ពីឆ្នាំ២០១៥មក ចិនបានបិទគេហទំព័រអ៊ីនធឺនែត ចំនួន១ម៉ឺន៣ពាន់ និងគណនីបណ្តាញសង្គមជិត១០លាន
ចុះផ្សាយនៅថ្ងៃ៖
ស្តាប់ - ០៧:១៤
ទីភ្នាក់ងារព័ត៌មាន ចិនថ្មី បានចេញផ្សាយតួលេខ នៃចំនួនគេទំព័រអ៊ីនធឺនែត ឬ Web site ដែលអាជ្ញាធរចិន បានបិទខ្ទប់ ចាប់ពីឆ្នាំ២០១៥ រហូតដល់ចុងឆ្នាំ២០១៧នេះ គឺមានចំនួន ១ម៉ឺន៣ពាន់ គេហទំព័រ។ ក្រៅពីនេះ គឺនៅមានគណនីបណ្តាញសង្គម ប្រមាណជាជិត១០លានទៀត ដែលត្រូវបានបិទ។ អាជ្ញាធរចិន លើកឡើងថា នេះជាការអនុវត្តច្បាប់ ទៅលើគេហទំព័រ ឬគណនីបណ្តាញសង្គមណា ដែលមិនគោរពបទវិធាន នៃការប្រើប្រាស់ បណ្តាញអ៊ីនធឺនែត។ ក៏ប៉ុន្តែសម្រាប់សកម្មជនការពារសិទ្ធិមនុស្ស នេះគ្រាន់តែជាលេស ដើម្បីរិតត្បិតសិទ្ធិសេរីភាព ក្នុងការបញ្ចេញមតិ នៅតាមអ៊ីនធឺនែតតែប៉ុណ្ណោះ។
បិទគេហទំព័រ១៣០០០ និងគណនីបណ្តាញសង្គម១០លាន
ថ្វីបើចិន ជាប្រទេសដែលមានប្រជាជនប្រើប្រាស់បណ្តាញអ៊ីនធឺនែត ច្រើនជាងគេបង្អស់ លើលោកយើងនេះក្តី ក៏ប៉ុន្តែ ចិនគឺជាប្រទេស ដែលមានអាជ្ញាធរដាក់ច្បាប់ ដាក់កំហិតយ៉ាងតឹងតែងខ្លាំងជាងគេដែរ ដើម្បីគ្រប់គ្រងបណ្តាញអ៊ីនធឺនែតនេះ។ កាលពីឆ្នាំ២០១៥ អង្គការ American Freedom House ធ្លាប់បានចេញរបាយការណ៍មួយរួចមកហើយ ស្តីពីការប្រើច្បាប់ដ៏តឹងតែង ពីសំណាក់រដ្ឋាភិបាលចិន ដើម្បីគៀបសង្កត់ ការប្រើប្រាស់បណ្តាញអ៊ីនធឺនែត ពោលគឺតឹងតែងជាង នៅស៊ីរី និងនៅអ៊ីរ៉ង់ ដែលសុទ្ធជាប្រទេសមានរបបផ្តាច់ការទៅទៀត។
គេហទំព័រអ៊ីនធឺនែត ព្រមទាំងអាជ្ញាបណ្ណបើកប្រើ សរុបទាំងអស់១ម៉ឺន៣ពាន់ និងគណនីបណ្តាញសង្គម ចំនួន ជិត១០លាន ដែលត្រូវបានគេបិទនេះ គឺអាជ្ញាធរចិន អះអាងថា ជាការអនុវត្តច្បាប់ ដើម្បីប្រយុទ្ធប្រឆាំង និងទប់ស្កាត់ អំពើហិង្សា ការចែកចាយរូបភាព ឬអត្ថបទអាសអាភាស និងដើម្បីធានាការពារសន្តិសុខ ស្ថិរភាពសង្គមជាតិ។
តួលេខដែលទីភ្នាក់ងារ ព័ត៌មានផ្លូវការចិនបានចុះផ្សាយនេះ តាមពិតទៅគឺគ្មានអ្វីគួរឲ្យភ្ញាក់ផ្អើលទេ។ ផ្ទុយទៅវិញ វារិតតែបង្ហាញ អំពីចរន្តនយោបាយ កាន់តែផ្តាច់ការទៅ ផ្តាច់ការទៅ ចាប់តាំងពីលោក ស៊ី ជីនពីង បានឡើងកាន់តំណែងមក។ យ៉ាងណាមិញ លោក Wang Shengjun សមាជិកគណកម្មាធិការអចិន្ត្រៃយ៍នៃរដ្ឋសភាចិន ដែលត្រូវបានកាសែតខាងលើស្រង់សំដី បាននិយាយ ប្រកបដោយមោទនភាពថា គោលនយោបាយរិតបង្តឹងយ៉ាងរឹងមាំ កន្លងមកនេះ បានហុចផលល្អ ធ្វើឲ្យមនុស្សខ្លាចខ្លាំងណាស់ មិនហ៊ានល្មើសទេ។
បទល្មើសធ្វើវិទ្ធង្សនា បង្កចលាចល និងអស្ថិរភាពសង្គម
កាលពីជំនាន់បូរាណ ចិនបានកសាងមហាកំផែង ដើម្បីការពារកុំឲ្យសត្រូវឈ្លានពាន តែពេលនេះ របបកុម្មុយនីស្តចិន បានបង្កើតប្រព័ន្ធដ៏សម្បើមមួយ មានឈ្មោះថា « មហាកំផែងអេឡិចត្រូនិក » ដើម្បីទប់កុំឲ្យប្រជាជនខ្លួន សម្តែងមតិ ផ្លាស់ប្តូរយោបល់ ឬចែកចាយព័ត៌មានសំខាន់ៗជដើម។ Facebook Google Twitter Youtube ជាដើម ត្រូវបានអាជ្ញាធរចិន បិទខ្ទប់មិនឲ្យមានទាំងអស់។ ប្រជាជនចិន បានបង្កើត ប្រព័ន្ធតូចៗ ដាច់ដោយឡែកផ្សេងទៀត ដូចជា Weibo និង WeChat ជាដើម។ ក៏ប៉ុន្តែ បណ្តាញសង្គមទាំង២នេះ ត្រូវបានអាជ្ញាធរចិន ត្រួតពិនិត្យយ៉ាងជាប់ស្អិត ហើយបិទខ្ទប់ ឬលប់ចោលតែម្តង នូវសារសរសេរណាមួយ ដែលគេគិតថា មិនស្របនឹងគោលនយោបាយបក្សកុម្មុយនីស្តិចិន។
មានពាក្យស្លោកមួយពោលថា « ទីណាមានការជិះជាន់ ទីនោះតែងតែមានការរើបំរាស់ »។ ជាការពិតណាស់ សម្លេងរិះគន់ តវ៉ា នៅតែមានជានិច្ច។ គ្រាន់តែថា អ្នកដែលហ៊ាន ចេញមុខរិះគន់ សរសេរអត្ថបទវិភាគណាមួយ ស្តីពីបញ្ហាសង្គម អំពើអយុត្តិធម៌ អំពើពុករលួយជាដើម គឺអ្នកនោះត្រូវប្រថុយនឹងគ្រោះថ្នាក់។ គ្រោះថ្នាក់ ព្រោះអាជ្ញាធរចិន អាចចោទប្រកាន់ ពីបទធ្វើវិទ្ធស្សនា ពន្យុះចលាចល អស្ថិរភាពសង្គមជាដើម ដោយយោងលើច្បាប់គ្រប់គ្រងការប្រើប្រាស់អ៊ីនធើនែតមួយ ដែលត្រូវបានអនុម័តនៅឆ្នាំ២០១៦។
មានអ្នកសរសេរទំព័រBlog នៅចិន ច្រើននាក់ណាស់ ដែលត្រូវបានគេចាប់ដាក់គុក។ កាលពីខែសីហាកន្លងទៅនេះ យុវជនម្នាក់ ឈ្មោះ Lu Yuyu ត្រូវបានគេកាត់ទោស ឲ្យជាប់ពន្ធនាគារ៤ឆ្នាំ ពីបទពន្យុះឲ្យមានវិបត្តិក្នុងសង្គម ដោយគ្រាន់តែយុវជននោះ បានដាក់ផ្សាយវីដេអូមួយ ស្តីពី បាតុកម្មតវ៉ារបស់ប្រជាជនចិន។
VPN ជាធម្យោបាយថ្មីដើម្បីគេចចេញពីការហាមឃាត់
កន្លងមក ប្រជាជនចិន បានប្រើប្រាស់មធ្យោបាយបច្ចេកវិទ្យាច្រើនណាស់ ដើម្បីគេចចេញពីការហាមបំរាម ឬការរិតត្បិតទាំងអស់នេះ។ ជាក់ស្តែង បណ្តាញWeibo ឬ WeChat នេះហើយ ដែលប្រជាជនចិន បានស្ថាបនាវាឡើង ដើម្បីជំនួស Facebook ឬTwitter។ ក្រៅពីនេះ ប្រជាជនចិនមួយចំនួនធំ ជាពិសេសយុវជនក្មេងៗ ដែលវៃឆ្លាត គេបានប្រើ ប្រព័ន្ធពិសេសមួយ គឺប្រព័ន្ធ VPN (Virtual Privat Network)។ ប្រព័ន្ធនេះ គឺប្រៀបដូចជាកញ្ចក់ ដើម្បីបាំង មិនឲ្យប្រព័ន្ធរ៉ាដារបស់ចិន ចាប់បានថាអ្នកកំពុងប្រើនេះ ស្ថិតនៅក្នុងប្រទេសចិន។
ប្រព័ន្ធVPN នេះ គេអាចយកមកដំឡើង ដាក់ប្រើនៅលើទូរស័ព្ទដៃ ឬកុំព្យូទ័របាន។ មិនត្រឹមតែប៉ុណ្ណោះ មានអ្នកជំនាញចិន ខ្លះ បានទាំងផលិតប្រព័ន្ធ VPN ផ្សេងៗគ្នា ដើម្បីដាក់លក់ នៅលើបណ្តាញអ៊ីនធឺនែតទៀតផង។
ក៏ប៉ុន្តែ VPN វាបានក្លាយជាមុខសញ្ញាថ្មី នៃការហាមឃាត់រួចទៅហើយ។ មានករណីផ្តន្ទាទោស អ្នកដែលប្រើ និងផលិតកម្មវិធី VPN នេះ ១ករណីរួចទៅហើយ។ កាលពីថ្ងៃទី ២០ ខែធ្នូ ថ្មីៗនេះ តុលាការចិន ខេត្តGuanxi បានផ្តន្ទាទោស បុរសម្នាក់ឈ្មោះ Wu Xiangyang ឲ្យជាប់គុក ៥ឆ្នាំកន្លះ ពីបទផលិត និងលក់ប្រព័ន្ធ VPN លើបណ្តាញអ៊ីនធឺនែត ចន្លោះពីឆ្នាំ២០១៣ ដល់ឆ្នាំ២០១៧។ ក្រៅពីទោសពន្ធនាគារ ជនជាប់ចោទ ក៏ត្រូវបង់ប្រាក់ចំនួន ៥សែនយ័ន ដែលស្មើនឹង ៦៤ម៉ឺនអឺរ៉ូទៀត។ តុលាការចិន អះអាងថា មកពីជននេះ មិនមានអាជ្ញាបណ្ណអនុញ្ញាតិឲ្យផលិតនិងលក់ កម្មវិធីបច្ចេកវិទ្យានេះទេ។
តាមពិតទៅ មុននឹងត្រូវបានប្រជាជនចិនសាមញ្ញយកមកប្រើប្រាស់ ដើម្បីគេចចេញពីការហាមឃាត់តាមបណ្តាញអ៊ីណធឺនែត ប្រព័ន្ធ VPNនេះ ត្រូវបានក្រុមហ៊ុន ឬសហគ្រាសអន្តរជាតិនានា ដែលមានទីតាំងនៅចិន បានប្រើវារួចទៅហើយ។ ការប្រើប្រព័ន្ធ VPN នេះ ជារឿងចាំបាច់សម្រាប់ក្រុមហ៊ុនទាំងនោះ ព្រោះដើម្បីទំនាក់ទំនង ក្នុងប្រព័ន្ធរួមជាមួយនឹងសាខា ឬដៃគូពាណិជ្ជកម្មផ្សេងទៀតនៅក្រៅប្រទេស។ ពុំនោះទេ គេមិនអាចធ្វើការបានទេ ព្រោះចិនបិទខ្ទប់ គេហទំព័រអ៊ីនធឺនែតច្រើនណាស់។
ចិនដាក់កំហិត Apple និងក្រុមហ៊ុនផ្គត់ផ្គង់ សេវាកម្មអ៊ីនធើនែតនៅចិន ឲ្យបិទVPN
គេជឿថា ចិនអាចនឹងចេញវិធានច្បាប់ថ្មីបន្ថែមទៀត ដើម្បីគ្រប់គ្រង ការប្រើប្រាស់ និងការដាក់លក់ ប្រព័ន្ធ VPN នេះជាពិសេសសម្រាប់ អ្នកប្រើប្រាស់ជាលក្ខណៈឯកជនទូទៅ។ យ៉ាងណាមិញ កាលពីខែកក្កដា ក្រុមហ៊ុន Apple បានសុខចិត្ត ធ្វើតាមសំណើរបស់រដ្ឋាភិបាលចិនហើយ ថានឹងលប់ចេញកម្មវិធី VPN ទាំងអស់ ពីក្នុង Apple Store ដើម្បីកុំឲ្យប្រជាជនចិន ប្រើបាន។
ដោយឡែក បើតាមការចុះផ្សាយរបស់ ទីភ្នាក់ងារ Bloomberg បានឲ្យដឹងថា រដ្ឋាភិបាលចិន បានបញ្ជាទៅ ក្រុមហ៊ុនផ្គត់ផ្គង់សេវាកម្មអ៊ីនធឺនែតទាំង៣របស់ចិន មាន China Telecom China Unicom និង China Mobile ថាត្រូវតែបិទ កុំឲ្យមានប្រើ ប្រព័ន្ធ VPN ឲ្យសោះចាប់ពីខែ កុម្ភះ ឆ្នាំ២០១៨នេះទៅ។ ដូច្នេះ យើងឃើញហើយ ពីការតាំងចិត្ត ដ៏មុតមាំ របស់រដ្ឋាភិបាលចិន ក្នុងការបិទខ្ទប់សិទ្ធិប្រើប្រាស់អ៊ីនធឺនែត ដោយសេរីរបស់ប្រជាជនខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ