កូរ៉េខាងជើង សាកគ្រាប់បែកបរមាណូលើកទី៦ ធ្វើឲ្យរញ្ជួយសហគមអន្តរជាតិ
ចុះផ្សាយនៅថ្ងៃ៖
ស្តាប់ - ០៧:០១
កាលពីថ្ងៃអាទិត្យ ទី៣កញ្ញា របបផ្តាច់ការកូរ៉េខាងជើង បានប្រកាសថា ខ្លួនបានធ្វើការសាកល្បងគ្រាប់បែកបរមាណូប្រភេទអ៊ីដ្រូសែនបានសម្រេចជោគជ័យ។ នេះគឺជាលើកទី៦ហើយ ដែលកូរ៉េខាងជើង បានធ្វើការបាញ់សាកនូវគ្រាប់បែកបរមាណូ ដែលលើកចុងក្រោយ គឺកាលពីខែកញ្ញា ឆ្នាំ២០១៦។ នេះនៅមិនរាប់បញ្ចូលទេ នូវការសាកល្បងអាវុធមីស៊ីលបាលីស្ទីក ដែលរបបនេះ បានបាញ់សាកល្បងយ៉ាងញឺកញាប់ ក្នុងរយៈពេលចុងក្រោយនេះ។ ភាពតានតឹង និងការព្រួយបារម្ភ កាន់តែកើនឡើងខ្ពស់ ពីសំណាក់ប្រទេសក្បែរខាង ដែលទាមទារឲ្យមានដំណោះស្រាយជាបន្ទាន់ ពីសំណាក់ក្រុមប្រឹក្សាសន្តិសុខនៃអង្គការសហប្រជាជាតិ។
គ្រាប់បែកបរមាណូអ៊ីដ្រូសែន ទំងន់៥០គីឡូតោន
ឆ្លងកាត់ការវិភាគពីអ្នកជំនាញ និងដោយផ្ទៀងផ្ទាត់ជាមួយទិន្ន័យព័ត៌មាន ដែលគេប្រមូលបាន គឺគ្រាប់បែកនោះ អាចពិតជាគ្រាប់នុយក្លេអ៊ែរ រឺគ្រាប់បរមាណូ ប្រភេទអ៊ីដ្រូសែន ដូចដែលទូរទស្សន៍កូរ៉េខាងជើង បានប្រកាសផ្សាយពិតមែន។ កូរ៉េខាងជើង បានផ្សាយរូបភាពកាលពីថ្ងៃអាទិត្យ ដែលគេឃើញ គីម ជុងអ៊ុន កំពុងឈរមើលការបំពាក់ក្បាលគ្រាប់នុយក្លេអ៊ែរ។ ហើយបើតាមការផ្សាយនេះ វត្ថុធាតុដើមទាំងអស់ ដើម្បីផលិតអាវុធនេះ គឺជាផលិតផលក្នុងស្រុករបស់កូរ៉េខាងជើងទាំងស្រុងតែម្តង។
ការបាញ់សាកល្បងនេះ បានធ្វើឡើងនៅមូលដ្ឋាននុយក្លេអ៊ែរ Punggye-ri ស្ថិតក្នុងខេត្ត Hamgyeong នៅភាគខាងជើង។ តាមពិតទៅ ការសាកល្បងនេះ ត្រូវបានគេសង្ស័យ និងដឹងមុនជាច្រើនថ្ងៃមកហើយ។ ភ្នាក់ងារស៊ើបការណ៍សំងាត់កូរ៉េខាងត្បូង បានប្រាប់តាំងតែពីថ្ងៃ២៨ សីហា ថាកូរ៉េខាងជើងកំពុងត្រៀមសាកអាវុធ ហើយអាចជាគ្រាប់នុយក្លេអ៊ែរ។
យោងតាមការវិភាគ របស់ភ្នាក់ងារទិន្ន័យឧត្តុនិយមកូរ៉េខាងត្បូង បានឲ្យដឹងថា គ្រាប់នុយក្លេអ៊ែរ ដែលកូរ៉េខាងជើង បានសាកកាលពីថ្ងៃអាទិត្យ អាចមានកំលាំងលើលគ្រាប់នុយក្លេអ៊ែរ ដែលសាកកាលពីខែកញ្ញា ឆ្នាំ២០១៦។ កាលនោះ ដែលជាការសាកលើកទី៥ គ្រាប់នោះជាប្រភេទគ្រាប់អ៊ីដ្រូសែន ហើយមានកំលាំងប្រហែល ១០គីឡូតោន។ បើលើកទី៦នេះ លើសលើកមុន៥ដង គឺមានន័យថា វាអាចមានកំលាំងប្រហែល៥០គីឡូតោន។ ទំហំនេះ គឺវាធំជាងគ្រាប់បែកបរមាណូ ដែលអាមេរិកទម្លាក់នៅហ៊ីរ៉ូស៊ីម៉ា ដល់ទៅជាង៣ដងឯណោះ។
អនាគត មីស៊ីលបាលីស្ទីកឆ្លងទ្វីប បំពាក់ដោយក្បាលគ្រាប់នុយក្លេអ៊ែរ?
ការសាកល្បងនុយក្លេអ៊ែរនេះ វាធ្វើឡើងបន្ទាប់ពីកូរ៉េខាងជើង បានសាកបាញ់មីស៊ីលបាលីស្ទីកអន្តរទ្វីប បានសម្រេចជាច្រើនដង។ ដូច្នេះ នេះអាចជាសារ ប្រាប់ថា ចាប់ពីពេលនេះទៅ កូរ៉េខាងជើង អាចបាញ់មីស៊ីលបាលីស្ទីកឆ្លងទ្វីប ដោយមានបំពាក់ដោយក្បាលគ្រាប់នុយក្លែអ៊ែរបានហើយ។
ក៏ប៉ុន្តែអ្នកជំនាញមួយចំនួននៅតែមិនទាន់ជឿ ទាំងស្រុងនៅឡើយទេ ដោយគេនៅគិតថា កូរ៉េខាងជើង មិនទាន់មានជំនាញខ្ពស់ អាចបំព្រួញគ្រាប់នុយក្លេអ៊ែរឲ្យតូច ដើម្បីដាក់ក្នុងមីស៊ីលបាននៅឡើយទេ។ បើអាចធ្វើបាន ក៏គ្រាប់នុយក្លេអ៊ែរនោះ ជាគ្រាប់តូច មានកំលាំងមិនលើសពី៥០០គីឡូក្រាមដែរ។ តែយ៉ាងណា ការគំរាមកំហែងដោយមហិច្ឆិតានុយក្លេអ៊ែររបស់កូរ៉េខាងជើង កំពុងធ្វើឲ្យសហគមន៍អន្តរជាតិ និងអ្នកជំនាញជាច្រើនវង្វេងវង្វាន់ ស្លន់ស្លោរគ្រប់គ្នាហើយពេលនេះ។
ក្រុមប្រឹក្សាសន្តិសុខប្រជុំបន្ទាន់
បើតាមការប្រកាសរបស់ក្រសួងការពារជាតិ កូរ៉េខាងត្បូង គឺគេកំពុងរៀបចំដាក់ដំឡើង ប្រព័ន្ធខែលមីស៊ីល ចំនួន៤បន្ថែមទៀត។ នៅព្រឹកថ្ងៃចន្ទ កងទ័ពកូរ៉េខាងត្បូង ក៏បានបាញ់សាកល្បងគ្រាប់មីស៊ីល ដើម្បីហាត់សម កំទេចមូលដ្ឋានមីស៊ីល និងនុយក្លេអ៊ែររបស់កូរ៉េខាងជើង ក្នុងករណីមានការផ្ទុះអាវុធពិតមែន។ មិនត្រឹមតែប៉ុណ្ណោះ ភ្នាក់ងារស៊ើបការសំងាត់កូរ៉េខាងត្បូង ទើបតែបានអះអាងថា តាមការសង្កេត កូរ៉េខាងជើង អាចកំពុងត្រៀមរៀបចំបាញ់សាកល្បងអាវុធមួយផ្សេងទៀត ក្នុងពេលដ៏ឆាប់ខាងមុខនេះ។
ប្រតិកម្មបានធ្លាក់ជាបន្តបន្ទាប់។ ក្រុមប្រឹក្សាសន្តិសុខនៃអង្គការសហប្រជាជាតិ នឹងបើកការប្រជុំជាបន្ទាន់ នៅរសៀលថ្ងៃចន្ទនេះ នៅទីក្រុងញូយ៉ក។ តាមការឲ្យដឹង ប្រទេសមហាអំណាចទាំង៥ នឹងនិយាយគ្នា ពីការដាក់ទណ្ឌកម្មបន្ថែមលើរបបផ្តាច់ការកូរ៉េខាងជើង។
លោកប្រធានាធិបតីបារាំង និងលោកស្រីអធិការបតីអាល្លឺម៉ង់ បាននិយាយទូរស័ព្ទជាមួយគ្នា ហើយបានលើកឡើងថានឹងដាក់ចេញនូវទណ្ឌកម្មសេដ្ឋកិច្ច ទៅលើកូរ៉េខាងជើង ឲ្យបានធ្ងន់ជាទីបំផុត នៅក្នុងក្របខណ្ឌសហភាពអឺរ៉ុប។ ដូចគ្នាដែរ រដ្ឋាភិបាលចិន ទើបបានបញ្ជាក់ថា គេបានផ្ញើរលិខិតថ្កោលទោសជាផ្លូវការ ទៅកាន់រដ្ឋាភិបាលព្យុងយ៉ាង ហើយចិនត្រៀមរួចជាស្រេច ក្នុងការអនុវត្តនូវវិធានការទណ្ឌកម្មថ្មីទៀត ដែលក្រុមប្រឹក្សាសន្តិសុខនឹងដាក់ចុះ។
ពូទីនថា ត្រូវតាំងចិត្តឲ្យរឹងមាំ កុំយកកំហឹងទល់កំហល់!
ដោយឡែកលោក ពូទីន ប្រធានាធិបតីរុស្ស៊ី បានលើកឡើងថា រុស្ស៊ីមិនប្រឆាំងនឹងទណ្ឌកម្មទេ តែគ្រាន់តែថា បើស្ថានការណ៍បានដើរមកដល់ដំណាក់កាលនេះ គឺបង្ហាញថា ទណ្ឌកម្មកន្លងមក មិនបានហុចផលទេ។ លោកពូទីន ថែមទាំងបានអំពាវនាវថា ក្នុងកាលៈទេសៈតានតឹងបែបនេះ គ្រប់គ្នាត្រូវតាំងចិត្តឲ្យរឹងមាំ កុំសម្រេចធ្វើអ្វី ដោយយកកំហឹងទល់កំហល់ឲ្យសោះ ព្រោះបើធ្វើបែបនោះ សង្រ្គាមវិនាសកម្មប្រាកដជាផ្ទុះឡើង ហើយមិនអាចបកក្រោយវិញបានទេ។
ត្រង់ចំណុចនេះ រុស្ស៊ី និងចិន មានជំហរដូចគ្នា គឺត្រូវផ្តល់អទិភាពដល់ការចរចា។ គេមិនត្រូវគំរាមប្រើកំលាំងបកទៅវិញទេ ព្រោះថាវាគ្មានប្រយោជន៍។ ចិន និងរុស្ស៊ី ចង់ឲ្យបើកការចរចា ជាមួយកូរ៉េខាងជើង។ ជំហរនេះ វាខុសពីជំហររបស់រដ្ឋាភិបាលលោកដូណាល់ ត្រាំ។ លោកដូណាល់ ត្រាំ បានសរសេរសារជាច្រើននៅលើទំព័រTwitter របស់គាត់ បានសន្យាកំទេចកូរ៉េខាងជើង ដោយអាវុធនុយក្លេអ៊ែររបស់អាមេរិក។
លោកដូណាល់ ត្រាំ ចង់ដោះដៃចោលកូរ៉េខាងត្បូង?
គេសង្កេតឃើញថា រដ្ឋាភិបាលលោកដូណាល់ ត្រាំ កំពុងតែវង្វេងវង្វាន់ មិនដឹងត្រូវដោះស្រាយយ៉ាងណាទេ ក្នុងវិបត្តិកូរ៉េខាងជើងនេះ។ រហូតមកដល់ពេលនេះ គោលជំហររបស់លោកដូណាល់ ត្រាំនៅតែដដែល គឺគំរាមប្រើកំលាំង ទាំងដែលគេដឹងគ្រប់គ្នា ថាវាគឺជាជំហ៊ានមួយដ៏គ្រោះថ្នាក់ បំផុត។
បញ្ហាចោទលើកនេះ ធ្ងន់មួយកំរិតទៀត គឺគេសង្កេតឃើញថា កូរ៉េខាងត្បូង និងសហរដ្ឋអាមេរិក ហាក់កាន់តែឃ្លាតឆ្ងាយពីគ្នា។ កាលពីយប់ថ្ងៃអាទិត្យ ក្រោយពេលដែលកូរ៉េខាងជើង បាញ់សាកគ្រាប់នុយក្លេអ៊ែរ លោកដូណាល់ ត្រាំ មិនមែនគ្រាន់តែបានថ្កោលទោស និងគំរាមកូរ៉េខាងជើងទេ តែថែមទាំងបាននិយាយបញ្ចើចបញ្ចើ បន្ទោសកូរ៉េខាងត្បូងទៀតផង។ លោកត្រាំនិយាយ បែបចំអកដាក់លោក មូន ជាអ៊ីន ប្រធានាធិបតីកូរ៉េខាងត្បូងថា “ពេលនេះ កូរ៉េខាងត្បូង បែបបានភ្លឺភ្នែកហើយ ថា បំណងចង់និយាយ ចរចាគ្នាតាមសម្រួសជាមួយកូរ៉េខាងជើង គឺវាគ្មានប្រយោជន៍ទេ”។
ក្រៅពីបាននិយាយបញ្ចើចបញ្ចើ លោកដូណាល់ ត្រាំ ថែមទាំងបានគំរាមថា អាមេរិក អាចរំលាយកិច្ចព្រមព្រៀងពាណិជ្ជកម្មជាមួយកូរ៉េខាងត្បូងចោល។ មិនត្រឹមតែប៉ុណ្ណោះ រហូតមកដល់ពេលនេះ ម៉ោងនេះ លោក ដូណាល់ ត្រាំ ទើបតែបានទូរស័ព្ទទៅនិយាយជាមួយលោក នាយករដ្ឋមន្ត្រីជប៉ុន ស៊ិនហ្សូ អាបេ តែលោកត្រាំ នៅមិនទាន់បានទូរស័ព្ទទៅនិយាយគ្នា ជាមួយលោក មូន ជាអ៊ីន ប្រធានាធិបតីកូរ៉េខាងត្បូងនៅឡើយទេ។ លោកដូណាល់ ត្រាំ កំពុងធ្វើរឿង ដែលគេគ្រប់គ្នាងឿងឆ្ងល់ជាទីបំផុត គឺមកធ្វើឲ្យបែកបាក់សាមគ្គី ឲ្យសត្រូវដឹងចំណុចខ្សោយទៅវិញ។
កូរ៉េខាងត្បូង អាចងាកទៅចង់បានអាវុធនុយក្លេអ៊ែរ ទុកការពារខ្លួន
នៅព្រឹកថ្ងៃចន្ទ ទី៤ កញ្ញា កាសែតកូរ៉េខាងត្បូងមួយឈ្មោះ Donga Ilbo បានចុះផ្សាយថា ល្មមដល់ពេលហើយ ដែលកូរ៉េខាងត្បូង ឈប់នៅក្រោមឃ្លៀក និងរំពឹងអាមេរិកតទៅទៀត។ កាសែតនេះ បានសរសេរអំពាវនាវ ថាកូរ៉េខាងត្បូង ត្រូវតែចាប់ផ្តើមធ្វើអាវុធនុយក្លេអ៊ែរ ទុកការពារខ្លួនដោយខ្លួនឯង ដោយមិនចាំបាច់រំពឹង ឲ្យអាមេរិក មកការពារឡើយ។
អ្នកវិភាគជាច្រើន មិនយល់ថាលោកត្រាំ មានយុទ្ធសាស្ត្រចង់ដោះស្រាយយ៉ាងណា ឲ្យពិតប្រាកដទេ។ តែយ៉ាងណា ការដែលគាត់មិនទូរស័ព្ទ ទៅនិយាយជាមួយលោមូន ជាអ៊ីន ហើយមកនិយាយបញ្ចើចបញ្ចើដាក់កូរ៉េខាងត្បូង បន្ថែមទៀតនេះ គឺវាបានធ្វើឲ្យល្អក់កករ ដល់សម្ព័ន្ធភាពរវាងមហាមិត្តទាំងពីរ។ ក្នុងកាលៈទេសៈដ៏តានតឹងបែបនេះ គឺជារឿងមួយខុសធ្ងន់ណាស់។ ការនេះ និងរុញច្រាន ឲ្យមតិសាធារណៈកូរ៉េខាងត្បូង កាន់តែស្អប់អាមេរិក ហើយពួកគេមានអារម្មណ៍ថា មិនអាចរំពឹងអាមេរិកបានទៀតទេ។ បើអាមេរិក និងកូរ៉េខាងត្បូងបែកបាក់គ្នា អ្នកដែលឈ្នះគឺ កូរ៉េខាងជើងឯណោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ