សេដ្ឋកិច្ច៖ បន្ទាប់ពីអាមេរិក ទីផ្សារមូលបត្រអាស៊ីកំពុងដាំក្បាលចុះ គួរឲ្យបារម្ភ
ចុះផ្សាយនៅថ្ងៃ៖
ស្តាប់ - ០៦:២៣
នៅប៉ុន្មានថ្ងៃចុងក្រោយនេះ សេដ្ឋកិច្ចសហរដ្ឋអាមេរិក បានជួបភាពរំជើបរំជួលយ៉ាងខ្លាំង ដែលបានបណ្តាលឲ្យ ទីផ្សារភាគហ៊ុនអាមេរិក ធ្លាក់ថ្លៃយ៉ាងទាបបំផុត មិនធ្លាប់មានទេ ពេញមួយសប្តាហ៍ បើរាប់ចាប់ពីវិបត្តិសេដ្ឋកិច្ច កាលពីឆ្នាំ២០០៨មក។ នៅថ្ងៃអង្គារទី២៥ធ្នូ ភាពមិនប្រាកដប្រជា នៃទីផ្សារអាមេរិកនេះ បានជះឥទ្ធិពលរាលដាល ទៅដល់ទីផ្សារហិរញ្ញវត្ថុនៅអាស៊ី។ ទីផ្សារភាគហ៊ុនជប៉ុន នៅតូក្យូ បានបិទទ្វារ ជាមួយការធ្លាក់ថ្លៃភាគហ៊ុន ដល់ទៅជាង៥%។ ចំណែកផ្សារហ៊ុនអាស៊ី នៅតាមប្រទេសមួយចំនួនទៀត បានបិទទ្វារសម្រាក ក្នុងថ្ងៃបុណ្យណូអែល ក៏ប៉ុន្តែគេព្រួយបារម្ភណាស់ ថាទីផ្សារទាំងនោះ អាចនឹងបើកទ្វារមកវិញ ជាមួយនឹងការខាតបង់យ៉ាងសន្ធឹកសន្ធាប់។
កាលពីថ្ងៃចន្ទទី២៤ធ្នូ ដែលជាថ្ងៃត្រៀមឆ្លងបុណ្យណូអែល ទីផ្សារមូលបត្ររបស់អាមេរិក បានរង្គើយ៉ាងខ្លាំង និងបានធ្លាក់ថ្លៃស្រឺតៗ បង្កភាពច្របូកច្របល់។ អត្រាតម្លៃគោលនៃទីផ្សារមូលបត្រអាមេរិក Dow Jones Industrial Average បានធ្លាក់ចុះចំនួន២,៩២%។ ចំណែកនៅ Nasdaq បានធ្លាក់ចុះ ២,២១%។ វាជាការដាំក្បាលចុះ យ៉ាងគំហុក មិនធ្លាប់មានទេ បើគិតពីឆ្នាំ២០០៨មក នៅពេលដែលមានវិបត្តិសេដ្ឋកិច្ចពិភពលោក។
ផ្សារមូលបត្រជប៉ុន ដាំក្បាលចុះ៥%
ផ្សារហ៊ុនអាមេរិកជ្រួលច្របល់ គ្មានផ្សារហ៊ុនណា អាចរួចខ្លួនបានទេ។ ជាក់ស្តែងនៅអាស៊ីតែម្តង។ នៅជប៉ុនពេលបិទទ្វារ កាលពីយប់ថ្ងៃចន្ទ ទី២៤ ធ្នូ ទីផ្សារមូលបត្រ Nikkei ក្រុងតូក្យូ បានដាំក្បាលចុះ ដល់ទៅ៥,០១% ដែលកម្រិតនេះ គឺវាធ្លាក់ទាបបំផុត ក្នុងរវាង២០ខែចុងក្រោយនេះ។ ស្ថានភាពនេះ បានរុញផ្សារមូលបត្រជប៉ុន ឲ្យធ្លាក់ចុះ ក្នុងលំដាប់ទីផ្សារដែលអួរអាប់បំផុត។ ក្រុមហ៊ុនធំៗរបស់ជប៉ុន មានHonda Sony Toyota Nissan Panasonic ម្នាក់ៗ គឺសុទ្ធធ្លាក់តម្លៃហ៊ុន ជាង៥%ទាំងអស់គ្នា។
លោក Makoto Sengoku អ្នកវិភាគនៅវិទ្យាស្ថាន Tokai Tokyo បានលើកឡើងថា លោកស្មានមិនដល់ទេ ថាទីផ្សារ ដាំក្បាលចុះយ៉ាងលឿនបែបនេះ។ មិនត្រឹមតែប៉ុណ្ណោះ លោកសម្លឹងមិនឃើញសោះ ថានឹងមានអ្វី មកជួយសម្រួល ឲ្យបានប្រសើរវិញ ក្នុងពេលឆាប់ៗខាងមុខនេះទេ។
ចំណែកនៅទីផ្សារមូលបត្រចិនវិញ ក៏បានធ្លាក់ចុះក្រោមបន្ទាត់ក្រហមដែរ។ ទីផ្សារ មូលបត្រនៅសៀងហៃ និងនៅឆិនចិន បានធ្លាក់ចុះចំនួន១%។ រីឯផ្សារមូលបត្រផ្សេងៗទៀត នៅហុងកុង កូរ៉េខាងត្បូង អូស្ត្រាលី សឹង្ហបុរី និងណូវែល ហ្សេឡង់ជាដើម គឺត្រូវបិទទ្វារសម្រាក ក្នុងឱកាសបុណ្យណូអែល។ ក៏ប៉ុន្តែទោះបិទទ្វារក៏ដោយ ក៏មិនមែនមានន័យថា គឺមិនព្រួយបារម្ភ ពីការខាតបង់នោះទេ។
ដូណាល់ ត្រាំ បង្កចលាចល
មានហេតុផលច្រើន ដែលជារួម គឺស្ថិតនៅក្នុងទីផ្សាររបស់អាមេរិក។ លោក Makoto Sengoku ពន្យល់ថា ទីផ្សារចលាចលខ្លាំងបែបនេះ ដោយសារមានបញ្ហាបូកបញ្ចូលគ្នា ដូចជា ផលវិបាក នៃសង្រ្គាមពាណិជ្ជកម្ម រវាងអាមេរិក និងចិន ដែលចាប់ផ្តើមលេចចេញជារូបរាង្គ ហើយចុងក្រោយគឺបណ្តាលមកពីបញ្ហាហិរញ្ញវត្ថុ និងវិបត្តិផ្ទៃក្នុងនៅអាមេរិក បង្កឡើងដោយរដ្ឋាភិបាលរបស់លោកដូណាល់ ត្រាំ។ បញ្ហាទាំងអស់នេះ គឺធ្វើឲ្យអ្នកវិនិយោគ ព្រួយបារម្ភ លែងទុកចិត្តទីផ្សារមូលបត្ររបស់អាមេរិក។
នៅអាមេរិក បន្ទាប់ពីបានធ្វើឲ្យរដ្ឋមន្ត្រីការពារជាតិ លោក Jim Mattis លាចេញពីតំណែង លោកដូណាល់ ត្រាំ បានបង្កឲ្យមានរឿងរ៉ាវមួយទៀត កាលពីចុងសប្តាហ៍កន្លងទៅ ទាក់ទិននឹងបំណង ចង់ដកតំណែង លោកអគ្គទេសាភិបាលធនាគារកណ្តាល។ ដំណឹងលេចឮថា លោកដូណាល់ ត្រាំ ខឹងនឹងអគ្គទេសាភិបាលធនាគារកណ្តាល ដែលបានសម្រេច តំឡើងអត្រាការប្រាក់ប្រាក់។ រដ្ឋមន្ត្រីក្រសួងហិរញ្ញវត្ថុ ខំចេញមុខមកបកស្រាយ ថាដំណឹងនេះមិនពិតទេ។ តែទន្ទឹមនឹងនេះ រដ្ឋមន្ត្រីហិរញ្ញវត្ថុអាមេរិក បានអះអាងថា លោកបានជួបប្រជុំបន្ទាន់ ជាមួយនឹងតំណាងធនាគារធំៗទាំង៦របស់អាមេរិក។
អ្នកវិភាគទីផ្សារជាច្រើន បានលើកឡើងដូចៗគ្នា ថាការដែលរដ្ឋមន្ត្រីហិរញ្ញវត្ថុ ហៅតំណាងធនគារធំៗទាំង៦ទៅជួប គឺវាប្រាកដជាមានបញ្ហាអ្វីមួយហើយ ហើយរឿងនេះ គឺវាធ្វើឲ្យទីផ្សារកាន់តែជ្រួលច្របល់។ ស្រាប់តែនៅល្ងាចថ្ងៃចន្ទ ម្សិលមិញនេះ លោកដូណាល់ ត្រាំ បានបន្ថែមបញ្ហាមួយទៀត ដោយបានសរសេរសារ លើទំព័រTwitter ថា៖ “កំហុសគ្រប់យ៉ាង ដែលធ្វើឲ្យសេដ្ឋកិច្ចអាមេរិកជួបបញ្ហា គឺបណ្តាលមកពីធនាគារកណ្តាល”។ លោកត្រាំ សរសេរបន្តថា៖ “ធនាគារកណ្តាល មិនចេះស្មានទីផ្សារ ហើយមិនយល់ពីការធ្វើសង្រ្គាមពាណិជ្ជកម្ម”។ សម្តីសរសេរបន្ទោសស្ថាបន័គ្រប់គ្រងទីផ្សារហិរញ្ញវត្ថុជាតិ នៅតាមទំព័រTwitter បែបនេះ គឺរិតតែបង្ហាញថា រវាងលោកដូណាល់ ត្រាំ និងនាយកធនាគារកណ្តាល គឺកំពុងតែមើលមុខគ្នា មិនត្រង់ ដូចពាក្យចចាមអារ៉ាមមែនហើយ។
លោកស្រី Nancy Pelosi ប្រធានក្រុមប្រជាធិបតេយ្យនៅសភាអាមេរិក បានលើកឡើងថា លោកដូណាល់ ត្រាំ កំពុងធ្វើឲ្យប្រទេសមានចលាចល តាមរយៈការប្រកាសសង្រ្គាម ឈ្លោះគ្នាជាមួយធនគារកណ្តាល ខណៈដែលហិរញ្ញវត្ថុអាមេរិក កំពុងតែជួបបញ្ហាស្រាប់ទៅហើយ។ ច្បាប់កញ្ចប់ថវិកា នៅជាប់គាំង ដែលធ្វើឲ្យស្ថាប័ន ក្រសួងនានារបស់អាមេរិក ត្រូវបិទទ្វារដោយសារតែគ្មានប្រាក់ចំណាយ។ មន្ត្រីរដ្ឋការ នៃក្រសួងមួយចំនួន ប្រមាណ៨សែននាក់ ត្រូវសម្រាកនៅផ្ទះ ដោយសារតែស្ថាប័នខ្លួនបិទទ្វារ។ ស្ថាប័នធំៗ របស់អាមេរិក បិទទ្វារមិនដំណើរការបែបនេះ តើអ្នកវិនិយោគមួយណា ដែលមិនភ័យនោះ? លោក Stephen Innes អ្នកវិភាគហិរញ្ញវត្ថុនៅ Oanda Asia-Pacifique បានលើកឡើងថា អ្នកវិនិយោគភ័យ ព្រោះគេមិនទុកចិត្តរដ្ឋាភិបាលលោកដូណាល់ ត្រាំទេ។
ដរាបណា ផ្សារមូលបត្រអាមេរិកនៅរំជើបរំជួល អ្នកវិនិយោគនៅតែភ័យ
គេពិបាកស្មាន ណាស់ ថាបញ្ហាធ្លាក់ថ្លៃមូលបត្រនេះ និងចប់នៅពេលណា ព្រោះថា នៅមានបញ្ហាមួយទៀត ក៏កំពុងចោទដែរ។ គឺបញ្ហាតម្លៃប្រេងឆៅ ដែលធ្លាក់ថ្លៃខ្លាំង។ អ្នកវិនិយោគ នៅលើផ្សារមូលបត្រ័ប្រេង នៅតែមិនទាន់ទុកចិត្ត ចំពោះចំណាត់ការរបស់អង្គការOPEPទេ។ តែយ៉ាងណាក៏ដោយ អាជ្ញាធរសេដ្ឋកិច្ចជប៉ុន បានសម្តែងសុទិដ្ឋិនិយម។ លោក Taro Aso រដ្ឋមន្ត្រីក្រសួងហិរញ្ញវត្ថុជប៉ុន បានលើកឡើងថា ទីផ្សារបញ្ចេញប្រតិកម្មរាងជ្រុលពេក បើប្រៀបធៀបទៅនឹង បញ្ហាជាក់ស្តែង។
ទោះយ៉ាងនេះក្តី ប្រភពបញ្ហាចំបង គឺមកពីភាពមិនប្រាកដប្រជា នៅក្នុងទីផ្សារមូលបត្ររបស់អាមេរិក។ ដូច្នេះ បញ្ហានេះនៅបន្តយូរកម្រិតណា គឺវាអាស្រ័យលើ សុខភាពទីផ្សារហិរញ្ញវត្ថុអាមេរិក។ ដរាបណា លោកដូណាល់ ត្រាំ នៅតែមានៈ ឈ្លោះគ្នាដោយចំហរ ជាមួយធនាគារកណ្តាល ដោយគ្មានការជជែក រកដំណោះស្រាយ ក្នុងភាពស្ងប់ស្ងាត់ទេនោះ នោះអ្នកវិនិយោគ នៅតែមិនទុកចិត្តដដែល។ តែបើនិយាយមួយបែបទៀត គឺថា នៅពីក្រោយការចេញមុខឈ្លោះ ជាមួយនឹងធនាគារកណ្តាលអាមេរិកនេះ យើងមិនដឹងថាតើ លោកដូណាល់ ត្រាំ មានបំណង ឬយុទ្ធសាស្ត្រអ្វីឲ្យពិតប្រាកដទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ