លោកអូបាម៉ា៖ពិភពលោកត្រូវប្រឹងប្រែងបន្ថែមនៅក្នុងយុទ្ធនាការប្រឆំាងនឹងការប្រែប្រួលអាកាសធាតុ
លោកប្រធានាធិបតីអាមេរិកអូបាម៉ាកំពុងបន្តដំណើរទស្សនកិច្ចនៅក្នុងទីក្រុងអានឆូរ៉េតនៃរដ្ឋអាឡាស្កា។ គឺជាទស្សនកិច្ចរយៈពេល ៣ថ្ងៃដើម្បីចូលរួមនៅក្នុងជំនួបកំពូលស្តីពីការប្រែប្រួលអាកាសធាតុក្នុងលោក។ ថ្លែងទៅកាន់អង្គប្រជុំនៅថ្ងៃចន្ទ ទី៣១ សីហា លោកអូបាម៉ាបានចាត់ទុកការឡើងកំដៅនៅក្នុងភពផែនដីជាបញ្ហាប្រឈមអាទិភាពនៃសតវត្សទី២១ និងទាញសញ្ញាអាសន្នថា ពិភពលោកនៅមិនទាន់បានប្រឹងប្រែងឲ្យអស់លទ្ធភាពក្នុងការប្រយុទ្ធប្រឆំាងនឹងការប្រែប្រួលអាកាសធាតុក្នុងភពផែនដីទេ។
ចុះផ្សាយនៅថ្ងៃ៖
ស្តាប់ - ០២:០០
គឺនៅក្នុងបទអន្តរាគមន៍ប្រកបដោយទឹកមុខដ៏ស្រងូតស្រងាត់ដែលលោកប្រធានាធិបតីអាមេរិកបារ៉ាក់ អូបាម៉ាបានទាញសញ្ញាអាសន្នស្តីពីភាពយឺតយ៉ាវខ្លំាងរបស់ពិភពលោកនៅក្នុងយុទ្ធនាការប្រយុទ្ធប្រឆំាងនឹងការឡើងកំដៅនៅក្នុងភពផែនដី។ យោងតាមលោកអូបាម៉ា ការប្រែប្រួលអាកាសធាតុក្នុងលោកកំពុងមានល្បឿនលឿនជាងការប្រឹងប្រែងទប់ស្កាត់របស់មនុស្សលោកទៅទៀត។ ត្រង់ចំណុចនេះ លោកអូបាម៉ាបានយល់ឃើញថា ពិភពលោកមានលទ្ធភាព និងសមត្ថភាពក្នុងការទប់ស្កាត់ការឡើងកំដៅនៅក្នុងបរិយាកាស តែនៅមិនទាន់បានប្រឹងប្រែងឲ្យអស់ពីកម្លំាងកាយ និងកម្លំាងចិត្តនៅឡើយទេ។
ភាពយឺតយ៉ាវនៅក្នុងយុទ្ធនាការប្រយុទ្ធប្រឆំាងនឹងការឡើងកំដៅលើភពផែនដីដែលលោកប្រធានាធិបតីអាមេរិកមិនញញើតនឹងស្តីបន្ទោសលើភាពសោះអង្គើយរបស់ថ្នាក់ដឹកនំាមួយចំនួនក្នុងលោក។ សម្រាប់លោកអូបាម៉ា ថ្នាក់ដឹកនំាប្រភេទនេះគ្មានភាពថ្លៃថ្នូរជាអ្នកដឹកនំាទេ។
« រាល់មេដឹកនំាណាដែលមិនបានយកចិត្តទុកដាក់ចំពោះបញ្ហាអាកាសធាតុ ឬមួយក៏គ្រាន់តែយកទៅនិយាយលេងសើច មិនមែនភាពថ្លៃថ្នូរជាអ្នកដឹកនំាទេ។ ទាក់ទងនឹងសំណុំរឿងនេះ ក៏ដូចជាសំណុំរឿងដទៃទៀត យើងនឹងទទួលហានិភ័យបើមិនបានចាត់វិធានការទាន់ពេលទេនោះ។ គឺនៅក្នុងន័យនេះហើយបានជាយើងទំាងអស់គ្នាកំពុងមានវត្តមាននៅទីនេះ »។
យោងតាមលោកអូបាម៉ា ចាប់ពីពេលនេះតទៅ ពិភពលោកត្រូវតែផ្តើមចាត់វិធានការជាក់ស្តែងក្នុងការប្រយុទ្ធប្រឆំាងនឹងការឡើងកំដៅនៅក្នុងបរិយាកាស ពោលមិនអាចបន្តឈរឱបដៃមើល និងបញ្ចេញតែទ្រឹស្តីទៀតឡើយ។ លោកអូបាម៉ាសង្ឃឹមថា សន្និសីទអន្តរជាតិស្តីពីអាកាសធាតុដែលត្រៀមរៀបចំក្នុងទីក្រុងប៉ារីស ប្រទេសបារំាងនៅដំណាច់ឆ្នំានេះ គឺជាឱកាសតែមួយគត់ដែលពិភពលោកត្រូវតែអនុម័តចេញនូវវិធានការជាក់ស្តែងពិតៗ ពោលមិនជាសន្និសីទដើម្បីជាការបង្រ្គប់កិច្ចនោះឡើយ។
គួរជម្រាបជូនថា ជម្រើសរដ្ឋអាឡាស្កាដើម្បីរៀបចំជំនួបកំពូលស្តីពីបញ្ហាអាកាសធាតុពេលនេះមិនមែនជាជម្រើសចៃដន្យទេ ព្រោះរដ្ឋរបស់អាមេរិកមួយនេះកំពុងរងគ្រោះដោយការបាក់រលំផ្ទំាងទឹកកកទំហំប៉ុនតារាងបាល់ទាត់ជារៀងរាល់ថ្ងៃដោយសារការឡើងកំដៅក្នុងបរិយាកាស។ តែគេក៏មិនត្រូវភ្លេចនិយាយទេថា រដ្ឋអាឡាស្កាក៏រស់ដោយចំណូលបានពីប្រភពប្រេងដែរ។ លោកអូបាម៉ាទើបបានអនុញ្ញាតឲ្យមានការជីកអណ្តូងថ្មីនៅតាមឆ្នេរសមុទ្រអាឡាស្កា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ