កាស្មៀរ៖ ក្រោយភេរវកម្ម នាយករដ្ឋមន្ត្រីឥណ្ឌាគំរាមថា ប៉ាគីស្ថាននឹងស្គាល់ថ្នាំខ្លាំង
ចុះផ្សាយនៅថ្ងៃ៖
កាលពីរសៀលថ្ងៃព្រហស្បតិ៍ ទី១៤ កុម្ភៈ មានហេតុការណ៍ភេរវកម្មអត្តឃាតមួយ បានកើតឡើង នៅតំបន់កាស្មៀររបស់ឥណ្ឌា។ ភេរវកម្ម ដែលបានសំដៅ វាយប្រហារទៅលើក្បួនរថយន្តទាហានប៉ារ៉ា របស់ឥណ្ឌានេះ បានបណ្តាលឲ្យស្លាប់ទាហាន ប្រមាណ៤១នាក់។ លោក ណារិន្ទ្រ ម៉ូឌី នាយករដ្ឋមន្ត្រីឥណ្ឌា បានលើកឡើងថា កងទ័ពឥណ្ឌា នឹងធ្វើឲ្យប៉ាគីស្ថាន ដែលជាអ្នកនៅពីក្រោយអំពើភេរវកម្មនេះ ស្គាល់ថ្នាំខ្លាំង ជាក់ជាមិនខាន។ គួរកត់សំគាល់ថា តំបន់កាស្មៀរនេះ គឺជាតំបន់ដែលមានជម្លោះដណ្តើមគ្នា រវាងឥណ្ឌា និងប៉ាគីស្ថាន ប្រមាណ៧០ឆ្នាំមកហើយ។ ថ្វីបើប្រទេសទាំង២ បានយល់ព្រមពុះចែកគ្នាជា២ ក៏ប៉ុន្តែការផ្ទុះអាវុធទាំងសងខាង តែងតែបានកើតឡើង ជារើយៗ។
ភេរវកម្មសំដៅសម្លាប់ទាហានឥណ្ឌា
បើសរុបទៅ ប្រមាណ៧០ឆ្នាំមកនេះ ជម្លោះសង្រ្គាមនៅតំបន់កាស្មៀរនេះ បានសម្លាប់មនុស្សមិនតិចជាង៦ម៉ឺននាក់ទេ។ ក៏ប៉ុន្តែ ការស្លាប់មនុស្សចំនួនជាង៤០នាក់ ក្នុងហេតុការណ៍ភេរវកម្មតែមួយបែបនេះ គឺជាលើកទៅមួយហើយ។ ភេរវកម្មអត្តឃាតនេះ បានកើតឡើងនៅរសៀលថ្ងៃព្រហស្បតិ៍ ទី១៤កុម្ភៈ នៅតាមបណ្តោយផ្លូវធំល្បឿនលឿន ជិតចូលទៅដល់ទីក្រុង ស្រីណាហ្កា ដែលជាទីក្រុងធំរបស់តំបន់កាស្មៀរឥណ្ឌា។
ក្បួនរថយន្តទាហានប៉ារ៉ា របស់ឥណ្ឌា ចំនួន៧៨រថយន្ត មានផ្ទុកទាហានចំនួនសរុប២៥០០នាក់ កំពុងបរកាត់តាមបណ្តោយផ្លូវនេះ ស្រាប់តែមានសម្លេងផ្ទុះយ៉ាងកក្រើក ហើយគេឃើញបំណែករថយន្តទាហាន ហោះឆេះឡើង។ តាមការឲ្យដឹង ពីអាជ្ញាធរឥណ្ឌា គ្រាប់បែកបានផ្ទុះចំរថយន្ត២ធ្ងន់ជាងគេ ហើយដែលបានបណ្តាលឲ្យស្លាប់ទាហានឥណ្ឌា ចំនួន៤១នាក់ ភ្លាមៗនៅនឹងកន្លែង។ តែយ៉ាងណា ចំនួនអ្នកស្លាប់អាចឡើងលើសនេះទៀត ព្រោះមានអ្នករបួសធ្ងន់ច្រើនណាស់។
រដ្ឋាភិបាលប៉ាគីស្ថានបដិសេធ
បើតាមប្រភពផ្លូវការ ទទួលបានដោយទីភ្នាក់ងារព័ត៌មានបារាំង AFP បានលើកឡើងថា ក្រុមអ៊ីស្លាមនិយម Jaish-e-Mohammed ដែលមានទីតាំងនៅប៉ាគីស្ថាន បានចេញមុខមកអះអាងថា ភេរកម្មសំដៅវាយប្រហារកងទ័ពឥណ្ឌានេះ គឺជាស្នាដៃរបស់ខ្លួន។ ក្រុមនេះបានឲ្យដឹងថា ភេរវកម្មអត្តឃាតនេះ បានធ្វើឡើង ដោយយុវជនអាយុ២០ឆ្នាំម្នាក់ ដែលមានស្រុកកំណើតនៅតំបន់ស្រីណាហ្កា កាស្មៀរនេះតែម្តង។
ក៏ប៉ុន្តែ សម្រាប់រដ្ឋាភិបាលឥណ្ឌាវិញ គឺគេជឿថា រដ្ឋាភិបាលប៉ាគីស្ថាន គឺជាអ្នកនៅពីក្រោយភេរកម្មនេះ។ តែយ៉ាងណា ភ្លាមៗក្រោយការចោទប្រកាន់របស់ឥណ្ឌានេះ ក្រសួងការបរទេសប៉ាគីស្ថាន បានឆ្លើយតបមកវិញថា រដ្ឋាភិបាលប៉ាគីស្ថាន មិនមែនជាអ្នកនៅក្រោយអំពើភេរវកម្មនេះទេ។ ប៉ាគីស្ថានប្រឆាំងដាច់ខាត ចំពោះការចោទប្រកាន់របស់ឥណ្ឌា ដោយគ្មានបានធ្វើការស្រាវជ្រាវពិនិត្យ ឲ្យបានច្បាស់លាស់។
“ប៉ាគីស្ថាននឹងស្គាល់ថ្នាំខ្លាំង!”
នៅថ្ងៃសុក្រ១៥កុម្ភៈ លោកណារិន្ទ្រ ម៉ូឌី នាយករដ្ឋមន្ត្រីឥណ្ឌា បានដឹកនាំការប្រជុំបន្ទាន់មួយ ជាមួយមន្ត្រីជំនាញ និងកងទ័ព។ ក្រោយការប្រជុំ លោកនាយករដ្ឋមន្ត្រីឥណ្ឌា បានប្រកាសថា ក្រុមភេរវកម្មអ៊ីស្លាម និងមេកើយ បានធ្វើរឿងមួយភ័ន្តច្រឡំធំណាស់។ ពួកទាំងនេះ នឹងស្គាល់ថ្នាំខ្លាំង របស់ឥណ្ឌាយ៉ាងចាស់ដៃ ក្នុងពេលដ៏ឆាប់ខាងមុខនេះ។
សម្តីរបស់លោកនាយករដ្ឋមន្ត្រីឥណ្ឌានេះ មានន័យថា កងទ័ពឥណ្ឌា អាចនឹងប្រើកម្លាំងវាយទៅលើប៉ាគីស្ថាន។ លោក Moeed Yusuf អ្នកវិភាគនៅ Institute of Peace នៅសហរដ្ឋអាមេរិក បានលើកឡើង ក្នុងរវាងពី២៤ ទៅ៤៨ម៉ោងទៀត អ្វីៗអាចកើតឡើង បានទាំងអស់។ ឥណ្ឌាអាចប្រើកាំភ្លើងធំ បាញ់ផ្លោងទៅខាងប៉ាគីស្ថាន។
យ៉ាងណាមិញ វាក៏មិនមែនជាលើកទីមួយដែរ ដែលកងទ័ពឥណ្ឌាប្រើកម្លាំងវាយបកទៅខាងតំបន់កាស្មៀររបស់ប៉ាគីស្ថាន។ កាលពីឆ្នាំ២០១៦ ការវាយបកសកសិក ឥណ្ឌាធ្លាប់បានធ្វើរួចហើយ បន្ទាប់ពីមានភេរវកម្ម ធ្វើទៅលើបន្ទាយទាហានឥណ្ឌា។ កាលណោះ ឥណ្ឌា បានបាញ់ផ្លោងជាច្រើនគ្រាប់ នៅតាមបណ្តោយខ្សែបន្ទាត់ ពុះចែកតំបន់កាស្មៀរជា២។
៧២ឆ្នាំ នៃតំបន់ជម្លោះតំបន់កាស្មៀរ
ជម្លោះតំបន់កាស្មៀរ កើតឡើងនៅឆ្នាំ១៩៤៧ ក្នុងពេលដែលចក្រភពអង់គ្លេស ចាប់ផ្តើមដកអាណានិគម ចេញពីអាណាចក្រឥណ្ឌា។ កាលជំនាន់នោះ អាណាចក្រឥណ្ឌា ក្រោមអាណានិគមអង់គ្លេស មានទំហំធំណាស់ មានរដ្ឋចំណុះជាង៥០០រដ្ឋឯណោះ។ រដ្ឋនីមួយៗ មានស្តេចត្រាញ់ ឬ ម៉ាហារាចា គ្រប់គ្រង រាប់តំណមកហើយ។ គឺក្នុងពេលនោះហើយ ដែលឥណ្ឌាបានឯករាជ្យ ដោយបានប្រមូលផ្តុំរដ្ឋ ឬតំបន់ណា ដែលមានម៉ាហារាចា ជាអ្នកកាន់សាសនាហិណ្ឌូ។ ចំណែកដែនដី ដែលមានប្រជាជនកាន់សាសនាអ៊ីស្លាមវិញ ត្រូវបានកកើត បែងចែកជាប្រទេស២ គឺ ប៉ាគីស្ថានខាងលិច ដែលបច្ចុប្បន្ន គឺប៉ាគីស្ថាននេះ និងប៉ាគីស្ថានខាងកើត ដែលបច្ចុប្បន្ន យើងហៅថា បងក្លាដែស នេះឯង។
ដោយឡែក តំបន់កាស្មៀរនេះ មានលក្ខណៈពិសេស ដោយសារតែតំបន់នេះ មានប្រជាជនភាគច្រើន ជាអ្នកកាន់សាសនាអ៊ីស្លាម ក៏ប៉ុន្តែម៉ាហារាចា ដែលគ្រប់គ្រងតំបន់នេះ គឺជារាជវង្សកាន់សាសនាហិណ្ឌូ ឈ្មោះ Hari Singh ។ ភាពស្ទាក់ស្ទើរ មិនដឹងទៅខាងណានេះ ក៏បានក្លាយជាប្រភពនៃជម្លោះដណ្តើមគ្នា រវាងឥណ្ឌានិងប៉ាគីស្ថាន។ ក្រោយមកនៅឆ្នាំ១៩៤៩ អង្គការសហប្រជាជាតិបានធ្វើអន្តរាគមន៍ ដោយបានកំណត់ ពុះចែកកាស្មៀរជា២។ ឥណ្ឌា គ្រប់គ្រង២ភាគ៣ ឯប៉ាគីស្ថាន គ្រប់គ្រងប្រមាណ១ភាគ៣ នៃដែនដី។
ការដណ្តើមគ្នានេះ មិនមែនត្រឹមតែដែនដីប៉ុណ្ណោះទេ តែត្រូវដឹងថា តំបន់កាស្មៀរនេះ វាស្ថិតនៅលើតំបន់ខ្ពង់រាបខ្ពស់នៃប្រជុំភ្នំហិមាល័យ។ មានន័យថាម៉េច គឺមានន័យថា គឺជាតំបន់នៃប្រភពទន្លេធំៗ ទាំងសម្រាប់ឥណ្ឌ ទាំងសម្រាប់ប៉ាគីស្ថាន។ ជាក់ស្តែង ទន្លេ ឥណ្ឌុ ដែលជាទន្លេធំបំផុតហូកាត់ប៉ាគីស្ថាន ពីជើងទៅត្បូង គឺមានប្រភពនៅតំបន់នេះ ហើយវាហូរកាត់ដែនដីកាស្មៀរ ដែលកាន់កាប់ដោយឥណ្ឌា បច្ចុប្បន្ន។ បើឥណ្ឌាចង់ធ្វើបាបប៉ាគីស្ថាន គឺងាយបំផុត។ តែយ៉ាងណា ការគ្រប់គ្រងធនធានទឹក របស់ទន្លេនេះ គឺមានសន្ធិសញ្ញាទ្វេភាគីចុះឆ្នាំ១៩៦០ជាបង្អែក។ ក៏ប៉ុន្តែ បើទៅថ្ងៃមុខមានសង្រ្គាម ឥណ្ឌាអាចប្រើបញ្ហានេះ ដើម្បីបង្អត់ប៉ាគីស្ថាន។
ក្តីសង្ឃឹមនៃសន្តិភាព ដែលនៅឆ្ងាយ…
កន្លងមក មានការព្យាយមសាកល្បង រកដំណោះស្រាយសន្តិភាពច្រើនដែរ។ តែឥណ្ឌា តែងតែបដិសេធ មិនត្រូវការឲ្យមានអន្តរាគមន៍ ពីប្រទេសមហាអំណាចណាទាំងអស់។ បញ្ហាភេរវកម្ម ដែលទើបតែកើតឡើងនេះ គឺវាជួនចំពេល ដែលឥណ្ឌាជិតដល់ថ្ងៃបោះឆ្នោតសភា។ គណបក្សហិណ្ឌូជាតិនិយម របស់លោកណារិន្ទ្រ ម៉ូឌី ប្រាកដជាយកបញ្ហានេះ ធ្វើជាលេសដើម្បីឃោសនានយោបាយ។ លោកណារិន្ទ្រ ម៉ូឌី តែងតែអះអាងខ្លួនថា មានតែគាត់ទេ ទើបអាចការពារដែនដីរបស់ឥណ្ឌា ព្រមទាំងបង្ហាញពីកម្លាំង និងមោទនភាពជាតិឥណ្ឌា។
អ្នកវិភាគ គិតថាលោកណារិន្ទ្រ ម៉ូឌី អាចយក ការវាយសងសិកទៅលើប៉ាគីស្ថាន ធ្វើជាអាវុធឃោសនានយោបាយ ដើម្បីប្រមូលសម្លេង ឈ្នះឆ្នោតសម្រាប់អាណត្តិទី២ នៅខែឧសភា ខាងមុខ។ តែយ៉ាងណា ការវាយបកទៅលើប៉ាគីស្ថាន ក៏គឺជាគ្រោះថ្នាក់សម្រាប់ឥណ្ឌាដែរ ព្រោះថាប៉ាគីស្ថាន ក៏មិនអាចនៅស្ងៀមដែរ។ អ្វីដែលគេបារម្ភ គឺថាប្រទេសទាំង២នេះ សុទ្ធតែមានអាវុធនុយក្លេអ៊ែរដូចគ្នា។ ដូច្នេះ កំដៅជម្លោះនេះ បើមិនមានម្ខាងណាទប់ទេ គឺប្រាកដជាគ្រោះថ្នាក់ធំណាស់។ អ្នកដែលរងទុក្ខធំជាងគេ គឺប្រជាជនតំបន់កាស្មៀរ ដែលរស់នៅក្នុងភាពភ័យខ្លាច ជាប់ជាប្រចាំ ព្រោះថាសន្តិភាពហាក់គ្មានពន្លឺទេ សម្រាប់ពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ