រដ្ឋាភិបាលតួកគី បណ្តេញមនុស្ស២៧០០នាក់ បន្ថែមទៀត ចេញពីមុខងាររដ្ឋ
នៅប្រទេសតួកគី កាលពីថ្ងៃអាទិត្យទី២៤ធ្នូ ម្សិលមិញនេះ រដ្ឋាភិបាលទើបតែបានចេញក្រិត្យថ្មីមួយទៀត ដោយបានបណ្តេញបុគ្គលិគរដ្ឋ ប្រមាណជា២៧០០នាក់ ពីមុខងារ។ មនុស្សទាំងនោះ ត្រូវបានជាប់ចោទពីបទ បានចូល ឬក៏មានទំនាក់ទំនង ជាមួយនឹងបណ្តាញភេរវកម្ម។ គួរបញ្ជាក់ថា ចាប់តាំងពីមានហេតុការណ៍ធ្វើរដ្ឋប្រហារមិនបានសម្រេច កាលពីខែកក្កដា ឆ្នាំ២០១៦ រដ្ឋាភិបាលលោកអ៊ែរដូហ្កាន់ បានបើកយុទ្ធនាការ ចាប់មនុស្ស និងបណ្តេញមនុស្សចេញពីស្ថាប័នរដ្ឋ រាប់ម៉ឺននាក់ ដោយចោទថា ពួកគេមានជាប់ទាក់ទង និងចលនានយោបាយប្រឆាំង ដែលជាប្រភពនៃការធ្វើរដ្ឋប្រហារ។
ចុះផ្សាយនៅថ្ងៃ៖
បុគ្គលិកស្ថាប័នរដ្ឋ សរុបទាំងអស់ ២៧៥៦នាក់ ត្រូវបានគេលប់ឈ្មោះចេញ ពីមុខងារ ដោយយោងតាមក្រិត្យច្បាប់មួយ ចេញដោយរដ្ឋាភិបាលតួកគី កាលពីថ្ងៃអាទិត្យ ទី ២៤ធ្នូ។ បុគ្គលិករដ្ឋទាំងនោះ មាននៅតាមក្រសួងធំៗ ដូចជាក្រសួងមហាផ្ទៃ ក្រសួងការបរទេស ក្រសួងអប់រំ និងក្រសួងការពារជាតិជាដើម។ ហើយក្នុងចំណោម អ្នកដែលត្រូវគេលប់ឈ្មោះពីការងារនេះ គឺមានប្រមាណ៦៣៧នាក់ ជាទាហាន និង១០៥នាក់ គឺជាសាស្ត្រាចារ្យ នៅសកលវិទ្យាល័យ។
ក្រិត្យច្បាប់នេះ បានសរសេរថា ជនដែលជាប់ឈ្មោះទាំងអស់នេះ គឺសុទ្ធតែជាមនុស្ស បើមិនមែនជាសមាជិក ក៏មានជាប់ពាក់ព័ន្ធនឹងបណ្តាញភេរវកម្ម ឬក៏បណ្តាញឧក្រិដ្ឋណាមួយ ដែលធ្វើសកម្មភាព ប្រឆាំងនឹងសន្តិសុខជាតិ ដែរ។ ក្រៅពីដកហូតមុខដំណែងមនុស្សទាំង២៧០០នាក់នេះ ក្រិត្យច្បាប់នេះ បានកំណត់ឲ្យបិទស្ថានប័នចំនួន១៧ ទូទាំងប្រទេសតួកគី ក្នុងនោះមាន ការិយាល័យនិពន្ធផ្សាយសារព័ត៌មានចំនួន២ និងសមាគមចំនួន៧ផងដែរ។
បន្ថែមពីនេះ រដ្ឋាភិបាលតួកគី បានចេញក្រិត្យច្បាប់មួយទៀត ដោយបានកំណត់ថា ជនដែលជាប់ចោទពីបទធ្វើបំពាននឹងច្បាប់ធម្មនុញ្ញ ក៏ដូចជាមានបំណងផ្តួលរំលំរដ្ឋាភិបាល នឹងត្រូវបញ្ជូនខ្លួនទៅចំពោះមុខតុលាការ។ ហើយនៅចំពោះមុខតុលាការ ជនជាប់ចោទទាំងអស់ ត្រូវតែស្លៀកសំលៀកបំពាក់ ពណ៌ដូចគ្នា ទាំងលើទាំងក្រោម បើមិនពណ៌ប្រផេះ គឺពណ៌ក្រហមត្នោតក្រម៉ៅដែរ។ ក្រិត្យនេះ នឹងចូលជាធរមាននៅចុងខែមករា ហើយអនុវត្តតែទៅលើជនជាប់ចោទ ជាភេទប្រុសប៉ុណ្ណោះ។ លោកអ៊ែរដូហ្កាន់ ប្រធានាធិបតីតួកគី ធ្លាប់បាននិយាយឲ្យដឹងថា អ្នកជាប់ចោទ ពីបទចូលរួមធ្វើសកម្មភាពប្រឆាំងរដ្ឋាភិបាល មិនអាចស្លៀកពាក់ស្អាតបាត ចងក្រវ៉ាត់ក នៅចំពោះមុខតុលាការទេ គឺត្រូវតែស្លៀកពាក់ ពណ៌តែមួយដូចគ្នាទាំងអស់ ឲ្យដូចអ្នកទោសអញ្ចឹង។
សូមរំលឹកថា ចាប់តាំងពីមានរដ្ឋប្រហារមិនបានសម្រេច នៅខែកក្កដា ឆ្នាំ២០១៦មក រដ្ឋាភិបាលលោកអ៊ែរដូហ្កាន់ បានចាប់មនុស្សដាក់ឃុំ ចំនួន៥៥០០០នាក់ និងបានដកហូតមុខតំណែងបុគ្គលិករដ្ឋចំនួន១សែន៤ម៉ឺននាក់ រួចមកហើយ។ រដ្ឋាភិបាលតួកគី បានសម្រេចពន្យា ដាក់បន្តច្បាប់អាជ្ញាសិក ចំនួន៥ដងមកហើយ។ ស្ថានភាពេនះ គឺជាលេស ដើម្បីប្រើច្បាប់អាជ្ញាសិក ចាប់ចងមនុស្ស ដោយមិនចាំបាច់ ឆ្លងកាត់ការវិនិច្ឆ័យពីតុលាការ។ ប្រតិបត្តិការដែលលោកអ៊ូដូហ្កាន់ ដាក់ឈ្មោះថាជ “ការកំចាត់មេរោគ” នេះ ត្រូវបានគេមើលឃើញថា ជាប្រតិបត្តិការបំបិទសម្លេងនយោបាយប្រឆាំង នៅតួកគីតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ