ចារកិច្ចអាមេរិក៖ក្នុងមួយខែៗ មានជនបរទេសប្រមាណ១ពាន់នាក់ចូលប្រយុទ្ធនៅស៊ីរី
ការវាយប្រហារយោធាតាមជើងអាកាសមិនបានបង្អាក់ដំណើរហូរចូលរបស់សកម្មជនបរទេសចូលក្នុងទឹកដីស៊ីរី។ តាមការវាយតម្លៃរបស់ទីភ្នាក់ងារស៊ើបការណ៍សម្ងាត់អាមេរិក ដែលដកស្រង់ ចុះផ្សាយ កាលពីថ្ងៃសុក្រ ដោយកាសែតអាមេរិក The Washington Post មានយុទ្ធជនបរទេសច្រើនជាង ១ពាន់ នាក់ ធ្វើដំណើរជារៀងរាល់ខែ ចូលទៅប្រយុទ្ធក្នុងប្រទេសស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
កងទ័ពសម្ព័ន្ធអន្តរជាតិដឹកនាំដោយអាមេរិកបានបើកប្រតិបត្តិការទម្លាក់គ្រាប់បែក ជញ្រ្ជុំ ជារៀងរាល់ថ្ងៃ ដើម្បីទប់ស្កាត់កុំឲ្យក្រុមជីហាត នៃអង្គការរដ្ឋអ៊ីស្លាមអាចវាយដណ្តើមយកបានទីក្រុងកូបាណេ ក្នុងទឹកដីស៊ីរី។ តាំងពីមានការផ្តើមវាយប្រហារតាមជើងអាកាសទៅលើក្រុមជីហាត កាលពីខែសីហា យន្តហោះ អាមេរិក និងសម្ព័ន្ធមិត្តបានធ្វើបេសកកម្មជាង ៦០០លើកដើម្បីតាមកម្ទេចក្រុមជីហាត នៅក្នុងប្រទេសស៊ីរី និងនៅអ៊ីរ៉ាក់។
តួលេចចុងក្រោយបានបង្ហាញដែរថា ប្រតិបត្តិការរបស់អាមេរិក និងសម្ព័ន្ធមិត្ត នៅក្នុងប្រទេសស៊ីរីតែមួយ បានសម្លាប់សកម្មជនប្រយុទ្ធរបស់ក្រុមជីហាតនៃអង្គការរដ្ឋអ៊ីស្លាម ជាង ៤៦០នាក់ និងសមាជិករបស់ក្រុមអាល់នូស្រាដែលជាបណ្តាញរបស់អាល់កៃដា ប្រមាណ ៦០នាក់។
បើទោះបីជាអាមេរិក និងសម្ព័ន្ធមិត្តបើកប្រតិបត្តិការទម្លាក់គ្រាប់ មិនលោះថ្ងៃ និងបានសម្លាប់សមាជិករបស់ក្រុមជីហាតរាប់រយនាក់ ប៉ុន្តែ វាមិនបានជួយបន្ទុចបង្អាក់កុំឲ្យចំនួនជនបរទេសហូរចូលទៅប្រយុទ្ធនៅក្នុងប្រទេសស៊ីរីទេ។
តាមអ្នកទទួលខុសត្រូវម្នាក់របស់ទីភ្នាក់ងារស៊ើបការណ៍សម្ងាត់អាមេរិកដែលដកស្រង់សំដីដោយកាសែត The Washington Post ដោយសារតែចំនួន យុទ្ធជនបរទេស ហូរចូលទៅប្រទេសស៊ីរី មានលក្ខណៈថេរ គឺប្រមាណ១ពាន់នាក់ ក្នុងមួយខែ នោះទីភ្នាក់ងារប៉ាន់ប្រមាណថា មានជនបរទេសសរុប ប្រមាណ ១៦ ០០០នាក់កំពុងចូលរួមប្រយុទ្ធ ក្នុងក្រុមជីហាត នៅស៊ីរី។
តាមអ្នកជំនាញ ចំនួនជនបរទេសឆ្លងចូលប្រយុទ្ធនៅក្នុងសង្រ្គាម នៅប្រទេសស៊ីរីមានចំនួនច្រើន បើប្រៀបធៀបនឹងសង្រ្គាមនៅអ៊ីរ៉ាក់ ឬអាហ្វហ្កានីស្ថាន។ ជនបរទេសទាំងនោះ ដែលទាក់ទាញដោយសង្រ្គាមស៊ីវិលនៅស៊ីរី បានធ្វើដំណើរមកពីអាហ្វ្រិក ពីតំបន់ដើមបូព៌ា ផ្ទាល់ និងពីអឺរ៉ុប។ ពួកគេភាគច្រើនដែលចេញដំណើរមកពីប្រទេសទុយនីស៊ី បានឆ្លងចូលទៅស៊ីរីតាមរយៈទឹកដីតួកគី ដើម្បីចូលទៅប្រយុទ្ធជាមួយក្រុមជីហាត ឬជាមួយក្រុមអាល់នូស្រា ដែលជាបណ្តាញមួយទៀត របស់អាល់កៃដា។ តួកគីដែលរងការរិះគន់ពីភាពអសកម្មដើម្បីទប់ទល់នឹងការរីករាលរបស់ក្រុមជីហាត ទើបបានចាត់វិធានការរឹតបន្តឹងច្រកព្រំដែន ដើម្បីទប់ស្កាត់ កុំឲ្យយុទ្ធជនបរទេសឆ្លងចូលទៅក្នុងស៊ីរីបាន។
រដ្ឋាភិបាលតួកគី ចាប់រឹតបន្តឹងតាមព្រំដែន ទៅតាមការទាមទាររបស់សហគមន៍អន្តរជាតិ ប៉ុន្តែ ក៏មិនភ្លេចបន្ទោសប្រតិបត្តិការយោធារបស់អាមេរិក និងសម្ព័ន្ធអន្តរជាតិដែរ។ នៅក្នុងជំនួបជាមួយប្រធានាធិបតីបារាំង កាលពីល្ងាចថ្ងៃសុក្រ លោកប្រធានាធិបតីតួកគីបានបន្ទោសជាថ្មីកងទ័ពសម្ព័ន្ធអន្តរជាតិ ថា មិនគិតគូរវាយប្រហារទៅលើក្រុមភេរវករនៅកន្លែងផ្សេងទៀត នៅក្នុងទឹកដីស៊ីរី។ ទីក្រុងអង់ការ៉ាមិនសប្បាយចិត្តព្រោះថា ការវាយប្រហារ របស់សម្ព័ន្ធអន្តរជាតិ តែទៅលើទីក្រុងកូបាណេ ដែលស្ថិតនៅតាមព្រំដែនជាមួយតួកគី អាចនឹងធ្វើឲ្យភ្នក់ភ្លើងសង្រ្គាមនៅស៊ីរី ឆ្លងរាលដាលចូលក្នុងទឹកដីតួកគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ