បោះឆ្នោតបារាំង៖ការអំពាវនាវអោយបោះឆ្នោតអោយលោកម៉ាក្រុងមានការកើនឡើង
នៅបារាំង សកម្មភាពអំពាវនាវអោយប្រជាជនទៅបោះឆ្នោតអោយបេក្ខជនប្រធានាធិបតី អេម៉ានុយអែល ម៉ាក្រុង កំពុងកើនឡើងរាល់ថ្ងៃ មុនថ្ងៃបោះឆ្នោតប្រធានាធិបតីជុំទី២ ថ្ងៃអាទិត្យ៧ឧសភានេះ។ ការអំពាវនាវកាន់តែកើនឡើង ដោយសារគេបារម្ភខ្លាចមានអ្នកអវត្តមានច្រើន នៅជុំទី២ ដែលអាចជួយអោយបេក្ខនារីបក្សស្តាំនិយមជ្រុល លោកស្រី ម៉ារីន ឡឺប៉ែន ជាប់ឆ្នោតជាប្រធានាធិបតីបារាំង។
ចុះផ្សាយនៅថ្ងៃ៖ កែប្រែថ្ងៃទី៖
នៅបារាំង ប្រធានសហគ្រាសធំៗ តារាសិល្បៈ ផលិតករភាពយន្ត រឺក៏ក្រុមអ្នកស្រាវជ្រាវ បានអំពាវនាវអោយពលរដ្ឋបារាំង បោះឆ្នោតអោយបេក្ខជននិន្នាការកណ្តាលនិយម មកពីបក្ស En Marche គឺលោកអេម៉ានុយអែល ម៉ាក្រុង ដើម្បីអោយលោកបានជាប់ជាប្រធានាធិបតីថ្មី នៅថ្ងៃអាទិត្យ៧ឧសភាខាងមុខនេះ។ តារាបាល់ទាត់ល្បី ហ្ស៊ីណេឌីន ហ្ស៊ីដានក៏អំពាវនាវអោយបោះឆ្នោតអោយលោកម៉ាក្រុងដែរ។ កន្លងមក លោកហ្វ៊ីយ៉ុង មកពីបក្សស្តាំនិយម ដែលទទួលបានសម្លេង២០ភាគរយជាង ក្នុងការបោះឆ្នោតជុំទី១ បានអំពាវនាវអោយបោះឆ្នោតអោយលោកម៉ាក្រុងដែរ។
ការស្ទាបស្ទង់មតិបង្ហាញថា ក្នុងការបោះឆ្នោតជុំទី២នៅថ្ងៃអាទិត្យ ចំនួនអ្នកអវត្តមានអាចកើនដល់ជិត៣០ភាគរយ ទោះបីជាការស្ទាបស្ទង់មតិបង្ហាញថា បេក្ខជននិន្នាការកណ្តាល អេម៉ានុយអែល ម៉ាក្រុង អាចទទួលជោគជ័យលើបេក្ខជនមកពីបក្សស្តាំនិយមជ្រុល លោកស្រីម៉ារីន ឡឺប៉ែន ក៏ដោយ។ អត្រាអ្នកអវត្តមានអាចឡើងដល់ជិត៣០ភាគរយ ជាតួលេខខ្ពស់ប្រៀបនឹងការបោះឆ្នោតប្រធានាធិបតីមុនៗ លើកលែងតែការបោះឆ្នោតឆ្នាំ១៩៦៩ ដែលកាលនោះ មានដល់ ជាង៣១ភាគរយ។
គេបារម្ភថា ចំនួនអ្នកអវត្តមានជិត៣០ភាគរយ ក្នុងតួលេខខ្ពស់បែបនេះ អាចជាប្រយោជន៍ជួយលោកស្រី ម៉ារីន ឡឺប៉ែន អោយជាប់ឆ្នោតជាប្រធានាធីបតីបាន។ ប៉ុន្មានថ្ងៃចុងក្រោយនេះ បេក្ខជនស្តាំនិយមសំខាន់មួយរូប គឹលោកNicolas Dupont Aignan ដែលទទួលសម្លេងឆ្នោត៤,៧ភាគរយ បានសម្រេចចិត្តចូលរួមនយោបាយជាមួយបក្សស្តាំនិយមជ្រុលរបស់លោកស្រីម៉ារីន ឡឺប៉ែន។ បើលោកស្រី ឡឺប៉ែនជាប់ឆ្នោត លោក Dupont Aignan នឹងឡើងធ្វើជានាយករដ្ឋមន្ត្រី។
កន្លងមក ដោយសារលោកដូណាល់ ត្រាំ ជាប់ឆ្នោតនៅអាមេរិក ផ្ទុយពីការរំពឹងទុក ដោយសារពលរដ្ឋអង់គ្លេសបោះឆ្នោតអោយអង់គ្លេសដើរចេញពីអឺរ៉ុប ខុសពីការរំពឹងទុក គេខ្លាចថា លោកស្រី ឡឺប៉ែន អាចជាប់ឆ្នោតខុសពីការរំពឹងទុកដូចគ្នាដែរ។
លោកស្រីម៉ារីន ឡឺប៉ែន ប្រកាន់ជំហរការពារផលប្រយោជន៍ជាតិបារាំង រឹតបន្តឹងនយោបាយអន្តោប្រវេសន៍ ចង់អោយបារាំងដើរចេញពីអឺរ៉ុបដូចអង់គ្លេសដែរ។ លោកអេម៉ានុយអែល ម៉ាក្រុងដែលជាអតីតរដ្ឋមន្ត្រីសេដ្ឋកិច្ចវិញ មាននយោបាយគាំទ្រសហភាពអឺរ៉ុប។ បេក្ខជនទាំង២នឹងតទល់មតិគ្នា នៅយប់ថ្ងៃពុធ៣ឧសភានេះ។ លោកស្រីឡឺប៉ែនបានចោទលោក ម៉ាក្រុង ថាជាបេក្ខជនដែលគេកែច្នៃប្រើឡើងវិញ។ លោកស្រីធ្លាប់ចោទទៀតថា គឺបក្សសង្គមនិយមកាន់អំណាចសព្វថ្ងៃនេះឯង ដែលបានបង្កើតលោកម៉ាក្រុងឡើង ដើម្បីអាចបន្តកាន់អំណាចនៅបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ