ការរុករកយន្តហោះMH370 នៅក្នុងសមុទ្រ ត្រូវផ្អាក
អាជ្ញាធរអូស្ត្រាលី ម៉ាឡេស៊ី និងចិន បានប្រកាសរួមគ្នា នៅថ្ងៃអង្គារទី១៧ មករានេះថា ការរុករកសាកសពយន្តហោះ MH370 ដែលបានបាត់ដានកាលពីជិត៣ឆ្នាំមុននោះ នឹងត្រូវផ្អាក។ អាជ្ញាធរប្រទេសទាំងបី បានផ្តល់ហេតុផលថា ការរុករកអស់រយៈពេលជិត៣ឆ្នាំមកនេះ មិនបានលទ្ធផលអ្វីទាល់តែសោះ បើទោះបីជាមានជំនួយពីអ្នកជំនាញ និងសម្ភារៈបច្ចេកវិទ្យាខ្ពស់យ៉ាងណាក៏ដោយ។ តែយ៉ាងណា ក្រុមការងាររុករងនេះ នៅតែបន្តសង្ឃឹមថា ថ្ងៃណាមួយគេនឹងអាចដឹងតំរុយខ្លះ ហើយបើកការរុករកឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
កាលពី២សប្តាហ៍មុន អាជ្ញាធរម៉ាឡេស៊ី បានប្រកាសឲ្យដឹងថា ប្រតិបត្តិការរុករកយន្តហោះ MH370 នឹងត្រូវបិទបញ្ចប់។ ទើបតែនៅថ្ងៃអង្គារទី ១៧មករា ក្រុមការងារនៃអជ្ញាធរនៃប្រទេសពាក់ព័ន្ធទាំងបី មានម៉ាឡេស៊ី ចិន និងអូស្ត្រាលី បានចេញសេចក្តីជូនដំណឹងរួមគ្នាមួយ ថា ការរុករកយន្តហោះនេះ នឹងត្រូវផ្អាក។
សេចក្តីជូនដំណឹង មានសរសេរថា “យន្តហោះBoeing 777 ជើងហោះហើរលេខ MH370 មិនត្រូវបានរកឃើញថានៅត្រង់ណាទេ បើទោះបីជាក្រុមការងារ បានខិតខំប្រើប្រាស់អស់មធ្យោបាយ មិនថាគំនិតប្រាជ្ញារបស់អ្នកជំនាញពូកែៗ រឺក៏សម្ភារៈបច្ចេកវិទ្យា ទំនើបបំផុតយ៉ាងណាក៏ដោយ។ ដូច្នេះ ការរុករកនៅបាតសមុទ្រក្នុងបរិវេណ ប្រមាណជា១២ម៉ឺនគីឡូម៉ែត្រការ៉េ ក្នុងមហាសមុទ្រឥណ្ឌា ភាគខាងត្បូង នឹងត្រូវផ្អាក”។
ក្រុមការងារ បានឆ្លៀតបញ្ជាក់ថា “ការសម្រេចចិត្តផ្អាកប្រតិបត្តិការរុករកនេះ មិនមែនធ្វើឡើងដោយងាយស្រួល យកតែរួចខ្លួននោះទេ ផ្ទុយទៅវិញ ក្រុមការងារបានសម្រេចចិត្ត ទាំងលំបាក និងមានការសោកស្តាយជាទីបំផុត”។
បន្ទាប់ពីបានទទួលដំណឹងនេះ សមាគមគ្រួសារជនរងគ្រោះ បានសម្តែងការខកបំណងជាខ្លាំង។ ក្រុមគ្រួសារជនរងគ្រោះ យល់ថា ការរុករកយន្តហោះ ត្រូវតែបន្តទៅទៀត ព្រោះវាជាកាតព្វកិច្ចរបស់អាជ្ញាធរពាក់ព័ន្ធ ហើយវាក៏ជាកាតព្វកិច្ចផងដែរ ក្នុងការស្វែងរកការពិត ដើម្បីធានាសុវត្ថិភាពដល់ការដឹកជញ្ជូនផ្លូវអាកាស។
សូមរំលឹកថា យន្តហោះ Boeing 777 ជើងហោះហើរលេខ MH370 របស់ក្រុមហ៊ុន Malaysia airlines បានបាត់ដាន កាលពីថ្ងៃទី ៨មីនា ឆ្នាំ២០១៤ ដោយនាំយកជាមួយ នូវជីវិតមនុស្ស២៣៩នាក់។ តាមការវិភាគប៉ាន់ស្មាន យន្តហោះនេះ អាចធ្លាក់ក្នុងមហាសមុទ្រឥណ្ឌា។ តែឆ្លងកាត់ការរុករកជិត៣ឆ្នាំមកនេះ គឺពុំបានរកឃើញអ្វីសោះ ក្នុងតំបន់ដែលគេគិតថាយន្តហោះនេះធ្លាក់។
ដោយឡែក គេបានរកឃើញបំណែកយន្តហោះ ជាង២០ដុំ នៅជ្រោយមហាសមុទ្រឥណ្ឌា ខាងទ្វីបអាហ្រ្វិក ដែលយោងតាមការសន្និដ្ឋាន គឺបំណែកទាំងនោះ អាចជារបស់យន្តហោះ Boeing777 ដែលបានបាត់។ ក្រោយមកទៀត ក្រុមអ្នកជំនាញ បានធ្វើការសន្និដ្ឋាន ថាត្រូវរុករកក្នុងតំបន់មួយផ្សេងទៀត ដែលមានបរិវេណប្រមាណ២៥០០០ គីឡូម៉ែត្រការ៉េ។ ក៏ប៉ុន្តែ អាជ្ញាធរម៉ាឡេស៊ី និងអូស្ត្រាលី បានសម្រេចមិនផ្តល់ភ្លើងខៀវ ដោយយល់ថា លទ្ធភាពនៃការរកឃើញសាកសពយន្តហោះ គឺមានតិចណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ