អាមេរិកបដិសេធមិនសហការជាមួយកូរ៉េខាងជើងក្នុងរឿងស្វែងរកមុខចោរអ៊ីនធ័រណេត
អាមេរិកបានទាត់ចោលសំណើរបស់កូរ៉េខាងជើង ដែលចង់ចូលរួមនៅក្នុងដំណើរការស៊ើបអង្កេតរកមុខចោរអ៊ីនធ័រណេត ដែលបានវាយប្រហារព័ត៌មានវិទ្យាទៅលើក្រុមហ៊ុនភាពយន្តហូលីវូដ សូនី។ កាលពីថ្ងៃសៅរ៍ ទី ២០ធ្នូ វ៉ាស៊ីនតោនទើបតែបានសុំទីក្រុងប៉េកាំងឲ្យជួយទប់ស្កាត់ការវាយប្រហារតាមអ៊ីនធ័រណេត ដែលវ៉ាស៊ីនតោនសន្និដ្ឋានថា មានប្រភពចេញពីកូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
វ៉ាស៊ីនតោននៅតែប្រកាន់ជំហរម៉ឺងម៉ាត់ថា កូរ៉េខាងជើងជាអ្នកទទួលខុសត្រូវ ប្រព្រឹត្តផ្ទាល់ ក្នុងរឿងវាយប្រហារតាមអ៊ីនធ័រណេតទៅលើក្រុមហ៊ុនហូលីវូដ សូនី។ ប៉ុន្តែ ទីក្រុងព្យុងយ៉ាង នៅតែបដិសេធជាប់ជានិច្ច។ កាលពីល្ងាចថ្ងៃសៅរ៍ ថ្ងៃដែលអាមេរិកបានប្រកាសថា បានសុំជំនួយពីទីក្រុងប៉េកាំង សម្ព័ន្ធមិត្តរបស់កូរ៉េខាជើង ឲ្យជួយទប់ស្កាត់កុំឲ្យមានការវាយប្រហារតាមអ៊ីនធ័រណេតពីសំណាក់កូរ៉េខាងជើង តទៅទៀតនោះ ទីក្រុងព្យុងយ៉ាង ដែលនៅតែបញ្ជាក់ភាពស្អាតស្អំរបស់ខ្លួន បានអះអាងថា ខ្លួនចង់ចូលរួមស៊ើបអង្កេតជាមួយអាមេរិក ដើម្បីស្វែងរកមុខក្រុម Hackers ចោរអ៊ីនធ័រណេតជាមួយអាមេរិក។
កូរ៉េខាងជើងបានបោះដៃទៅរក ប៉ុន្តែអាមេរិកបានបដិសេធមិនទទួលយកយ៉ាងដាច់អហង្កា។ តាមលោកMark Stroh អ្នកនាំពាក្យរបស់ក្រុមប្រឹក្សាសន្តិសុខជាតិ អាមេរិក បើសិនកូរ៉េខាងជើងចង់ជួយអាមេរិក ពិតប្រាកដមែន នោះ កូរ៉េខាងជើងគួរទទួលស្គាល់កំហុសរបស់ខ្លួនក្នុងរឿងវាយប្រហារព័ត៌មានវិទ្យា និងត្រូវសងសំណងទាំងអម្បាលម៉ានដែលក្រុមហ៊ុនបានខាតបង់ដោយសារចោរអ៊ីនធ័រណេតនេះ។
តាមមន្រ្តីអាមេរិក នៅក្នុងអំឡុងពេលពិភាក្សាស្តីពីសន្តិសុខអ៊ីនធ័រណេត ទាំងអាមេរិក និងចិនបានយល់ស្របគ្នា ថា ការប្រើព័ត៌មានវិទ្យាដើម្បីគោលដៅវាយប្រហារអ្នកដទៃ គឺជាឥរិយាបថមិនត្រឹមត្រូវ និងដែលគេមិនអាចទទួលយកបាន។
យោងតាមអ្នកទទួលខុសត្រូវម្នាក់របស់រដ្ឋបាលលោកអូបាម៉ា ដែលដកស្រង់សំដីដោយទីភ្នាក់ងារព័ត៌មានអង់គ្លេស Reurtes អាមេរិកកំពុងបង្កើតបណ្តាញមួយជាមួយនឹងប្រទេសមួយចំនួន ដើម្បីវាយប្រហារបកទៅវិញ ទៅលើចោរអ៊ីនធ័ណេតដែលបានចូលលួចយកទិន្នន័យរបស់ក្រុមហ៊ុនសូនី។ ប្រទេសដែលអាមេរិកកំពុងចង់សហការជាមួយ មានអង់គ្លេស អូស្ត្រាលី នូវែលហ្សេឡង់ កូរ៉េខាងត្បូង ជប៉ុន ចិន និងរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ