មហាបាតុកម្មកាន់តែធំ នៅកូរ៉េខាងត្បូង ដើម្បីទំលាក់លោកស្រីប្រធានាធិបតី
ថ្ងៃសៅរ៍ទី២៦ វិច្ឆិកានេះ ប្រជាជនកូរ៉េខាងត្បូង មិនថានៅទីក្រុងសេអ៊ូល ឬនៅតាមទីក្រុងធំៗផ្សេងទៀត មានគំរោងធ្វើបាតុកម្ម ដែលនេះគឺជាបាតុកម្មលើកទី៥ហើយ ដើម្បីទាមទារឲ្យលោកស្រី ប្រធានាធិបតីប៉ាក់ គុនហេ ចុះចេញពីតំណែង។ ការទាមទារនេះ គឺដោយសារលោកស្រី មានជាប់ពាក់ព័ន្ធនឹងអំពើមន្តអាគម ជាមួយស្ត្រីម្នាក់ឈ្មោះឆយ ស៊ុនស៊ីល ព្រមទាំងករណីប្រព្រឹត្តិអំពើពុករលួយ និងប្រើប្រាស់អំណាចដើម្បីប្រយោជន៍ផ្ទាល់ខ្លួនទៀតផង។ តាមការរំពឹងទុក បាតុកម្មនៅថ្ងៃនេះ នឹងមានអ្នកចូលរួមប្រមាណជា១លាន៥សែននាក់ គ្រាន់តែនៅក្នុងក្រុងសេអ៊ូលមួយ។
ចុះផ្សាយនៅថ្ងៃ៖ កែប្រែថ្ងៃទី៖
នៅទីលានGwanghwamun កណ្តាលក្រុងសេអ៊ូល មានមនុស្សចាប់ផ្តើមមកកកកុញកាន់តែច្រើន។ ទីនេះហើយ ដែលជាចំណុចកណ្តាល នៃការជួបជុំធ្វើបាតុកម្ម បាតុកម្មទំលាក់ប្រធានាធិបតី ដែលបានធ្វើនៅរាល់ថ្ងៃសៅរ៍ អស់៥អាទិត្យជាប់គ្នាហើយ។ បើទោះបីជាអាកាសធាតុត្រជាក់ខ្លាំង មានធ្លាក់ទឹកកក ក៏ពួកគេបានមកជួបជុំគ្នា តាមការអំពាវនាវរបស់សមាគមជាច្រើន។ ក្នុងចំណោមបាតុករ មានទាំងយុវជនក្មេងៗ សិស្សវិទ្យាល័យ និស្សិត និងអ្នកខ្លះមកទាំងគ្រួសារ ហើយក្នុងនោះក៏មានកសិកររាប់ពាន់អ្នក ដែលបាននាំគ្នាបើកត្រាក់ទ័រ ពីផ្ទះរបស់ខ្លួន មកដល់ក្រុងសេអ៊ូលទៀតផង។
ក្រុមបាតុករ ត្រូវបានអាជ្ញាធរអនុញ្ញាតឲ្យចូលទៅជិត ចំងាយប្រហែលជា២០០ម៉ែត្រ ពីវិមានប្រធានធិបតី ដែលស្ថិតនៅខាងចុងបង្អស់ នៃទីលានដ៏ធំនេះ។ ម្នាក់ៗមានកាន់បដា ដែលភាគច្រើនសរសេរតែមួយឃ្លាគត់ គឺ “ប៉ាក់ គុនហេ ចុះចេញពីតំណែងជាបន្ទាន់!” ។
គួររំឮកដែរថា ចាប់តាំងពីផ្តើមមានបាតុកម្មអស់រយៈពេល៥សប្តាហ៍នេះមក គឺរាល់លើក មិនដែលមានអំពើហិង្សា រឺការប៉ះទង្គិចគ្នា រវាងក្រុមបាតុករ និងកម្លាំងសមត្ថកិច្ចទេ។ រាល់លើកបាតុកម្មបានប្រព្រឹត្តិធ្វើទៅ ដោយសភាពស្ងប់ស្ងាត់ បើទោះបីជាបាតុករម្នាក់ៗ មកចូលរួមបាតុកម្ម ដោយសារតែពួកគេមានកំហឹង ទៅលើលោកស្រីប្រធានាធិបតីប៉ាក់ គុនហេ ក៏ដោយ។
ចៅក្រមស៊ើបអង្កេត បានចោទលោកស្រីប៉ាក់ គុនហេ ពីបទចូលរួមឃុបឃិតជាមួយនឹងស្ត្រីឈ្មោះឆយ ស៊ុនស៊ីល ដើម្បីប្រព្រឹត្តិអំពើពុករលួយ និងប្រើប្រាស់អំណាចបុណ្យសក្តិ៍ ដើម្បីទាញយកប្រយោជន៍ផ្ទាល់ខ្លួន។ រហូតមកដល់ពេលនេះ លោកស្រីប៉ាក់ គុនហេ នៅតែបន្តបិទមាត់មិននិយាយអ្វីទាំងអស់ ទាក់ទិនទៅនឹងមហាបាតុកម្មប្រឆាំងលោកស្រី ៤ដងកន្លងមកនេះ។ តែលោកស្រីបានបញ្ជាក់ថា លោកស្រីត្រៀមខ្លួនជានិច្ច នឹងដើរចូលទៅតុលាការដើម្បីឆ្លើយបំភ្លឺ។
មហាបាតុកម្មដ៏ធំនាពេលនេះ ក្រុមបាតុករ ក៏មានបំណងដាក់សម្ពាធទៅលើសមាជិកសភាផងដែរ ក្នុងការចាប់ផ្តើមនីតិវិធី បោះឆ្នោតដកហូតតំណែងរបស់លោកស្រី ប៉ាក់ គុនហេ។ តាមការគ្រោងទុក នីតិវិធីដកហូតតំណែងលោកស្រីប៉ាក់ គុនហេ អាចនឹងត្រូវធ្វើ នៅសប្តាហ៍ក្រោយ នៅរដ្ឋសភា ហើយយ៉ាងណាមិញ តំណាងរាស្ត្រដែលចង់ឲ្យលោកស្រីចុះចេញពីតំណែង មានចំនួនកាន់តែច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ