អាមេរិក៖បើគ្មានការវិលវិញនូវលទ្ធិប្រជាធិបតេយ្យទេ ក៏គ្មានការភ្ជាប់សម្ព័ន្ធភាពយោធាពេញលេញអាមេរិក-ថៃដែរ
នៅថ្ងៃព្រហស្បតិ៍ ទី៥ កុម្ភៈ មន្រ្តីការទូតអាមេរិកម្នាក់នៃក្រសួងការបរទេសបានព្រមានប្រទេសថៃថា បើរបបសឹកដែលកំពុងកាន់អំណាចនៅថៃសព្វថ្ងៃមិនព្រមវិលមករកគន្លងប្រជាធិបតេយ្យវិញទេ នោះសហរដ្ឋអាមេរិកក៏មិនអាចភ្ជាប់សម្ព័ន្ធភាពយោធាពេញលេញជាមួយថៃដូចដើមវិញបានដែរ។ ពាក្យព្រមានរបស់មន្រ្តីការទូតជាន់ខ្ពស់អាមេរិកពេលនេះបានធ្វើឡើង ប៉ុន្មានថ្ងៃក្រោយពីដំណើរទស្សនកិច្ចរបស់លោកអនុរដ្ឋមន្រ្តីការបរទេសអាមេរិកទទួលបន្ទុកកិច្ចការអាស៊ី Daniel Russel ក្នុងទីក្រុងបាងកក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
គឺនៅចំពោះមុខអ្នកកាសែតមួយក្រុមតូចក្នុងទីក្រុងវ៉ាស៊ីនតោនដែលមន្រ្តីការទូតជាន់ខ្ពស់អាមេរិកបានថ្លែងយ៉ាងដូច្នេះថា ដើម្បីអាចឲ្យសម្ព័ន្ធភាពយោធារវាងថៃ និងអាមេរិកវិលមករកភាពប្រក្រតីឡើងវិញបាន គេត្រូវតែបង្កើតឲ្យមានឡើងវិញនូវស្ថាប័នអភិបាលកិច្ចល្អ និងតុលាការ។ អ្វីដែលមន្រ្តីការទូតអាមេរិករូបនោះចង់ផ្តោតសំខាន់ គឺការវិលវិញនូវរដ្ឋាភិបាលស៊ីវិលដែលជាប់ឆ្នោតតាមបែបលទ្ធិប្រជាធិបតេយ្យ។ ប្រតិកម្មធ្ងន់ៗរបស់មន្រ្តីការទូតជាន់ខ្ពស់អាមេរិកចំពោះរបបសឹកក្រុងបាងកកពេលនេះបានធ្វើឡើង ប៉ុន្មានថ្ងៃក្រោយពីដំណើរទស្សនកិច្ចរបស់លោកអនុរដ្ឋមន្រ្តីការបរទេសអាមេរិកទទួលបន្ទុកកិច្ចការអាស៊ី Daniel Russel ក្នុងប្រទេសថៃ។ លោក Daniel Russel បានយល់ឃើញថា ការប្រើប្រព័ន្ធតុលាការជាមធ្យោបាយដើម្បីប្រឆំាងលោកស្រីអតីតនាយករដ្ឋមន្រ្តីយីងឡាក់ប្រហែលជាមានបង្កប់ដោយរឿងនយោបាយ។
គឺជាបទអត្ថាធិប្បាយមួយដែលបានធ្វើឲ្យនាយករដ្ឋមន្រ្តី ឧត្តមសេនីយប្រយុទ្ធ ចាន់អូចាក្តៅស្លឹកត្រចៀក និងចេញមុខបរិហារភ្លាមៗ។ គួររម្លឹកជូនឡើងវិញថា ក្នុងខែឧសភាឆ្នំា ២០១៤ កន្លងទៅ អាមេរិកក៏បានថ្កោលទោសរដ្ឋប្រហារយោធានៅថៃ ហើយលោកប្រមុខការទូតអាមេរិកចន ឃ៊ែរីក៏បានអំពាវនាវឲ្យមានការវិលត្រឡប់វិញនូវអំណាចស៊ីវិលតាមរយៈការបោះឆ្នោតដែរ។ នៅថ្ងៃព្រហស្បតិ៍ ទី៥ មករា លោកស្រី Marie Harf អ្នកនំាពាក្យក្រសួងការបរទេសអាមេរិកបានរម្លឹកឡើងវិញថា ទំនាក់ទំនងថៃ និងអាមេរិក ជាទំនាក់ទំនងមិត្តភាពដ៏យូរលង់ និងសម្ព័ន្ធមិត្តដ៏ជិតស្និទ្ធ។ តែទោះជាយ៉ាងនេះក្តី លោកស្រី Marie បានបញ្ជាក់ថា អាមេរិកនៅតែបន្តជម្រុញរដ្ឋាភិបាលក្រុងបាងកកឲ្យចាត់វិធានការជាបន្ទាន់ដើម្បីនំាថៃវិលទៅរកគន្លងប្រជាធិបតេយ្យជាថ្មី។
សូមជម្រាបជូនថា ទីក្រុងវ៉ាស៊ីនតោន និងបាងកកបានផ្តើមសម្ព័ន្ធភាពយោធារវាងគ្នាតំាងពីសម័យសង្រ្គាមត្រជាក់ និងតំាងពីសម័យយុទ្ធនាការប្រឆំាងរបបកុម្មុយនិស្តនៅអាស៊ីអាគ្នេយ៍ ពិសេសក្នុងសម័យសង្រ្គាមវៀតណាម។ ទ័ពអាមេរិក និងថៃតែងតែធ្វើសមយុទ្ធជារៀងរាល់ឆ្នំា តែតំាងពីក្រោយរដ្ឋប្រហារយោធា អាមេរិកបានលប់ចោលសមយុទ្ធនេះ ព្រមទំាងផ្អាកជំនួយមួយចំនួននៅក្នុងវិស័យការពារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ