អង្គភាពប្រឆាំងអំពើពុករលួយត្រូវបានជំរុញឲ្យតាមដានការបម្រើសេវាសាធារណៈ
នៅក្នុងកិច្ចប្រជុំរបស់ខ្លួនកាលពីថ្ងៃទី ២៩ មករា ក្រុមប្រឹក្សាជាតិប្រឆាំងអំពើពុករលួយបានគាំទ្រការងាររបស់អង្គភាពប្រឆាំងអំពើពុករលួយដែលបានចាត់វិធានការទៅលើមន្ត្រីពុករលួយជាបន្តបន្ទាប់។ ក្រុមប្រឹក្សាជាតិប្រឆាំងអំពើពុករលួយបានជំរុញឲ្យអង្គភាពក្រោមឱវាទមួយនេះយកចិត្តទុកដាក់ឲ្យបានខ្លាំងទៅលើការអនុវត្តន៍ ក្នុងសេវាសាធារណៈ។ ការជំរុញនេះបានធ្វើឡើងបន្ទាប់ពីរដ្ឋាភិបាលបានសម្រេចកំណត់តម្លៃសេវាសាធារណៈនិងបានដាក់ឲ្យប្រើប្រាស់នៅថ្នាក់មូលដ្ឋានចាប់ពីខែធ្នូឆ្នាំ ២០១៣ មក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
ការលុបបំបាត់អំពើពុករលួយក្នុងសេវាសាធារណៈកំពុងក្លាយជាប្រធានបទសំខាន់មួយសម្រាប់អង្គភាពប្រឆាំងអំពើពុករលួយ។ អង្គភាពនេះត្រូវបានជំរុញឲ្យយកចិត្តទុកដាក់ឲ្យបានខ្លាំងអំពីបញ្ហានេះ។ នេះបើយោងតាមសេចក្តីជូនដំណឹងរបស់អង្គភាពប្រឆាំងអំពើពុករលួយកាលពីថ្ងៃទី ២៩ មករា។
សេចក្តីជូនដំណឹងបានឲ្យដឹងថា នៅក្នុងកិច្ចប្រជុំរបស់ខ្លួនកាលពីថ្ងៃពុធ ក្រុមប្រឹក្សាជាតិប្រឆាំងអំពើពុករលួយបានស្តាប់របាយការណ៍ជាច្រើនរបស់អង្គភាពប្រឆាំងអំពើពុករលួយស្តីពីសំណុំរឿងដែលអង្គភាពនេះកំពុងដំណើរការ។ សំណុំរឿងពុករលួយទាំងនោះមានដូចជា ករណីមន្ត្រីជាន់ខ្ពស់ប៉ូលិសជាតិ លោក មឹក ដារា ករណីពុករលួយនៅក្នុងអង្គភាពអគ្គិសនីកម្ពុជាខេត្តមណ្ឌលគិរី និងសំណុំរឿងពុករលួយក្នុងវិស័យសុខាភិបាលដែលមូលនិធិ Global Fund បានចោទប្រកាន់ជាដើម។
សំណុំរឿងទាំងនេះត្រូវបានអង្គភាពប្រឆាំងអំពើពុករលួយកំពុងស៊ើបអង្កេតនិងតាមដានការវិវឌ្ឍនៅក្នុងតុលាការ។ យ៉ាងណាក៏ដោយ ក្រុមប្រឹក្សាជាតិប្រឆាំងអំពើពុករលួយមិនភ្លេចរម្លឹកឲ្យអង្គភាពប្រឆាំងអំពើពុករលួយយកចិត្តទុកដាក់ទៅលើការអនុវត្តសេវាសាធារណៈឲ្យបានខ្លាំងថែមទៀត។
គួរបញ្ជាក់ថា ក្រសួងសេដ្ឋកិច្ចនិងហិរញ្ញវត្ថុ និងក្រសួងមហាផ្ទៃ បានសម្រេចរួមគ្នានូវការកំណត់តម្លៃសេវាសាធារណៈសម្រាប់ឲ្យរដ្ឋបាលថ្នាក់ក្រោមជាតិទាំងអស់អនុវត្តតាម។ សេចក្តីសម្រេចនេះមានន័យចង់លុបបំបាត់ការយកសេវាក្រៅផ្លូវការពីប្រជាពលរដ្ឋពីសំណាក់អាជ្ញាធសាធារណៈ។ តារាងតម្លៃសេវាសាធារណៈនឹងត្រូវគេបិទនៅទីកន្លែងផ្តល់សេវានិងតម្រូវឲ្យមន្ត្រីអនុវត្តឲ្យបានម៉ឺងម៉ាត់។
ចំណាត់ការនេះបានកើតឡើងបន្ទាប់ពីរដ្ឋាភិបាលដឹកនាំដោយគណបក្សប្រជាជនកម្ពុជាស្រុតចុះប្រជាប្រិយភាពយ៉ាងខ្លាំង។ ការកំណត់តម្លៃត្រឹមត្រូវបានចាប់ផ្តើមអនុតវត្តចាប់ពីខែធ្នូឆ្នាំ ២០១៣ មក។ ប៉ុន្តែ គេមិនទាន់ដឹងថាតើវាមានប្រសិទ្ធភាពប៉ុណ្ណានៅឡើយទេ។ ប៉ុន្តែ ក្រុមប្រឹក្សាជាតិប្រឆាំងអំពើពុករលួយកំពុងយកចិត្តទុកដាក់លើបញ្ហានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ