ សកល នៅទីក្រុងមីឡង់ ប្រទេសអ៊ីតាលី រដ្ឋមន្រ្តីការបរទេសអាមេរិកបានទាមទារជាថ្មី ឲ្យគ្រប់ប្រទេសចូលរួមកាត់បន្ថយ ឧស្ម័នផ្ទះកញ្ចក់ ដើម្បីជួយទប់កុំឲ្យកំដៅផែនដី កើនឡើង ច្រើនជាង ២អង្សារសេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ការប្រែប្រួលអាកាសធាតុមិនត្រឹមគំរាមកំហែងសន្តិសុខស្បៀងតែប៉ុណ្ណោះទេ ប៉ុន្តែ វាគំរាមកំហែងសន្តិសុខពិភពលោកទាំងមូល។ លោកប្រមុខការបរទេសអាមេរិក បានព្រមានយ៉ាងដូច្នេះ នៅក្នុងពេលលោកថ្លែងសុន្ទរកថា នៅក្នុងពិព័រណ៌សកល ក្នុងក្រុងមីឡង់ ប្រទេសអ៊ីតាលី កាលពីថ្ងៃសៅរ៍ម្សិលមិញ។
តាមរដ្ឋមន្រ្តីការបរទេសអាមេរិក ការប្រែប្រួលអាកាសធាតុជាមូលហេតុចំបងមួយ ក្នុងចំណោមមូលហេតុច្រើនដទៃទៀត ដែលធ្វើឲ្យអឺរ៉ុបជួបក្រពុលមុខនឹងវិបត្តិជនភៀសខ្លួន ហើយនិងសង្រ្គាម នៅស៊ីរី។ វាមិនមែនជារឿងចៃដន្យទេ ដែលសង្រ្គាមស៊ីវិលផ្ទុះឡើង នៅស៊ីរី។ ប្រទេសនេះបានជួបគ្រោះរាំងស្ងួតធ្ងន់ធ្ងរ ដែលធ្វើប្រជាជនជាង ១លាន ៥សែននាក់ ធ្វើចំណាកស្រុក ទៅរស់នៅទីក្រុង។ គ្រោះរាំងស្ងួតមិនមែនជាអ្នកជំរុញ ដោយផ្ទាល់ ឲ្យមានសង្រ្គាម ទេ ប៉ុន្តែ វាមានលទ្ធភាព ធ្វើឲ្យរងើកភ្លើងសង្រ្គាមឆាបឆេះឡើង ហើយនិងបង្កការស្មុគស្មាញ ដល់ថ្នាក់ដឹកនាំប្រទេស។
“ប្រាកដណាស់ សង្រ្គាមនៅស៊ីរី បច្ចុប្បន្នមិនមែនកើតឡើងដោយសារតែការប្រែប្រួលអាកាសធាតុទេ។ សង្រ្គាមស៊ីរី ផ្ទុះឡើង ដោយសារតែនយោបាយបង្រ្កាបហិង្សា ការបង្អត់អាហារ និងការធ្វើទារុណកម្ម ពីសំណាក់មេដឹកនាំផ្តាច់ការស៊ីរី។ ប៉ុន្តែ គេត្រូវទទួលស្គាល់ដែរថា គ្រោះរាំងស្ងួត ដែលបណ្តាលមកពីការប្រែប្រួលអាកាសធាតុ បានធ្វើឲ្យវិបត្តិនយោបាយស៊ីរី កាន់តែធ្លាក់ធ្ងន់ធ្ងរ នៅឆ្នាំ ២០១១។”។ នេះជាការវិភាគរបស់លោកចន ឃេរី។
ប្រមុខការបរទេសអាមេរិក នៅបានលើកឡើងថា វិបត្តិជនភៀសខ្លួនដែលអឺរ៉ុបកំពុងប្រឈម សព្វថ្ងៃ កើតមានឡើងដោយសារតែការប្រែប្រួលអាកាសធាតុ។ អឺរ៉ុបនឹងជួបវិបត្តិជនភៀសខ្លួនធ្ងន់ធ្ងរជាងនេះទៅទៀត ប្រសិនបើទឹកដីមួយផ្នែករបស់ផែនដី ត្រូវគេបោះបង់ចោល លែងរស់នៅ ដោយសារតែគ្រោះរាំងស្ងួត ឬដោយសារការឡើងនៃកម្រិតទឹកសមុទ្រជាដើម។
រដ្ឋមន្រ្តីការបរទេស អាមេរិក បានឆ្លៀតឱកាសយកពិព័រណ៌ សកល នៅមីឡង់ ដើម្បីនិយាយពីសារសំខាន់នៃកិច្ចព្រមព្រៀង ដែលគេត្រូវរកឲ្យបាន នៅក្នុងសន្និសីទអង្គការសហប្រជាជាតិស្តីពីការប្រែប្រួលអាកាសធាតុ ដែលត្រូវរៀបចំធ្វើនៅក្រុងប៉ារីស នៅដើមខែធ្នូ ដែលនៅក្នុងនោះ ប្រទេសឧស្សាហកម្មត្រូវសន្យា ចូលរួមកាត់បន្ថយការបញ្ចេញឧស្ម័នផ្ទះកញ្ចក់ ដើម្បីធ្វើទប់ទល់កុំឲ្យកំដៅផែនដីកើនឡើង ខ្ពស់ជាង ២អង្សារសេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ