SpaceX បង្ហោះយានថ្មីទៅ ស្ថានីយ៍អវកាសអន្តរជាតិ ក្រោយបរាជ័យ២លើក
ក្រុមហ៊ុនអវកាសឯកជន SpaceX កំពុងតែរៀបចំបាញ់បង្ហោះយានអវកាសថ្មីមួយ របស់ខ្លួន ដែលជាយានគ្មានមនុស្សបើក ដើម្បីនាំយកសម្ភារៈ និងបរិក្ខាវិទ្យាសាស្ត្រ ទៅកាន់ស្ថានីយ៍អវកាសអន្តរជាតិ។ នេះគឺជាការបាញ់បង្ហោះថ្មីមួយ របស់ក្រុមហ៊ុនអវកាសឯកជនវ័យក្មេងនេះ បន្ទប់ពីបានជួបបរាជ័យ ២លើក កាលពីឆ្នាំ ២០១៥ និង២០១៦។ អ្នកនាំពាក្យក្រុមហ៊ុននេះ បានបញ្ជាក់ថា ក្រុមហ៊ុនអាចនឹងបញ្ជូនយានអវកាសជាមួយមនុស្ស នៅរវាងឆ្នាំ២០២០។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
បើអ្វីៗប្រព្រឹត្តិតាមការគ្រោងទុក ជាមួយនឹងលក្ខខណ្ឌអាកាសធាតុអំណោយផល ជើងបង្ហោះ Falcon9 របស់ក្រុមហ៊ុន SpaceX នឹងនាំយកយាន Dragon ទៅកាន់ស្ថាន័យអវកាសអន្តរជាតិ(ISS) នៅវេលាម៉ោង៣រសៀល ម៉ោងសកល។ យាន Dragon នឹងចូលទៅដល់ខ្សែអកប៊ីត របស់ផែនដី នៅរវាងព្រឹកថ្ងៃចន្ទ។ ការបាញ់បង្ហោះ ត្រូវបានរៀបចំឡើងនៅថ្ងៃសៅរ៍ទី ១៨ កុម្ភៈនេះ នៅស្ថានីយ៍បាញ់បង្ហោះអវកាសKennedy ក្នុងរដ្ឋFlorida។ គឺស្ថានីយ៍នេះហើយ ដែលគេបានរៀបចំការបាញ់បង្ហោះយានអវកាស Apollo ឆ្ពោះទៅកាន់ឋានព្រះចន្ទ នៅឆ្នាំ១៩៦៩។
សូមបញ្ជាក់ថា យានDragon ដែលត្រូវបាញ់បង្ហោះនាពេលនេះ គឺមានផ្ទុកនូវក្បាលកាប់ស៊ុល ទំងន់២,២តោន ដែលសុទ្ធតែជាសម្ភារៈ និងបរិក្ខាវិទ្យាសាស្រ្ត សម្រាប់បំរើការងារនៅលើស្ថានីយ៍អវកាសអន្តរជាតិ ISS។ មុននឹងប្រកាសបញ្ជាក់ពីការបាញ់បង្ហោះនេះ កាលពីថ្ងៃសុក្រ ក្រុមហ៊ុន SpaceX បានប្រាប់ឲ្យដឹងអំពីបញ្ហាបច្ចេកទេស ក្រោយពីបានរកឃើញ រន្ធតូចមួយដែលធ្វើឲ្យធ្លាយជាតិHélium។ លោកស្រី Gwynne Shotwell អគ្គនាយកទូទៅរបស់ SpaceX បានបញ្ជាក់ថា គេបានជួសជុលរួចរាល់ហើយ។
សូមបញ្ជាក់ថា ការបាញ់បង្ហោះលើកនេះ ត្រូវបានអ្នកវិទ្យាសាស្ត្រ ក៏ដូចជាបុគ្គលិករបស់ SpaceX ខិតខំប្រឹងប្រែងអស់ពីសមត្ថភាព បន្ទាប់ពីការបាញ់បង្ហោះពីរលើក កាលពីឆ្នាំ២០១៥ និង២០១៦ បានជួបបរាជ័យ។ នៅខែមិថុនា ២០១៥ ជើងបង្ហោះFalcon 9 បានផ្ទុះ ប៉ុន្មាននាទី បន្ទាប់ពីបានហោះចេញពីដី។ ក្រោយមកនៅខែកញ្ញា ២០១៦ ម៉ាស៊ីនហ្វុយហ្សេបង្ហោះ បានផ្ទុះក្នុងពេលសាកល្បង ដោយបានបំផ្លាញប្រព័ន្ធសាទឺលីតរបស់អ៊ីស្រាអែល ក្នុងតំលៃ២០០លានដុល្លារ។
ថ្វីបើជួបបរាជ័យក្នុងការបាញ់បង្ហោះ២ដងពិតមែន តែក្រុមហ៊ុនSpaceX នៅតែជាក្រុមហ៊ុនអវកាសឯកជន វ័យក្មេង ដែលជាទីសង្ឃឹម និងពេញនិយមបំផុត។ អ្វីដែលចំណុចពិសេសរបស់ SpaceX គឺចំនួនទឹកប្រាក់ក្នុងការចំណាយ ដែលមានកំរិតទាបជាងគេ។
ជោគជ័យដ៏ធំរបស់ SpaceX គឺនាំយកមកវិញនូវជើងទំរជាន់ទីមួយនៃម៉ាស៊ីនហ្វុយហ្សេបង្ហោះ ឲ្យត្រឡប់មកផែនដីវិញ ដើម្បីអាចប្រើប្រាស់វាជាថ្មី។ ផ្នែកជាន់ទីមួយ នៃម៉ាស៊ីនហ្វុយហ្សេដែលមានកំពស់៤១ម៉ែត្រនេះ គឺជាផ្នែកដ៏សំខាន់ និងត្រូវការចំណាយច្រើនបំផុតក្នុងការផលិត។ ការដែលអាចយកវាត្រលប់មកវិញ ដើម្បីប្រើប្រាស់ច្រើនដង គឺជាការសន្សំការចំណាយដ៏ចំបង។ ថ្វីបើជាបេសកកម្មដ៏លំបាក តែរហូតមកទល់ពេលនេះ SpaceX បានយកផ្នែកនេះត្រលប់មកផែនដីវិញ ប្រកបដោយជោគជ័យចំនួន៧ដង រួចមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ