លោក Sepp Blatter លាចេញពីតំណែង បន្ទាប់ពីមានរឿងអាស្រូវពុករលួយក្នុង FIFA
ជារឿងដ៏គួរឲ្យភ្ញាក់ផ្អើលមួយ! ប្រធានសហព័ន្ធបាល់ទាត់ពិភពលោក (FIFA) លោក Sepp Blatter បានសម្រេចចិត្តលាចេញពីតំណែង នៅល្ងាចថ្ងៃអង្គារម្សិលមិញ។ ជាការលាចេញពីតំណែង បន្ទាប់ពីលោកមានរឿងអាស្រូវទទួលសំណូក នៅក្នុងពិភពលោកបាល់ទាត់។ ក្រោយពីការលាលែងពីតំណែងរបស់លោក Blatter ព្រះអង្គម្ចាស់របស់ហ្សកដានី អាលី និងអតីតកីឡាករឆ្នើមរបស់បារាំង លោក David Ginola ក៏បានប្រកាសឈរឈ្មោះសម្រាប់តំណែងនេះភ្លាមៗ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
លោក Sepp Blatter អាយុ ៧៩ឆ្នាំ ដែលបានកាន់តំណែងជាប្រធានសហព័ន្ធបាល់ទាត់ពិភពលោក (FIFA) អស់រយៈពេល ១៧ឆ្នាំ តាំងពីឆ្នាំ ១៩៩៨មក នៅល្ងាចថ្ងៃអង្គារម្សិលមិញ បានសម្រេចដើរចេញពីមុខងារនេះ បើទោះបីជាលោកទើបតែបានឈ្នះឆ្នោតភ្លូកទឹកភ្លូកដី ឲ្យបន្តអណ្តត្តិទី៥ កាលពីសប្តាហ៍មុនក៏ដោយ។
ការសម្រេចចិត្តលាចេញពីតំណែងនេះ ក៏បន្ទាប់ពីមានរលករឿងអាស្រូវទទួលសំណូកពុករលួយជាច្រើន ក្នុងរង្វង់ពិភពលោកបាល់ទាត់ កាលពីខែមុន។ លោក Sepp Blatter ត្រូវបានគេចោទប្រកាន់ថា បានទទួលសំណូក នៅពេលចាប់ឆ្នោតឲ្យប្រទេសរុស្ស៊ីធ្វើជាម្ចាស់ផ្ទះរៀបចំការប្រកួតបាល់ទាត់ពិភពលោក World Cup នៅឆ្នាំ ២០១៨ និងឲ្យកាតា ធ្វើជាម្ចាស់ផ្ទះ នៅឆ្នាំ ២០២២។ កាលពីថ្ងៃពុធសប្តាហ៍មុន អាជ្ញាធរ ក្រោមការបង្គាប់បញ្ជាពីរដ្ឋអាជ្ញាអាមេរិក បានចូលទៅក្នុងសណ្ឋាគារ Zurich ប្រទេសស្វីស ហើយបានចាប់ខ្លួនមន្ត្រី FIFA ៧នាក់។
អ្នកដែលបានបោះឆ្នោតគាំទ្រលោក Blatter គឺអតីតតារាបាល់ទាត់ប្រេស៊ីលដ៏ល្បីល្បាញ លោក Pele មានការរន្ធត់ចិត្តយ៉ាងខ្លាំង ចំពោះការលាលែងរបស់លោកBlatter។ ប៉ុន្តែលោក បានសំណូមពរឲ្យមានជនដែលយល់ថាខ្លួនស្មោះត្រង់ ត្រូវចេញមកជម្រះមន្ទិល ចំពោះភាពពុករលួយក្នុង FIFA ។ ប្រធានាធិបតីរុស្ស៊ីលោក វ៉្លាឌីមៀរ ពូទីន ក៏បានសម្តែងការខកបំណងមិនស្ទើរដែរ ចំពោះដំណឹងនេះ ខណៈសប្តាហ៍មុន លោកបានសាទរយ៉ាងខ្លាំង ចំពោះការជាប់ឆ្នោតក្នុងអាណត្តិទី៥ របស់លោក Sepp Blatter។
ក្រោយការលាលែងរបស់លោក Sepp Blatter FIFA បានប្រកាសថានឹងបើកកិច្ចប្រជុំវិសាមញ្ញ នៅក្នុងពេលឆាប់ៗខាងមុខ ដើម្បីជ្រើសរើសប្រធានថ្មី។ អតីតកីឡាករឆ្នើមរបស់បារាំងលោក David Ginola និងព្រះអង្គម្ចាស់ប្រទេសហ្ស៊កដានី Ali Bin Al-Hussein ដែលទើបចាញ់ការបោះឆ្នោតប្រជែងជាមួយលោក Blatter កាលពីសប្តាហ៍មុននោះ ក៏បានប្រកាសឈរឈ្មោះជាថ្មី សម្រាប់តំណែងប្រធាន FIFA ។
ទោះបីជាលោក Sepp Blatter ប្រកាសចេញពីតំណែងក៏ដោយ ប៉ុន្តែលោក Sepp Blatter កំពុងស្ថិតនៅក្រោមការស៊ើបអង្កេត ដោយមន្ត្រីអាមេរិក ជុំវិញរឿងរ៉ាវពុករលួយ ក្នុងពិភពបាល់ទាត់ដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ