កាត់បន្ថយការបំពុលបរិយាកាសនឹងអាចជួយសង្រ្គោះជីវិតមនុស្សរាប់លាននាក់
ក្នុងមួយឆ្នាំៗ សារធាតុពុលក្នុងបរិយាកាស ជាឃាតករសម្លាប់ជីវិតមនុស្សជាង ៣លាន២សែន នាក់។ ប៉ុន្តែ តាមការសិក្សារបស់អ្នកជំនាញបរិស្ថាន ដែលចេញផ្សាយ នៅថ្ងៃអង្គារ ទី ១៦ មិថុនា គេអាចកាត់បន្ថយចំនួនមនុស្សស្លាប់មុនអាយុ បានប្រមាណ ២លាននាក់ ក្នុងមួយឆ្នាំៗ ឯណោះ ប្រសិនបើគេគោរពឲ្យបានខ្ជាប់ខ្ជួន នូវបរិមាណ សារធាតុពុល ក្នុងខ្យល់បរិយាកាស ដែលកំណត់អង្គការសុខភាពពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
តាមអង្គការសុខភាពពិភពលោក ខ្យល់ពុលបរិយាកាសសម្លាប់មនុស្សមុនអាយុ ជាង៣លាននាក់ ក្នុងមួយឆ្នាំៗ គឺស្មើនឹងចំនួនមនុស្សស្លាប់ដោយជម្ងឺអេដស៍ និងជម្ងឺគ្រុនចាញ់បូកបញ្ចូលគ្នា។
មនុស្សភាគច្រើន នៅលើភពផែនដី រស់នៅជាមួយជាតិពុល ដែលមានកម្រិត ១០មីក្រូក្រាម ក្នុងខ្យល់មួយលីត្រ។ គឺជាចំនួនដែលកំណត់ ទាមទារដោយអង្គការសុខភាពពិភពលោក។ ក៏ប៉ុន្តែ នៅក្នុងតំបន់ខ្លះ នៃប្រទេសចិន និងឥណ្ឌា សារធាតុពុល ក្នុងខ្យល់បរិយាកាស មានដល់ទៅ ១០០មីក្រូក្រាមឯណោះ។ ករណីប្រទេសចិន និងឥណ្ឌា ត្រូវបានអ្នកជំនាញ លើកយកមកនិយាយច្រើនជាងគេ នៅក្នុងព្រឹត្តិប័ត្រ វិទ្យាសាស្រ្តបរិស្ថាន និងបច្ចេកវិទ្យា អាមេរិក ដែលចេញផ្សាយ នៅថ្ងៃអង្គារនេះ។
អ្នកជំនាញកំពុងសិក្សាស្រាវជ្រាវលើបណ្តុំសារធាតុពុល ក្នុងខ្យល់បរិកាស ដែលអាចចូលទៅក្នុងសួត និងធ្វើឲ្យមនុស្សអាចងាយជួបជម្ងឺគាំងបេះដូង គ្រោះថ្នាក់ដាច់សរសៃឈាម ឬជម្ងឺមហារីកសួតជាដើម។ សារធាតុពុលទាំងនោះ ភាគច្រើន មានចេញមកពីផ្សែងឡាន ពីរោងចក្រឧស្សាហកម្ម ឬរោងចក្រអគ្គិសនី ដែលដើរដោយធ្យូងថ្ម។ នៅក្នុងប្រទេសក្រីក្រ ផ្សែងពុលកើតចេញពីចង្រ្កានប្រើអុសធ្យូង ដែលមនុស្សប្រើដើម្បីចំអិនអាហារ ឬបង្កើតកម្តៅ នៅរដូវត្រជាក់។
តាមអ្នកជំនាញ ដើម្បីកាត់បន្ថយចំនួនមនុស្សស្លាប់ ដោយសារសារធាតុពុល ក្នុងខ្យល់បរិយាកាស ឲ្យបានពាក់កណ្តាល ប្រទេស ដែលមានខ្យល់ពុលបរិយាកាសច្រើនជាងគេ ត្រូវកាត់បន្ថយសារធាតុពុល ឲ្យបាន៦៨ភាគរយ នៃបណ្តុះដង់ស៊ីតេ របស់វា។ នៅប្រទេសចិន និងឥណ្ឌា ដែលមានប្រជាជនច្រើនជាងគេនៅក្នុងពិភពលោក គេត្រូវកាត់បន្ថយជាតិពុលឲ្យបានយ៉ាងតិច ៣០ភាគរយ ដើម្បីរក្សាចំនួនមរណភាពឲ្យនៅនឹងថ្កល់។ បើសិន កម្រិតជាតិពុល ក្នុងបរិយាកាស គ្មានប្រែប្រួល នៅតែច្រើន ដូចបច្ចុប្បន្ននោះ គេវាយតម្លៃថា ចំនួនមនុស្សស្លាប់ មុនអាយុ ដោយសារផ្សែងពុល នឹងអាចកើនឡើង ប្រមាណ២១ភាគរយ នៅឥណ្ឌា និង២៣ភាគរយ នៅប្រទេសចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ