ហ្កាឡាក់ស៊ីរបស់Samsung កំពុងរញ្ជួយ ដោយសាររឿងអាស្រូវពុករលួយ និងភាពគ្មានតម្លាភាព
ចុះផ្សាយនៅថ្ងៃ៖
ស្តាប់ - ០៥:៥៤
រឿងអាស្រូវ របស់លោកស្រីប្រធានាធិបតីកូរ៉េខាងត្បូង នៅមិនទាន់ចប់នៅឡើយទេ។ ផ្ទុយទៅវិញ រឿងនេះកំពុងតែរីកកាន់តែធំ ទៅដល់ក្រុមហ៊ុនយក្សរបស់កូរ៉េខាងត្បូង គឺក្រុមហ៊ុន Samsung។ លោក Lee Jae-Yong អគ្គនាយករងSamsung និងត្រូវជាកូនប្រុស របស់ស្ថាបនិកក្រុមហ៊ុននេះផ្ទាល់ កំពុងត្រូវជាប់ចោទពីបទប្រព្រឹត្តិអំពើសូកប៉ាន់ ក្នុងសំណុំរឿងលោកស្រីឆយ ស៊ុនស៊ីល និងលោកស្រី ប៉ាក់ គុនហេ។ ក្រុមហ៊ុនSamsung ដែលជានិម្មិតរូបដ៏ធំ នៃសេដ្ឋកិច្ចរបស់កូរ៉េខាងត្បូង កំពុងត្រូវបានមតិសាធារណៈ ដឹងការពិតជាក់ស្តែង ពីរបៀបរកស៊ី ដែលគ្មានតម្លាភាព ដែលប្រើប្រាស់មធ្យោបាយពុករលួយ សូកប៉ាន់មន្ត្រីរដ្ឋាភិបាលកូរ៉េខាងត្បូង។ ស្ថិតក្នុងកាលៈទេសៈនេះ Samsung ត្រូវតែធ្វើកំណែទម្រង់ បើសិនជាចង់ឈរជើង ជាក្រុមហ៊ុនធំលើទីផ្សារអន្តរជាតិ។
កូរ៉េខាងត្បូង៖ សាធារណរដ្ឋរបស់ Samsung
ពេលដែលគេឮពាក្យ កូរ៉េខាងត្បូង អ្វីដែលគេនឹកទៅដល់មុនគេ គឺ Samsung។ ជាង២០ឆ្នាំមកនេះ Samsung គឺជាផលិតផលកូរ៉េខាងត្បូងនាំមុខគេ នៅលើទីផ្សារផលិតផលអេឡិចត្រូនិចអន្តរជាតិ។ ផលិតផលSamsung បានទាញកូរ៉េខាងត្បូង ឲ្យឡើងជាមហាអំណាចសេដ្ឋកិច្ច អាស៊ីលំដាប់ទីបួន យ៉ាងពេញមុខ។ គ្រាន់តែចំណូលបានពីការលក់ផលិតផលរបស់ Samsung គឺមានស្មើនឹង២០% នៃផលិតផលដុលក្នុងស្រុកសរុប របស់កូរ៉េខាងត្បូង។ ដូច្នេះ យើងមិនបាច់និយាយឲ្យខាតពេលទេ ថាក្រុមហ៊ុនមហាយក្សនេះ មានឥទ្ធិពលកម្រិតណា នៅកូរ៉េខាងត្បូង។ ក៏ប៉ុន្តែអ្វីដែលគេចាប់អារម្មណ៍ខ្លាំងនាពេលនេះ គឺថាតើឥទ្ធិពលនេះ ជាឥទ្ធិពលអ្វី ឲ្យពិតប្រាកដ? បានមកដោយរបៀបណា?
ជាការពិត គ្មាននរណាម្នាក់ បដិសេធ មិនទទួលស្គាល់ភាពល្បីល្បាញរបស់ Samsung ទេ។ ភាពល្បីល្បាញនេះ ក៏ជាឥទ្ធិពលម្យ៉ាងដែរ។ តែឥទ្ធិពល ដែលគេកំពុងឆ្ងល់នាពេលនេះ គឺឥទ្ធិពល ដែលក្រុមហ៊ុននេះប្រើ ទៅលើមន្ត្រីរដ្ឋាភិបាលកូរ៉េខាងត្បូង តាមរយៈរូបភាពផ្សេងៗ ដូចជាការសូកប៉ាន់ រឺការផ្តល់ប្រយោជន៍ណាមួយ ដោយគ្មានតម្លាភាព។
មហាសេដ្ឋី ប្រធានក្រុមហ៊ុន អ្នកមានអំណាច អ្នកនយោបាយ ទាំងអស់នេះ នៅកូរ៉េខាងត្បូង គឺមិនសូវជាចែកដាច់ពីគ្នាប៉ុន្មានទេ។ ផ្ទុយទៅវិញ មនុស្សទាំងអស់នេះ តែងតែនៅក្រវែលៗ ក្បែរគ្នា ទាញយកប្រយោជន៍ពីគ្នាទៅវិញទៅមក។ Samsung មានឥទ្ធិពលសម្បើមណាស់ ទៅលើអ្នកនយោបាយនៅកូរ៉េខាងត្បូង។ អ្នកខ្លះ គេហ៊ានទាំងនិយាយបែបលេងសើចទៀត ថា សាធារណៈរដ្ឋកូរ៉េខាងត្បូង គឺជាសាធារណៈរដ្ឋរបស់Samsung។
ដោយដូចសម្លរកំពឹស៖
ជាមួយនឹងរឿងអាស្រូវរបស់លោកស្រី ប៉ាក់ គុនហេ ប្រធានាធិបតីកូរ៉េខាងត្បូង និងលោកស្រី ឆយ ស៊ុនស៊ីល ដែលពាក្យចចាមអារ៉ាមចោទថា បានផ្សំគំនិតគ្នា ប្រព្រឹត្តិអំពើពុករលួយ និងប្រើប្រាស់ឥទ្ធិពលខុសច្បាប់នោះ រឿងអាស្រូវផ្ទៃក្នុងដ៏ខ្មៅងងឹតរបស់ Samsung បានលេចចេញមកក្រៅ ច្បាស់ដូចថ្ងៃ។ យោងតាមការសង្ស័យរបស់ក្រុមការងារស៊ើបអង្កេតកូរ៉េខាងត្បូង គឺ Samsungបានសូកលោកស្រី ឆយ ស៊ិនស៊ីល ដែលជាមនុស្សជំនិតរបស់ លោកស្រីប៉ាក់ គុនហេ ប្រមាណជា៤០លានដុល្លារ ដើម្បីឲ្យរដ្ឋាភិបាលកូរ៉េខាងត្បូងបើកដៃឲ្យក្រុមហ៊ុននេះ ធ្វើអ្វីបានតាមចិត្ត។
អ្នកតំណាង Samsung ដែលរងការចោទប្រកាន់នេះ គឺលោក Lee Jae-Yong អគ្គនាយករង Samsung Electronic Group ហើយគឺជាកូនប្រុសរបស់លោក Lee Kung-Hee ដែលជាបិតាស្ថាបនិករបស់Samsung។ បើសិនជា តុលាការរកឃើញភស្តុតាងគ្រប់គ្រាន់ អគ្គនាយករង វ័យ៤៨ឆ្នាំរូបនេះ នឹងអាចត្រូវជាប់គុកច្រើនឆ្នាំ។ ក្រុមគ្រួសារត្រកូល Lee ដែលគ្រប់គ្រងក្រុមហ៊ុន Samsung ជាច្រើនតំណរមកនេះ ត្រូវបានគេចោទប្រកាន់ថា បានប្រកបរបររកស៊ី បែបមិនទៀងត្រង់ និងធ្វើការលាក់លៀម យ៉ាងកំបាំងបំផុត ដោយស៊ុំគ្រលុំជាមួយមន្ត្រីពុករលួយ និងអ្នកមានអំណាច។
ទម្លាប់ពុករលួយ ជាលក្ខណៈគ្រួសារ៖
ការពិតទៅ នេះមិនមែនជាលើកទីមួយទេ ដែលថ្នាក់ដឹកនាំSamsung មានជាប់ពាក់ព័ន្ធនឹងសកម្មភាពពុករលួយ តែគ្រាន់តែថា លើកមុនៗ មេដឹកនាំSamsung តែងតែទទួលបានការសហការ ពីពួកអ្នកមានអំណាច និងមន្ត្រីរដ្ឋាភិបាលដើម្បីជួយឲ្យរួចខ្លួន។ កាលពីឆ្នាំ ១៩៩៦ លោក Lee Kung-Hee ម្ចាស់Samsung ត្រូវបានតុលាការចោទថាបានយកលុយទៅសូកលោកប្រធានាធិបតី Roh Tae-Woo។ កាលនោះ លោកអគ្គនាយក Samsung ត្រូវបានតុលាការផ្តន្ទាទោសឲ្យជាប់ពន្ធនាគារ១ឆ្នាំ ជាទោសព្យួរ។ ទោសនេះ គ្រាន់តែជានិម្មិតរូបប៉ុណ្ណោះ។ ក្រោយមកនៅឆ្នាំ២០០៨ លោក Lee Kung-Hee ដដែល ត្រូវបានតុលាការ កូរ៉េខាងត្បូងរកឃើញថា បានយកលុយទៅលាក់ រាប់ពាន់លានដុល្លារ ដើម្បីគេចមិនបង់ពន្ធជូនរដ្ឋ។ តែហេតុតែលោក Lee មានខ្សែរធំៗ លោកត្រូវបានប្រធានាធិបតីកូរ៉េខាងត្បូងជំនាន់នោះ ធ្វើការលប់លាងទោស ឲ្យយ៉ាងស្អាត។
មតិសាធារណៈកូរ៉េខាងត្បូង ទ្រាំលែងបាន៖
កូរ៉េខាងត្បូង ឆ្នាំ២០១៧ ខុសពីកូរ៉េខាងត្បូង កាលពី១០ឆ្នាំមុន។ ប្រជាជនរាប់លាននាក់ ដែលបានធ្វើបាតុកម្មសឹងតែរៀងរាល់ថ្ងៃសៅរ៍ ទូទាំងកូរ៉េខាងត្បូង អស់រយៈពេល២ខែមកនេះ ពួកគេ មិនត្រឹមតែទាមទារឲ្យលោកស្រីប៉ាក់ គុនហេ ចុះចេញពីតំណែងទេ តែប្រជាជនបានទាមទារឲ្យអ្នកដែលចូលរួមប្រព្រឹត្តិអំពើពុករលួយទាំងអស់ ត្រូវផ្តន្ទាទោសឲ្យសក្តិ៍សម។
លោក Shim Jung-Taik អ្នកនិពន្ធសៀវភៅជាច្រើនក្បាល ស្តីពីប្រវត្តិ និងវប្បធម៌ធ្វើជំនួញរបស់ក្រុមហ៊ុន Samsung បានបញ្ជាក់ថា បច្ចុប្បន្ននេះ មតិសាធារណៈនៅកូរ៉េខាងត្បូងកាន់តែច្រើន បានយល់ស្របគ្នាថា ក្រុមហ៊ុន Samsung ធំលើសច្បាប់រដ្ឋទៅទៀត។ លោកយល់ថា ស្ថានភាពនេះ មិនអាចបន្តទៅទៀតបានទេ។ លើកនេះ គ្មាននរណាអាចការពារ Samsung បានទេ ព្រោះសូម្បីតែកៅអីប្រធានាធិបតី ក៏កំពុងតែរលំដែរ។
កំណែទម្រង់រកតម្លាភាព ឲ្យសមជាមហាក្រុមហ៊ុនអន្តរជាតិ៖
តាមពិតទៅ ក្រុមគ្រួសារត្រកូល Lee មិនមែនជាម្ចាស់ Samsungទាំងស្រុងទេ។ គ្រួសារនេះមានភាគហ៊ុនតែ៥%ប៉ុណ្ណោះ នៅក្នុងSamsung។ ក៏ប៉ុន្តែគ្រួសារនេះ បានរៀបចំប្រព័ន្ធពិសេស ដើម្បីធ្វើយ៉ាងណា បន្តប្រើឥទ្ធិពលនៅក្នុងក្រុមហ៊ុន Samsung តាមរយៈការបង្កើតសាខា ទិញចូលលក់ចេញ នូវក្រុមហ៊ុនចំណុះ រឺសាខាជាច្រើន។ ជាក់ស្តែង ការច្របាច់បញ្ចូលនូវក្រុមហ៊ុនចំណុះពីរ កាលពីពេលថ្មីៗនេះ ត្រូវបានគេរិះគន់យ៉ាងខ្លាំង ព្រោះក្រុមហ៊ុនមួយក្នុងចំណោមពីរនេះ ត្រូវបានគេវាយតម្លៃលក់ចេញ ថោកហួសពីតម្លៃជាក់ស្តែង។ ម្ចាស់ភាគហ៊ុនអន្តរជាតិ ដែលមានចំណែកក្នុង Samsung បានធ្វើការរារាំងជាខ្លាំង តែនៅតែមិនអាចធ្វើអ្វីបាន ព្រោះ គ្រួសារ Lee មានលោកស្រីឆយ ស៊ុនស៊ីល និងលោកស្រីប្រធានាធិបតីប៉ាក់ គុនហេ នៅជាបង្អែក។
អាណាចក្រ Samsung មិនអាចបន្តរកស៊ីរបៀបនេះ ដោយបណ្តោយឲ្យគ្រួសារត្រកូល Lee ធ្វើផ្តេសផ្តាសបានទេ។ ម្ចាស់ភាគហ៊ុនឯទៀត ប្រាកដជាកំពុងតែរកវិធីដោះស្រាយ ដើម្បីធ្វើកំណែទម្រង់ Samsung។ ស្ថានភាពរបស់ Samsung កន្លងមកនេះ តាមពិតវាគឺជាចំណុចខ្សោយរបស់ Samsung ទៅវិញទេ។ Samsung រកស៊ីលាក់លៀម សូកប៉ាន់អ្នកមានអំណាច ដូច្នេះ អ្នកមានអំណាច រឺមន្ត្រីណា ដែលដឹងពីចំណុចខ្សោយនេះ ប្រាកដជាមកបន្តកន្ទុយគ្នា ចាំកោសរូសយកលុយពី Samsung មិនខាន។ មានន័យថា Samsung ស្ថិតក្នុងស្ថានភាពគ្រោះថ្នាក់ផ្លូវច្បាប់គ្រប់ពេលវេលា។
ឆ្នាំ២០១៦ កន្លងទៅ Samsung បានខាតបង់ប្រាក់ជាច្រើនរួចទៅហើយ ជាមួយនឹងបរាជ័យនៃផលិតផលទូរស័ព្ទ Galaxy Note7 ដែលមានថ្មផ្ទុះបង្កគ្រោះថ្នាក់។ ឆ្នាំមុន ផ្ទុះត្រឹមតែថ្មទូរស័ព្ទGalaxy Note7 តែបើ Samsung មិនធ្វើកំណែទម្រង់ពីរបៀបរកស៊ីរបស់ខ្លួនឲ្យមានតម្លាភាព សក្តិ៍សមជាក្រុមហ៊ុនអន្តរជាតិធំទេនោះ គឺថា ពិភពហ្កាឡាក់ស៊ីរបស់Samsung ទាំងមូលតែម្តង ដែលអាចផ្ទុះបែកជាចំរៀក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ