អាមេរិកឡាទីនរត់តាមពិភពលោកក្នុងវិស័យអវកាស ដោយមានជំនួយពីចិន
ចុះផ្សាយនៅថ្ងៃ៖
ស្តាប់ - ០៤:១៩
ការបង្ហោះផ្កាយរណបទៅក្នុងតារាវិថី កាន់តែពេញនិយមឡើងៗ ! អាមេរិកឡាទីន ដែលយឺតយ៉ាវជាងគេក្នុងវិស័យអវកាស បានចាប់ផ្តើមចេញមុខមាត់ និងចូលស៊ុបក្នុងពិភពនេះ ដោយបង្កើនការបង្ហោះផ្កាយរណបច្រើនឡើងៗ។ អាមេរិកឡាទីនហ៊ានល្បងភ្នាល់ល្បែងជាយុទ្ធសាស្ត្រនេះ ដោយមានជំនួយប្រតិបត្តការ និងបច្ចេកវិទ្យាពីចិន និងរុស្ស៊ី។
គម្រោងបង្ហោះផ្កាយរណបទៅកាន់តារាវិថី កាលពីសប្តាហ៍មុន ជាផ្កាយរណបរបស់ប្រទេសបូលីវីTupac Katari បង្ហោះចេញពីមជ្ឈមណ្ឌលផ្កាយរណបចិន។ ប្រទេសប្រេស៊ីល ក៏បានសម្រេចថានឹងដាក់ឱ្យដំណើរការកម្មវិធីមួយ សម្រាប់បង្ហោះផ្កាយរណបទូរគមនាគមន៍សាធារណៈដែរ បន្ទាប់ពីមានការបង្ហើបរឿងអាស្រូវសកម្មភាពអាមេរិកលួចស៊ើបការណ៍ លួចស្តាប់កិច្ចសន្ទនាថ្នាក់ដឹកនាំប្រទេសក្នុងពិភពលោក មិនថាជាសម្ព័ន្ធមិត្ត ឬជាសត្រូវ រាប់ទាំងប្រមុខដឹកនាំប្រទេសប្រេស៊ីល ព្រមទាំងក្រុមហ៊ុន និងជីវិតឯកជនរបស់ប្រជាពលរដ្ឋនៅជុំវិញពិភពលោក។
ជាការធម្មតាទេ ដែលបណ្តាប្រទេសនៅតំបន់អាមេរិកឡាទីនរិះរកអភិវឌ្ឍវិស័យអវកាសនោះ ពីព្រោះ ភាគខាងត្បូងអាមេរិកកំពុងស្គាល់ការរីកចម្រើនខ្លាំងផ្នែកសេដ្ឋកិច្ច ហើយម្យ៉ាងទៀត ក្នុងសម័យពិភពលោកភាវូបនីយកម្មព័ត៌មាន និងស៊ើបការណ៍បែបនេះ មានផ្កាយរណបជារបស់ខ្លួនសឹងថា ជាការចាំបាច់ ក្នុងអត្ថន័យរក្សាបូរណភាព។
ការពារបូរណភាព ឬ ការពារស្វ័យភាព ព្រោះបច្ចុប្បន្ននេះ ដើម្បីអាចសម្រេចចិត្តលើកិច្ចការអ្វីមួយ គេត្រូវតែមានព័ត៌មានច្បាស់លាស់ត្រឹមត្រូវ គ្រប់គ្រាន់ ទាន់ពេលវេលា ប្តូរផ្លាស់ស្របទៅតាមសភាពការណ៍វិវឌ្ឍជាក់ស្តែង និងជាញឹកញយ មានតែផ្កាយរណបប៉ុណ្ណោះ ដែលមានសមត្ថភាពផ្តល់នូវព័ត៌មានទាន់ចិត្ត មិនថាស្តីពីបរិស្ថាន អាកាសធាតុ ឬ ការឡើងកម្តៅសីតុណ្ហភាព ឬអ្វីផ្សេងទៀតទេ។ នេះហើយប្រយោជន៍នៃបច្ចេកវិទ្យាអវកាស !
មួយវិញទៀត ផ្កាយរណប មានប្រយោជន៍ចាំបាច់កាន់ខ្លាំង នៅអាមេរិកឡាទីន ក៏ព្រោះតែនៅក្នុងប្រទេសខ្លះ នៃភូមិភាគនេះ មិនចាប់អារម្មណ៍ឬមិនគិតយកប្រព័ន្ធអ៊ីនធឺណែតជាសំខាន់ឡើយ ៖ ជាឧទាហរណ៍ ប្រជាជនហៃទី អេក្វាទ័រ ស៊ុយរីណាម ហុងឌូរ៉ាស ឬ ប៉ារ៉ាហ្គាយ ប្រមាណតែ១០%ប៉ុណ្ណោះ មានប្រព័ន្ធអ៊ីនធឺណែតប្រើប្រាស់។ នេះបើតាមតួលេខរបស់គណៈកម្មការសេដ្ឋកិច្ចអាមេរិកឡាទីននៅអង្គការសហប្រជាជាតិ។
ពីពេលនេះ ដល់ឆ្នាំ២០១៧ អាមេរិកឡាទីននឹងមានផ្កាយរណបប្រមាណ៩៨គ្រឿង ដែលសុទ្ធសឹងជាផ្កាយរណបបម្រើឱ្យវិស័យទូរគមនាគមន៍។ នេះបើតាមតួលេខផ្សព្វផ្សាយនាឱកាសសន្និសីទផ្កាយរណបអាមេរិក-ឡាទីន រៀបចំធ្វើនៅទីក្រុង រីយ៉ូ ឌឺ ហ្សាណែរ៉ូ ប្រទេសប្រេស៊ីល។ ប្រេស៊ីលដែលមានតួនាទីគន្លឹះជាងគេក្នុងបម្រើបម្រាស់ផ្កាយរណប នៅទ្វីបអាមេរិកឡាទីន។
ប្រេស៊ីលមានផ្កាយរណបមិនតិចជាង៣០ទេ ហើយប្រេស៊ីល ទើបប្រកាសកាលពីពេលថ្មីស្វែងរកអវកាសបួនទៀត ដើម្បីមកអភិវឌ្ឍន៍សេវាទូរស័ព្ទ អ៊ីនធឺណែត ទូរទស្សន៍ព្រោះការប្រកួតកីឡាបាល់ទាត់ពិភពលោកឆ្នាំ២០១៤ កាន់តែខិតជិតមកដល់។ ក្នុងនាមជាប្រទេសមហាអំណាចសេដ្ឋកិច្ចទី ៧ នៅលើពិភពលោក ប្រេស៊ីល ចង់ប្រកួតប្រជែងនឹងគេឯងដែរ ដោយតម្រង់កម្មវត្ថុផ្កាយរណបទៅតាមដានសកម្មភាពភពផែនដី ដើម្បីបានប្រយោជន៍ទៅកសិកម្ម ការពារព្រៃឈើអាម៉ាហ្សូន។ ដើម្បីសម្រេចកិច្ចការនេះ ប្រេស៊ីលបានពឹងពាក់បច្ចេកវិទ្យា និងចុះកិច្ចព្រមព្រៀងធ្វើការអភិវឌ្ឍន៍ជាមួយចិន។
ចំណែកប្រទេសអាហ្សង់ទីន ថ្វីបើក្រីក្រ ខ្វះមធ្យោបាយមែន ប៉ុន្តែគួរឱ្យភ្ញាក់ផ្អើលប្រទេសនេះមានបច្ចេកវិទ្យាអវកាសដើរលឿនខ្លាំងជាងគេក្នុងតំបន់។ យោធាអាហ្សង់ទីន ទើបបានបង្ហោះយានអវកាសវិទ្យាសាស្ត្រមួយ កាលពីសប្តាហ៍មុនដែរ។ អាហ្សង់ទីន មានផ្កាយរណបទូរគមនាគមន៍រដ្ឋាភិបាលរួចស្រេចទៅហើយ។
ពីមុន និងជាប្រពៃណី អឺរ៉ុប និងសហរដ្ឋអាមេរិក ជាទីផ្សារអវកាសធំសម្បើមពីរប្រកួតប្រជែងគ្នា។ ប៉ុន្តែពេលនេះ ចិនទើបបានក្លាយជាប្រទេសមហាអំណាចទីបី ផ្នែកអវកាសបន្ទាប់ពីរុស្ស៊ី និងអាមេរិក ដោយបានបង្ហោះយានយន្តទៅកាន់ឋានព្រះចន្ទបានសម្រេច។ ដោយមានជំនួយពីចិន បូលីវី បានបង្ហោះដោយជោគជ័យផ្កាយរណបទីមួយរបស់ខ្លួន ចេញពីមជ្ឈមណ្ឌលរបស់Xichang របស់ចិន។ ជោគជ័យនេះរបស់បូលីវីផង និងជារបស់ចិនផង និងអាចបញ្ជាក់កាន់តែច្បាស់អំពីការអួតអាងរបស់ចិន ប្រាថ្នាចង់ក្តោបទីផ្សារអវកាសពិភពលោកផ្នែកបង្ហោះផ្កាយរណបទៅក្នុងតារាវិថី ឱ្យបាន១៥% ពីពេលនេះដល់ឆ្នាំ២០២០។
ចិនមានរួចជាស្រេចទៅហើយគ្រឹះអភិវឌ្ឍន៍ផ្កាយរណបសម្រាប់តំបន់អាមេរិកឡាទីន និងមានកិច្ចសហប្រតិបត្តិការយ៉ាងស្អិតល្មួតជាមួយអាហ្សង់ទីន ប្រេស៊ីល វេណេស៊ុយអេឡា អេក្វាទ័រ ឬ នីការ៉ាហ្គា។ ចំណែករុស្ស៊ី ដែលមានប្រវត្តិល្បីខាងអវកាសតាំងពីដើមមកវិញ បានចាក់ស្រេះ នារយៈពេលប៉ុន្មានឆ្នាំចុងក្រោយនេះ ជាមួយប្រទេសប៉េរ៉ូ កូឡុំប៊ី អេក្វាទ័រ ម៉ិចស៊ិក និងគុយបា។ កិច្ចសហប្រតិបត្តការចិន និងរុស្ស៊ី បានជួយឱ្យមានការបង្ហោះផ្កាយរណបផលិតនៅអាមេរិកឡាទីន ប៉ុន្តែគ្មានប្រទេសណាមួយ សូម្បីតែប្រេស៊ីល មានមជ្ឈមណ្ឌលបង្ហោះដោយខ្លួនឯងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ