អារ៉ាប៊ីសាអូឌីត នៅចន្លោះការលំបាកនៃការឡើងនិងធ្លាក់ថ្លៃប្រេង
ចុះផ្សាយនៅថ្ងៃ៖
ស្តាប់ - ០៥:១៨
សប្តាហ៍មុន ក្រុមប្រទេសអ្នកនាំចេញប្រេងនិងសម្ព័ន្ធមិត្ត ហៅកាត់ថា OPEP+ បានសម្រេចកាត់បន្ថយការបូមប្រេង ដើម្បីជួយជំរុញឱ្យតម្លៃប្រេងឡើងមកវិញ។ ការប្រកាសដូច្នេះ ធ្វើឱ្យតម្លៃប្រេងបានហក់ឡើងជាងមុនបន្តិច ពិតមែន។ ប៉ុន្តែរឿងនេះគឺធ្វើឱ្យអាមេរិកខឹងខ្ញាល់ខ្លាំង។ ចំពោះមុខការលំបាកដូច្នេះ គឺគេឃើញមាន អារ៉ាប៊ីសាអូឌីត ដែលត្រូវឈឺក្បាលខ្លាំង និងត្រូវរងសម្ពាធច្រើនជាងគេ។
បញ្ហាតម្លៃប្រេងធ្លាក់ចុះ ព្រោះរឿងអ្វី?
ជាដំបូង ត្រូវយល់ថា ប្រេងធ្លាក់ថ្លៃដោយសារអ្វី ? ហើយតើហេតុអ្វីបានជា អារ៉ាប៊ីសាអូឌីត និងអង្គការ OPEP+ ចង់ឱ្យស្រុះស្រួលគ្នាបន្ថយការបូមប្រេង? បើតាមអ្នកជំនាញ គឺមានហេតុផល យ៉ាងតិចចំនួនបីដែលអាចពន្យល់ពីរឿងនេះ។
ទី១ ដំបូងបំផុត ដោយសារតែប្រទេសផលិតប្រេង ប្រឹងបូមចម្រាញ់ប្រេងច្រើនពេក នាំឱ្យលើសកំណត់ និងលើសពីសេចក្តីត្រូវការរបស់ទីផ្សារ។ ឧទាហរណ៍ អាមេរិក រយៈពេលប៉ុន្មានឆ្នាំចុងក្រោយនេះ បានក្លាយជាប្រទេសផលិតប្រេងលំដាប់ទី១ពិភពលោក ហើយអាមេរិកបូមប្រេងដោយគ្មានខ្វល់នឹងកូតា OPEP+ ឡើយ។ បន្ទាប់មកគឺ រុស្ស៊ី ។ រុស្ស៊ីនេះហើយ ដែលគេច្រើនអង្អុរមុខថាធ្លាប់បានលាក់លួចបូមប្រេងលើសចំណុះ។ ចំណែកប្រទេសបូមប្រេងច្រើន លំដាប់ទី៣ គឺអារ៉ាប៊ីសាអូឌីត។ បន្ថែមពីនេះ គឺមាន ប្រទេស អ៊ីរ៉ាក់ និង នីហ្សេរីយ៉ា ដែលជាប់ឈ្មោះ ថាបានបូបប្រេងច្រើនលើសហួសកម្រិតកំណត់។ ពីព្រោះថា ប្រទេសទាំងពីរនេះ កំពុងជួបប្រទះវិបត្តិសង្គម នយោបាយនិងសេដ្ឋកិច្ចជាខ្លាំង ហើយចាំបាច់ត្រូវការបូមប្រេងលក់យកប្រាក់ ទៅដោះស្រាយបញ្ហារបស់ខ្លួន។ នេះបើទោះបីជាដឹងហើយថា ការបូមប្រេងហួសកម្រិតកំណត់ និង ច្រើនជ្រុល នាំឱ្យតម្លៃប្រេង ធ្លាក់ចុះថោកក៏ដោយចុះ ក៏ប្រទេសទាំងនេះ មិនញញើតនឹងប្រព្រឹត្តដែរ ដើម្បីបានលុយផ្ទាល់ខ្លួន និងសម្រាប់ដោះស្រាយពេលជួបវិបត្តិ។ ទង្វើរបស់ប្រទេសខាងលើទាំងអស់នេះ គឺបង្កឱ្យការផលិតប្រេងលើសសេចក្តីត្រូវការនៅលើទីផ្សារ ដែលដើមហេតុមួយនាំឱ្យប្រេងធ្លាក់ថ្លៃប្រេងជាគំហុក។
កត្តាទី២ដែលធ្វើឱ្យប្រេងធ្លាក់ចុះថ្លៃដែរនោះ គឺមកពីចំហាយឥទ្ធិពលនៃសង្គ្រាមពាណិជ្ជកម្ម រវាងអាមេរិកនិងចិន។ ចិនដែលជាប្រទេសនាំចូលប្រេង និងបញ្ជាទិញប្រេងច្រើនធំជាងគេ នៅលើពិភពលោក។ មហាម៉ាស៊ីនយក្សសេដ្ឋកិច្ចរបស់ចិន ស៊ីប្រេងខ្លាំងនិងច្រើន ហើយការកុម្ម៉ង់ទិញប្រេងរបស់ចិន ភាគច្រើនគឺមានប្រភពមកពីតំបន់មជ្ឈិមបូព៌ា។ នៅពេលដែលផ្សារសេដ្ឋកិច្ចចិនត្រូវប៉ះពាល់ដោយរលកជម្លោះពាណិជ្ជកម្ម, ការបញ្ជាទិញនិងនាំចូលប្រេងរបស់ចិន ទៅបំប៉នសេដ្ឋកិច្ចនោះ ក៏ថមថយចុះជាងមុនដែរ។
មួយវិញទៀត ជាកត្តាគម្រប់ទី៣ គឺការធ្លាក់ថយចុះ ឬកំណើនសេដ្ឋកិច្ចដើរយឺត របស់ប្រទេសក្នុងរង្វង់សហភាពអឺរ៉ុប ក៏ជាផ្នែកមួយ ដែលធ្វើឱ្យតម្លៃប្រេងធ្លាក់ចុះផងដែរ។
OPEP+ កាត់បន្ថយការបូមប្រេង ៥ សែនបារិលក្នុងមួយថ្ងៃៗ
ហេតុដូច្នេះហើយ ទើបក្រុមប្រទេសអ្នកនាំចេញប្រេងនិងសម្ព័ន្ធមិត្ត ហៅកាត់ថា OPEP+ ប្រឹងរកមធ្យោបាយ ដើម្បីជំរុញឱ្យប្រេងឡើងថ្លៃវិញ ហើយក៏ជាហេតុផល ដែលក្រុមប្រទេសទាំងនោះ ជួបប្រជុំគ្នា កាលពីថ្ងៃព្រហស្បតិ៍និងថ្ងៃសុក្រសប្តាហ៍មុន នៅក្រុងវីយ៉ែន ប្រទេសអូទ្រីស។ ក្នុងជំនួបនេះ សមាជិក១៤ប្រទេសខាងផលិតប្រេង ដឹកនាំដោយ អារ៉ាប៊ីសាអូឌីត ហើយ១០ប្រទេសទៀត នាំមុខដោយ រុស្ស៊ី បានសម្រេចកម្រិតចំនួនកូតា កាត់បន្ថយការផលិតប្រេង ចំនួន៥សែនបារិលក្នុងមួយថ្ងៃៗ នៅត្រីមាសទី១ ដើមឆ្នាំ២០២០។ ហើយបន្ថែមពីលើការកាត់បន្ថយនេះ អារ៉ាប៊ីសាអូឌីត ខ្លួនឯងបានសន្យាដោយស្មគ្រចិត្ត កាត់បន្ថយចំនួន ៤សែនបារិលបន្ថែមទៀត។ គ្រាន់តែប្រកាសដំណឹងដូច្នេះ តម្លៃប្រេងបានងើបក្បាលឡើង ក្រឺត បន្តិចដែរ។
អាមេរិកខឹង និងចង់ឱ្យមានការបូមប្រេងស្រេចនឹងចិត្ត
សហរដ្ឋអាមេរិក ជាប្រទេសបូមប្រេងលំដាប់ទី១ និងបូមដោយមិនខ្វល់ឈឺក្បាលហាលថ្ងៃនឹងការកំណត់ចំនួនកូតា របស់ OPEP+ បានចេញមុខប្រតិកម្ម។ ប្រធានាធិបតីអាមេរិក ដូណាល់ ត្រាំ ស្រែកគំរាមបណ្តាញសង្គមធ្វីតធ័ររបស់លោក ដោយបង្ហើរថា លោកសង្ឃឹមថា អង្គការ OPEP មិនត្រូវកម្រិតចំនួន ត្បិតត្បៀតក្នុងការបូមប្រេងនោះទេ ហើយគួរទុកឱ្យលំហូរនៃការបូមប្រេងប្រព្រឹត្តិទៅធម្មតាទៅចុះ។ ពីព្រោះថា ពិភពលោកមិនត្រូវការឱ្យប្រេងឡើងថ្លៃអ្វីនោះទេ។
សមាជិក អង្គការ OPEP គ្រប់គ្នា ហាក់សភ្នែក នឹងប្រតិកម្មរបស់ប្រមុខរដ្ឋអាមេរិក ហើយរង់ចាំតែតាមដានស្ថានការណ៍តាមសារធ្វីតធ័ររបស់លោក ដូណាល់ ត្រាំ ។
អារ៉ាប៊ីសាអូឌីត រងសម្ពាធខ្លាំងជាងគេ
នៅក្នុងបរិបទនេះ អារ៉ាប៊ីសាអូឌីត គឺត្រូវរងសម្ពាធច្រើនជាងគេ។ នៅម្ខាង អារ៉ាប៊ីសាអូឌីត ប្រឹងធ្វើយ៉ាងណា ឱ្យតម្លៃប្រេងឡើងថ្លៃ ហើយម្ខាងទៀត អារ៉ាប៊ីសាអូឌីត ខំខាំមាត់សង្កត់ចិត្ត ទប់កុំឱ្យអាមេរិកខឹង។ ពីព្រោះ អារ៉ាប៊ីសាអូឌីត គឺជាសម្ព័ន្ធរបស់អាមេរិក ហើយ អារ៉ាប៊ីសាអូឌីត ចាំបាច់ត្រូវការអាមេរិកជាខ្នងបង្អែក ដើម្បីប្រឈមមុខជាមួយសត្រូវនៅមជ្ឈិមបូព៌ា ពិសេសបញ្ហាសង្គ្រាមនៅយ៉េមែនជាដើម។
ទោះជាយ៉ាងណាក្តី អារ៉ាប៊ីសាអូឌីត ត្រូវតែជំរុញឱ្យតម្លៃប្រេងឡើងថ្លៃ គឺជាជម្រើសមួយត្រូវធ្វើ ទោះបីលំបាកក្តី។ តើហេតុអ្វី? ពីព្រោះថា សេដ្ឋកិច្ចរបស់រាជាណាចក្រមួយនេះ គឺអាស្រ័យលើមាសខ្មៅនេះ ជាចាំបាច់។ បើតម្លៃមាសខ្មៅ ធ្លាក់ចុះ គឺប៉ះពាល់ជាទម្ងន់ ទៅដល់សេដ្ឋកិច្ចអារ៉ាប៊ីសាអូឌីត។ ហេតុផលមួយទៀតដែលបញ្ជាក់ដោយរដ្ឋបាលក្រុងរីយ៉ាដខ្លួនឯង គឺប្រទេសនេះកំពុងតែជួបប្រទះឱនភាពថវិកាជាតិ។ ហើយបើតាមរបាយការណ៍របស់អង្គការរូបិយវត្ថុអន្តរជាតិ អារ៉ាប៊ីសាអូឌីត ក៏កំពុងតែជួបប្រទះ កំណើនវិបត្តិអត់ការងារធ្វើដែរ គឺស្មើនឹងចំនួន១២,៥ភាគរយ ដែលចំបាច់បំផុត ត្រូវជំរុញថ្លៃប្រេងឱ្យឡើង ដើម្បីប្រមូលយកលុយ ផលិតការងារថ្មី ឱ្យបានយ៉ាងហោច១លានកន្លែង ក្នុងរយៈ៥ឆ្នាំទៅមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ