មូលនិធិរូបិយវត្ថុអន្តរជាតិផ្តល់ពិន្ទុប្រសើរជាងមុនដល់ការវាយតម្លៃប្រាក់យ័នរបស់ចិន
ចុះផ្សាយនៅថ្ងៃ៖
ស្តាប់ - ០៤:០៥
របាយការណ៍របស់មូលនិធិរូបិយវត្ថុអន្តរជាតិចេញផ្សាយកាលពីដើមសប្តាហ៍កន្លងទៅនេះបានបង្ហាញឲ្យឃើញថាប្រាក់យ័នរបស់ចិនលែងមានតម្លៃថោកមិនប្រក្រតីទៀតហើយដែលខុសអំពីការអះអាងរបស់សហរដ្ឋអាមេរិក។ចំណែកប្រទេសចិនដែលតែងតែព្យាយាម គ្រប់ មធ្យោបាយដើម្បីបង្កើនចរាចរណ៍ប្រាក់យ័នលើឆាកអន្តរជាតិពិតរីករាយនឹងរបាយការណ៍នេះ។
អស់រយៈពេលជាងពីរទសវត្សរ៍មកហើយដែលសហរដ្ឋអាមេរិកក្នុងនាមជាដៃគូរពាណិជ្ជកម្មឈរលំដាប់ទីមួយរបស់ចិនក៏ដូចជាដៃគូសំខាន់ៗផ្សេងៗទៀតរបស់ចិនបានត្អូញត្អែរពីការកំណត់តម្លៃប្រាក់យ័នក្នុងតម្លៃថោកហើយក្នុងនោះការប្តូរប្រាក់ក៏ឋិតនៅក្រោមការត្រួតត្រាដ៏តឹងរ៉ឹងដើម្បីជាប្រយោជន៍នៃការនាំចេញផលិតផលរបស់មហាយក្សចិនមួយនេះ។មូលនិធិរូបិយវត្ថុអន្តរជាតិមានទីស្នាក់ការកណ្តាលនៅរដ្ឋធានីវ៉ាស៊ីនតោន និងមានតួនាទីក្នុងការធានា នូវស្ថិរភាពនៃប្រព័ន្ធរូបិយវត្ថុអន្តរជាតិ និងក្នុងការគ្រប់គ្រងវិបត្តិរូបិយវត្ថុនិងហិរញ្ញវត្ថុ។
តាមរបាយការណ៍របស់ស្ថាប័នអន្តរជាតិនេះបានសបញ្ជាក់ឲ្យឃើញថា ការវាយតម្លៃត្រឹមត្រូវនិងពិត ប្រាកដនៃប្រាក់យ័ន បានធ្វើឲ្យអត្រាប្តូរប្រាក់ឈានទៅរកកំរិតមួយដែលលែងជាការ កណត់តម្លៃថោក នៃប្រាក់យ័នទៀតហើយ។ ពិតណាស់ថាកាលពីអតីតកាល ការ វាយតម្លៃ ថោកនៃប្រាក់យ័ន គឺជាកត្តា មួយដ៏ចំបងដែលបណ្តាលឲ្យមានអស្ថិរភាពចំបងៗ តែឥឡូវនេះករណីនេះមិនមានទៀតនោះទេ។ តែ ទោះជាយ៉ាងណា មូលនិធិរូបិយវត្ថុអន្តរជាតិបាន ចង្អុល បង្ហាញពីភាពចាំបាច់ នៃការបន្តលៃតម្រូវអត្រាប្តូរ ប្រាក់ដើម្បីសម្របជាមួយនឹងការផ្លាស់ប្តូរជាមូលដ្ឋានសំខាន់ៗ។
ចំពោះភ្នែកសហរដ្ឋអាមេរិកវិញ រតនាគារជាតិអាមេរិកបានស្វាគមន៍ចំពោះការរីកចម្រើនដ៏ពិតប្រាកដ ក្នុងការវាយតម្លៃប្រាក់យ័ននេះក៏ពិតមែន ព្រោះយោងតាមរបាយការណ៍របស់ រតនាគារជាតិអាមេរិក បើ គិតបញ្ចូលទាំងការផ្តោះប្តូរពាណិជ្ជកម្មនិងអតិផរណាអត្រាប្តូរប្រាក់ពិតប្រាកដនៃរូបិយប័ណ្ណចិនបាន ឆ្លុះបញ្ចាំងពីកំណើនជាង១០% ធៀបនឹងប្រាក់ដុល្លារ ក្នុងរយៈពេលប្រាំមួយខែចុងក្រោយនេះ។ ក៏ប៉ុន្តែ រតនាគារជាតិអាមេរិកយល់ថាប្រាក់យ័ននៅតែមានតម្លៃទាបខ្លាំងនៅឡើយ។
បន្ទាប់ពីនៅទ្រឹងក្នុងរយៈពេលពីរឆ្នាំរហូតដល់ឆ្នាំ២០១០ ក្នុងរវាងតម្លៃ៦,៨២យ័នក្នុង១ដុល្លារ ប្រាក់យ័ន ក៏បានកើនតម្លៃរើបៗឡើងរហូតដល់ចំនុចកំពូលមួយ ក្នុងតម្លៃ៦,០៤យ័នក្នុង១ដុល្លារកាលពីខែមករាឆ្នាំ២០១៤។ ប៉ុន្តែបន្តិចក្រោយមកឥឡូវនេះ វាក៏ធ្លាក់ចុះបន្តិចវិញក្នុងតម្លៃរវាង៦,២០យ័នក្នុង១ដុល្លារ។ បើទោះជារយៈពេលចុងក្រោយនេះតម្លៃមានការប្រែប្រួលបន្តិចមែន តែជាការវាយតម្លៃដែលមូលនិធិរូបិយវត្ថុអន្តរជាតិបានសាទរ និងបន្តដាស់តឿនទីក្រុងប៉េកាំងឲ្យបន្តព្យាមយាមបង្កើននូវវិធានការដើម្បីការប្តូរប្រាក់យ័នមានភាពងាយស្រួល និងព្រមទាំងស្នើឲ្យមានការបង្កើតប្រព័ន្ធប្តូរប្រាក់អណ្តែតក្នុងរយៈពេល ពីរ បីឆ្នាំខាងមុខនេះ។
មូលនិធិរូបិយវត្ថុអន្តរជាតិបានថែមទាំងសង្កត់ធ្ងន់ថា ការធ្វើសេរីភាវូបនីយកម្មនៃទីផ្សារប្តូរប្រាក់បរទេស គឺជាតម្រូវការដ៏សំខាន់មួយសម្រាប់សេដ្ឋកិច្ចដ៏ធំមួយនេះដែលកំពុងបោះជំហានចូលទៅក្នុងទីផ្សារហិរញ្ញវត្ថុសកល។ ឯរដ្ឋបាលក្រុងបេកាំាងក៏បានបង្ហាញពីឆន្ទៈក្នុងការបង្កើតប្រព័ន្ធប្តូរប្រាក់ផងដែរ តែក៏នៅតែមានបំណង ចៀសវាងមិនចង់ឲ្យមានលំហូរមូលធនដោយគ្មានការគ្រប់គ្រងនោះដែរ។
ទោះជាយ៉ាងណាក៏ដោយ ការដែលមូលនិធិរូបិយវត្ថុអន្តរជាតិផ្តល់ពិន្ទុប្រសើរជាងមុនចំពោះការវាយតម្លៃប្រាក់យ័ននៅពេលនេះ នឹងជួយពង្រឹងមហិច្ឆតារបស់ចិនក្នុងការពង្រីកការប្រើប្រាស់នៃរូបិយប័ណ្ណរបស់ ខ្លួននៅលើឆាកអន្តរជាតិ។ ជាក់ស្តែងធនាគារប្រជាជនចិន (ធនាគារកណ្តាល) ទើបនឹងបានចុះ ហត្ថលេខាលើកិច្ចព្រមព្រៀងដោះដូររូបិយប័ណ្ណជាមួយធនាគារកណ្តាលផ្សេងទៀតចំនួន២៨ រួមជាមួយ នឹងការបែងចែកកូតាវិនិយោគដោយផ្ទាល់ជាប្រាក់យ័ន។
លើសពីនេះ ទីក្រុងប៉េកាំងក៏រំពឹងថាក្នុងពេលឆាប់ៗខាងមុខនេះ ប្រាក់យ័ននឹងអាចត្រូវគេចាត់ថ្នាក់រួម បញ្ចូលជាមួយនឹង ប្រាក់ដុល្លាអាមេរិក ប្រាក់អឺរ៉ូរបស់អឺរ៉ុប ប្រាក់លីវរបស់អង់គ្លេស និងប្រាក់យេនរបស់ ជប៉ុន ដែលជាប្រភេទរូបិយបណ្ណទទួលបានសិទ្ធិពិសេសពីមូលនិធិរូបិយវត្ថុអន្តរជាតិក្នុងការបោះពុម្ភ។
គួរធ្វើកំណត់សំគាល់ថានៅខែមករាកន្លងទៅនេះ ក្រុមហ៊ុនហិរញ្ញវត្ថុអន្តរជាតិហៅកាត់ថា SWIFT បាន ប្រកាសថាប្រាក់យ័នបានកើនឡើងដល់លំដាប់ទីប្រាំនៃរូបិយប័ណ្ណដែលប្រើច្រើនជាងគេបំផុតសម្រាប់ ការទូទាត់អន្តរជាតិ។ បើប្រៀបទៅនឹងខែមករាឆ្នាំ២០១៣ ប្រាក់យ័នឋិននៅលំដាប់ទី១៣ ប៉ុណ្ណោះនៅ ក្នុងចំណាត់ថ្នាក់នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ