កូរ៉េខាងជើង​ប្រាប់ឲ្យ​ប្រយត្ន័ បើ​អាមេរិក និង​កូរ៉េ​ខាងត្បូង ធ្វើ​សមយុទ្ធ​យោធា​រួមគ្នា

តាមរយៈទីភ្នាក់ងារព័ត៌មានផ្លូវការ KCNA អ្នកនាំពាក្យក្រសួងការបរទេសកូរ៉េខាងជើង បានបញ្ជាក់ឲ្យដឹងថា បើសិនជាងនឹង​មានការធ្វើសមយុទ្ធយោធារួមគ្នា រវាងកងទ័ពអាមេរិក និងកងទ័ពកូរ៉េខាងត្បូងមែននោះ នោះវានឹងធ្វើឲ្យប៉ះពាល់ខ្លាំង ដល់ការនិយាយចរចាគ្នា រវាងកូរ៉េខាងជើង និងអាមេរិក។ អ្នកនាំពាក្យដដែល បន្ថែមថា ផែនការធ្វើសមយុទ្ធនៅខែសីហាខាងមុខ គឺវានឹងរំលោភបំពាន​ ទៅលើខ្លឹមសារនៃការប្រកាសរួមគ្នា របស់លោកប្រធានាធិបតីអាមេរិក និងប្រមុខដឹកនាំកូរ៉េខាងជើង នៅឯសិង្ហបុរី។

ជាចុងក្រោយ អ្នកនាំពាក្យក្រសួងការបរទេសកូរ៉េខាងជើងបានលើកឡើងថា ការដែលសហរដ្ឋអាមេរិក ក្បត់ពាក្យសម្តី ក្បត់សន្យា​បន្តិចម្តងៗ គឺវាធ្វើ​ឲ្យ​កូរ៉េខាងជើង មិនអាចបន្តគោរព​សន្យាតែម្នាក់ឯងបានទេ ព្រោះការសាកល្បងមីស៊ីល​របស់កូរ៉េខាងជើង មួយ​រយៈ​ចុងក្រោយនេះ ត្រូវបានផ្អាក ក៏ព្រោះតែកូរ៉េខាងជើងគោរពសន្យា។

សូមរំលឹកថា កាលពីខែមេសា ឆ្នាំ២០១៨ លោកដូណាល់ ត្រាំ និងលោកគីម ជុងអ៊ុន បានជួបគ្នាជាលើកទីមួយ នៅប្រទេសសិង្ហបុរី។ ក្នុងឱកាសនោះមេដឹកនាំទាំងពីរ បានធ្វើការប្រកាសរួមគ្នា ថានឹងចរចាគ្នា ដើម្បី​បិទបញ្ចប់ជម្លោះប្រវត្តិសាស្ត្រ ព្រមទាំងបញ្ហារំសាយកម្មវិធីនុយក្លេអ៊ែរ។ លោកដូណាល់ ត្រាំ បានអះអាងថា សមយុទ្ធយោធារួមគ្នា រវាងកងទ័ពកូរ៉េខាងត្បូង និង​កងទ័ពអាមេរិក ត្រូវតែផ្អាក ព្រោះវាមានលក្ខណៈពន្យុះនិងគំរាមទៅលើកូរ៉េខាងជើង។

គួរកត់សំគាល់ថា ទាហានអាមេរិក​ឈរជើងនៅ​កូរ៉េខាងត្បូង មានចំនួន​ប្រមាណ​៣ម៉ឺននាក់។ កន្លងមក​ សមយុទ្ធយោធារបស់កងទ័ពអាមេរិក និងកងទ័ពកូរ៉េខាងត្បូង តែងតែទទួលបាន​នូវការតវ៉ា ពីកូរ៉េខាងជើង ដែលចាត់ទុកវាថា គឺជាការហាត់សម ដើម្បីចូលទៅវាយសង្រ្គប់ ផ្តួលរំលំរបបកូរ៉េខាងជើង។

កាលពីថ្ងៃទី​៣០មិថុនា លោកដូណាល់ ត្រាំ បានទៅជួបនឹងមេដឹកនាំកូរ៉េខាងជើង គីម ជុងអ៊ុន នៅឯចំណុចព្រំដែន ពុះចែកកូរ៉េទាំង២។ តាមរយៈជំនួបដោយឥតព្រៀងទុកនេះ មេដឹកនាំទាំងពីរចង់បង្ហាញថា អាមេរិក និងកូរ៉េខាងជើង មានចេតនា​ចរចា ដើម្បីជានាគ្នា។ ក្នុងន័យនេះ ការធ្វើសមយុទ្ធយោធារួមគ្នា រវាងកងទ័ពអាមេរិក និងកូរ៉េខាងត្បូង គឺពិតជាមិន​មានផលចំណេញទេ៕